الموضوع: ملاك لانسر شارك 2014 واهلا بالجميع

المشاركة الأصلية كتبت بواسطة m a g i c evo

ممكن تصورلنا الاريال اللي حضرتك اشتريته ده متركب ع العربيه علشان اشوف شكله يعني ...يا ريت ..والمحل بتاع بات مان ده لو توصف مكانه يبقي الف شكر ليك
لان كلامك صح الاريال بتاع عربيتي اتسرق حسبي الله ونعم الوكيل ...مش عارف يعني سارق الاريال ليه يعني.!.!...سبحان الله الراجل السايس بيقولي 5 جنيه ..الكلام ده في رمسيس...وانا كنت مسافر اسكندريه ...وكنت هروح من غير العربيه مشوار سريع يعني رجعت في نفس اليوم بس متاخر ..وقعد يقولي متخافش احنا عايشين هنا اصلا انا وابني وعملي فيها مدير امن الشيراتون ههههه..اديتله 10 جنيه ...وقولتله هظبطك تاني بس لما ارجع والاقي العربيه سليمه ....رجعت لا لقيت السايس ولا لقيت الاريال اصلا..قولت الحمد لله اني لقيت العربيه ....انا حكيت القصه دي علشان الناس كلها تاخد حذر من الناس دي اصلا حاجات صغيره ...بس للاسف بتحصل وكتير جدا ....ربنا يسترها علينا كلنا

بص يا باشا اولا ربنا يعوض عليك في الاريال اللي اتسرق منك ثانيا محل بات مان ده علي ايدك الشمال وانت داخل السوق من ناحية شارع رمسيس ولو سالت عليه البياعين كلهم هيدلوك عليه وحضرتك لو رحتله قوله اريال اللانسر وعلي فكرة هو اصلا بتاع البومة وبيركب علي الشارك برده وهو اطول من الاصلي بتاع الشارك وبالنسبة للصورة سامحني والله مش بعرف ارفع صور علي المنتدي

المشاركة الأصلية كتبت بواسطة m a g i c evo

انا كمان معايا 2013 وطالع عيني بدور ع العتب للعربيه ....في التوكيل حراميه بيقولي حوالي 2800 جنيه ..مش متذكر الرقم بالظبط بي طبعا افترااااء....
واصلا البلد دي كلها حراميه...يعني انا معايا f17
اللي بيقولوا عليها الفئه الخامسه واللي اقل من هاي لاين مباشره كنت جايبها ب 150000...بس ولاد حراميه وده اللي عرفته بعد كده..وده غالبا اللي بيحصل في كل المعارض والشركات كمان ...المفروض ان كل ما تجيب فئه اعلي ...يكون فيها اوبشنز زياده وكل الاوبشنز اللي في الفئه الاقل متوفر عندك ....يعني انا عربيتي ...مالتي فانكشن ... Air bags 2 و6 سماعات ...وصب اللي في الشنطه ده وجنوط سبور 16 ..وفوجات شبوره ...فرامل abs ..طاره جلد ..وفرامل يد جلد..سي دي 6 اسطوانات ...مدخل usb
في حين ان ناس تانيه معاها الفئه الاولي او التانيه...وعندهم سبويلر وعتب ...وانا مش عندي ..ولا عندي فتحه سقف
وناس قالولي انهم بيفكوا الحاجات دي من الفئات العاليه...ويبيعوها بسعرها زي ما هي لانك هتدفع اكتر علشان خاطر الاوبشنز التانيه دي كلها ..وياخدوا العتب مثلا او الجناح ..ويركبوه في عربيه الفئه الاولي او التانيه..ويرفعوا سعرها ..وبكده يبقي كانهم باعوا parts ...معينه في العربيه مرتين ...عموما حسبي الله ونعم الوكيل ...الكلام ده للناس اللي لسه هتشتري لازم تاخد بالها كويس ..وتبقي عارفه انها تتعامل مع اي شركه او معرض ع الاساس ده
فياريت لو حد يقدر يساعدني اني اجيب العتب بسعر اقل ...او مكان مضمون وكويس اروح اصب فيه العتب ده ...بس يكون سعره قليل برضه ..يا ريت يساعدني ...واسف لو طولت عليكم..بس انا لسه جديد هنا بقي فاستحملوني معلش

يا باشا الفئة الاولي اللي بتبقي فيها سبويلر دي بتبقي خليجي

المشاركة الأصلية كتبت بواسطة محمد سمير حسين

والله يا استاذ عمرو انا ملتمس لك العذر بالفعل العربية لو انت قافل الزجاج والطريق مفتوح ومش بتبص علي العداد ممكن توصل 180 من غير ماتحس والله حصلت معايا كنت قافل الزجاج وسايق فجأة لاقيت اللي جانبي بيحذرني ان السرعة 160 وكانت بتزيد كمان لولا انه حذرني الغريب بقي ان العربية مافيهاش انذار لما السرعة بتزيد عن 120 مش عارف ليه (طبعا انا مش عاوز الانذار لانه مزعج جدا)

بجد عندك حق جدا ....انا حصلت معايا محستش ان العربيه بتجري وانا كنت متاخر واخويا جاي من السعوديه ومتاخر عليه ودي كارثه طبعا... فقولت عادي اشد شويه ..وكانت اقصي حاجه جيبتها بالعربيه ...195 او 200 لان والله من الخضه ساعتها...انا مركزتش غير في اني اسيب الدواسه هههههه...ومحدش يستغرب ويقول ازاي ده ع طريق الاسماعيليه الصحرواي وكان الساعه 6 الصبح ما شاء الله ثبات غريب فعلا..لاني ركبت الالنترا 2010...وجيبت 140 وحسيت العربيه هتطير من ع الارض وبتعوم باستهبال
المهم حوار الانذار ده رزل جدا ...بس لو ضروري هو فيه لمبه حمرا كده بتنور بعد ال 120 اهي دي كويسه ..كفايه علينا هههه... خصوصا لان محدش هيركب شارك ومش هيبقي عاوز يطير بيها ..والا بصراحه يروح يرجعها ويجيب كيا او كورولا ..مع كامل احترامي لاي عربيه تانيه ...الحمد لله محدش شد معايا ع الطريق الا ما زعلته ...هههه بلا استثناء سيراتو الجديده ..كروز...كورولا الجديده ...الوحيده اللي رزلت معايا الالنترا..ودي فعلا الوحيده اللي بتشد قصاد القرش ...بس برضه زعلته في الاخر
بجد انا مش ندمان ولا ثانيه اني اخترتها ..الحمد لله ان ربنا هداني اني اشتريها

المشاركة الأصلية كتبت بواسطة omaranes77

سؤال لولبي كدة يا رجالة
هو الماتور الجديد mivec صح و 1600 هل دة الي هو 160 حصان ولا اية ولا الي موجود في الشارك حاليا soHc و160 hr دة doHC

لا يا فندم ..الموتور mivec...1600cc...و126حصان ..بجد موتور جبار ..واقتصادي جدا جدا....الحمد لله العربيه معايا بقالها سنه وشهرين ...ومظهرش فيها اي مشاكل عندي الحمد لله لا موتور ولا كهرباء ولا اي حاجه ..الحمد لله

المشاركة الأصلية كتبت بواسطة mo.ali

ايه الزجاج الحرااري ده وبكام
؟؟
وبالنسبة للتكييف والاستاذ اللى كان بيتكلم عنه .. انا فعلا حاسس ان التكييف زبالة وانا لحد دلوقتي ماشي ١٣٠٠ كيلو

؟؟

اللي اعرفه حضرتك اسمه فاميه حراري...مش عارف هو الي تقصده ولا لا انما الزجاج الحراري ده ما اعرفهوش بصراحه
بالنسبه للفاميه الحراري..ده بيقولوا عليه كويس بيعمل عزل للشمس وكده وده هيعلي معاك اداء التكييف جدا ...بس بصراحه انا مجربتهوش الفاميه الحراري للعربيه كلها هيتكلف حوالي 250-300 جنيه علي حسب المنطقه بتاعتك وعلي حسب الي هيركبه لك ولازم تاخد بالك كويس لان كل الناس بتركب فاميه ...بس بتعك وبتبوظه وبعد فته يقشر ويبقي شكله وحش..او يكون سايب فراغات فيه بيبوظ شكل العربيه ..الفاميه العادي تقريبا من 60-100 جنيه علي حسب المكان برضه
بس لو حضرتك هتركب الفاميه الحراري ده لازم تكون مثبت في الرخصه ..ان الزجاج ملون ..لان الشرطه اليومين دول ارزل حاجه ممكن تقابلها في حياتك..وناس بتقول انهم بقي بيتكلموا ع الزينون كمان ويدوا مخالفات محصلتليش بس ناس ثقه قالتلي كده
بالنسبه لاداء التكيف ..فيه شركاوي قال انه كان مش مظبوط راح اشتكي منه نظفوا ليه فلتر الهواء..وظبطوه..في التوكيل وما اخدوش فلوس كمان ... وبقي شغال زي الفل ..مكن برضه تكون عندك المشكله كده ...جرب يمكن تطلع نفس الكلام...
بس انا في رأي هو مش قوي اوووي يعني مش ميزه جامده في العربيه بس هي ارحم من عربيات كتير ... مش عارف يمكن علشان العربيات اللي ركبتها كانت خليجي ....فبصراحه كاني راكب ديب فريزر ههههه

المشاركة الأصلية كتبت بواسطة محمد سمير حسين

يا باشا الفئة الاولي اللي بتبقي فيها سبويلر دي بتبقي خليجي

مش فاهم قصدك..انا اللي اعرفه ان الترتيب تبعا للاقل ...ان الفئه الاولي...بعد كده التانيه لحد الفئه الخامسه اللي هيا f17... بعد كده الهاي لاين ...والترتيب ده متاكد منه لان مكتوب اصلا في ورق العربيه اللي جاي معاها حوار f17 ده..
اي كان المسمي الي عاوز اوصله ..ان ببص ع العربيه ...مش بلاقي فيها اي حاجه من الاوبشنز اللي عندي ...وبتكون ظاهره لانها لا فيها صب الشنطه...و4 سماعات ..والطاره مش مالتي فانكشن...والاقي فيها سبويلر وعربيات تانيه الاقي فيها عتب وسوبيلر كمان ....وده اللي بشوفه في عربيات كتير

المشاركة الأصلية كتبت بواسطة محمد سمير حسين

بص يا باشا اولا ربنا يعوض عليك في الاريال اللي اتسرق منك ثانيا محل بات مان ده علي ايدك الشمال وانت داخل السوق من ناحية شارع رمسيس ولو سالت عليه البياعين كلهم هيدلوك عليه وحضرتك لو رحتله قوله اريال اللانسر وعلي فكرة هو اصلا بتاع البومة وبيركب علي الشارك برده وهو اطول من الاصلي بتاع الشارك وبالنسبة للصورة سامحني والله مش بعرف ارفع صور علي المنتدي

لا ولا يهمك ....انا كمان مش بعرف ارفع صور اصلا ههه...والف شكر ع اهتمامك ..وربنا يباركلك في عربيتك ويديلك خيرها ويكفيك شرها