الموضوع: استفسار عن ابيزا 99

السلام عليكم انا عندى كام استفسار عن ابيزا 99 ياريت الاخوه يفيدونى بس ياريت الى يخش ميبخلش عليا برد لانى فعلا ان شاء الله هشترى ابيزا 99 ومحتاج كام استفسار

اولا

رنج سعر العربيه دلوقتى علشان متخمش فيها وفى نفس الوقت اقدر احكم حسب الحاله لانى مش هقدر اعرف الرنج من كونتكت او دوبيزل او اى موقع تانى لان معروف الى على النت بيزود على الاقل 3000 علشان يعمل حسابه الى هيفاصل وكده

ثانيا انا عايز عربيه ميكونش ملعوب فيها خالص ومحتاج موتورها الا 1000 cc ان شاء الله علشان يباه موفر فى البنزين علشان معايا مشوار كبير من التجمع الخامس لاكتوبر يوميا فمحتاج عربيه موفره فى البنزين وتستحمل فى نفس الوقت فهل هتستحمل

ثالثا

تسارع موتور الا 1000 cc كويس ولا هيباه اخره 120 والمكنه هتكحح واحس انى راكب ماروتى

رابعا ايه العيوب الى فى العربيه ديه علشان لما اكشف اكشف عليها اول حاجه وايه النصايح الخاصه بالعربيه ديه علشان كل عربيه بيباه ليه عيوب معينه معروفه فيها او كده يعنى من الاخر ازاى اشيل عربيه ابيزا 99 حالتها حلوه واتاكد انه مش ملعوب فيها

اخيرا ياريت يا جماعه الى عنده اى رد حتى ولو على جزئيه صغيره ميبخلش بالرد عليا علشان الموضوع مهم اوى بالنسبالى واكيد كل واحد فيكم كان مزنوق فى يوم من الايام ومحتاج يعرف معلومه وكان نفسه حد يرد عليه بسرعه

وجزاكم الله خيرا