تقرير استلام صنى الشكل الجديد ex

**wardet** · 20-02-2014 11:36 AM

امبارح كنت مع اختى بيشترو عربية
بعد ما استقرو على صنى الشكل الجديد مع انى مكنتش بحبها
بعتو يجيبو العربية من المخزن
كان موجود كذا لون
اختارو الفيرانى
10 دقايق دفعنا والعربية جت واتغسلت ومشينا
انا اللى سقت العربية بما ان جوز اختى لسه جديد فى السواقة
للعلم كان معايا صنى سوبر صالون الشكل القديم
وقبل ما نروح سمير ريان قلتلهم هاتو الششكل القديم لان الجديد وحش
انطباعى عن العربية اختلف تماما
بجد عربية كويسة جدا
ناعمة اكتر من الشكل القديم
الفرامل كويسة جداااااااا يمكن عشان لسه زيرو
الدركسيون خفيف عن الشكل القديم بصورة ملحوظة
واسعة من ورا جدا وقدام القعدة مريحة
المرايات الجانبية اسوا حاجة فى العربية مبعرفش اشوف اللى جاى من ورا كويس
صوت الموتور هادى جدا
العزل بصراحة دا المفاجأة جااااامد جدا
لدرجة انى حسيت ان عربيتى القديمة واللانسر 2013 اللى مع والدى جرارات زراعية
يادوب تقفل الازاز وتنعزل عن العالم الخارجى
اكتر حاجة مزعجة صفارة حزام الامان
عداد الRPM المقلوب حسيت ان دماغى تحت ورجلى فوق
طبعاً كل دى انطباعات اولية بما انى سقت العربية من مدينة نصر لمدينتى بس
السعر 113500
والسوبر صالون سالنا عليها كانت ب 126000

**amr011111** · 20-02-2014 11:38 AM

الف مبروك
وفعلاً المرايات الجانبيه صغيره

**Dr M.Noaman** · 20-02-2014 03:17 PM

تسلم ع التقرير ،، عشان كدا بنقول اللي عايز رأيه في النيوصني يسأل ملاكها ﻷنها بتتشوه بطريقة رهيبة لحساب عربيات تانية ،، موضوع الصفارة بتاعت حزام اﻷمان بيقف بعد 95 ثانية أو لو لبست الحزام ،، المرايات الجانبية بظبطها على حافة العربية من ورا بحيث تبقى زاوية قائمة مع العربية

العزل قوي جدا ما شاء الله لدرجة أني مابقفلش العربية وانا جواها الا لما افتح شباك عشان الضغطة ماتضرش وداني

صوت الموتور هادي جدا فعلا ما شاء الله لدرجة اني لو دورتها ووقفت شوية بحس كانه وقف بسبب اختفاء الصوت تماما :d

**Ah.Farid** · 20-02-2014 03:23 PM

الف مبروك ....بس لية عداد الار بى ام مقلوب انا بشوفة عادى بيبدأ من 0 و1و2....وهاكذا عادى وﻻ عندك مختلف

**J A G U A R** · 20-02-2014 03:52 PM

الف مبروك ..
بس عايز اعرف اخبارها ايه فى الثبات بعد 120

**edodahab** · 20-02-2014 09:56 PM

الف مبروك
فعلا عربية مظلومة و اللى يركبها هيحترمها على طول
فعلا العربية اعلى و اوسع و انعم و صوتها اهدى كتير من القديمة و الباور انعم بكتير
على فكرة المرايات لو اتظبطت كويس هتكشف الطريق بوضوح