الموضوع: ..:: تقرير تركيب زينون على الفوج لايت للكورولا 2014 ::..

المشاركة الأصلية كتبت بواسطة Mohamed.Hany

بشمهندس هاني، تحياتي ليك.
الكلام اللي انا ذكرته قبل كدة هو كلام نظري و بالارقام و علي اثاث ان كل لمبة ليها فيوز .
طب السؤال بقي ليه ال 7.5 امبير مضربش علي الواقع و اللمبتين علي نفس الفيوز !
اقول لحضرتك :
في الحقيقة البطارية ليست 12 فولت و لكنه رقم يقارب 13.5 فولت يعني الامبير هيقل اكتر، يعني ال 55 وات علي 13.5 هيبقي 4 امبير.
تاني حاجة ال 55 هو رقم اقصي قدرة للمبة و ده طبعا مش علي ارض الواقع و بيبقي اقل من كدة سنة بسيطة يعني ال 4 امبير دول هيقولو سنة صغيرة.
حاجة مهمة جدا لازم تدخل في الحسابات و هي مقاومة اللمبتين بالاوم وده في حالة انها لسة مفتوحة وباردة او بعد مفتحت و سخنت.
والاهم من كدة اللي عمرنا مهنعرفه هو توصيلة اللمبتين في الضفيرة سواء كانو علي ستارتينج ريلاي او بدون و هل هما متوصلين متوازيين ولا مع بعض علي طول و ده مربط الفرس.
في جميع الاحوال تمت التجربة علي 7.5 امبير و الفيوز مضربش ، و هندسيا كدة احسن .
كل ميكون الفيوز قليل و شغال نبقي في الامان ، يعني 7.5 امبير افضل من 10 لو الاتنين شغالين فل، عشان حساسية الفيوز ال 7.5 اعلي من 10 يعني لو حصل اي خلل لاقدر الله ال 7.5 هيضرب و ممكن ال 10 ميضربش و ده امان اعلي للضفيرة و الكابلات عشان متسيحش.
اخر نقطة احب انوه عليها، ان الدكتور ابوفندي جرب فيوز 5 امبير و مضربش !! ايوة 5 مش 7.5 امبير، وده بياكد كلامي ان علي الواقع الحسابات تختلف و الارقام ممكن تقل لان الارقام اللي بتبقي مكتوبة علي قطع الغيار بتبقي ارقام للمبيعات شغل سيلز يعني ممكن متكونش بتدي كل القدرة المكتوبة.
وانا لو مكان ابو فنددي احط ال 5 امبير حماية اكتر و ماله مدام مضربش يبقي فل الفل.
انا اسف ان الموضوع قلب هندسي كدة ، بس ده حال لما اتنين مهندسين يدخلو في موضوع

باشمهندس محمد هانى....خالص تحياتى يا كبير لمواضعيك المميزة دائماً و طبعاً سعيد جداً كالمعتاد بالنقاش مع حضرتك...و بشاركك بالأسف للأعضاء لو الموضوع قلب هندسى شوية و لكن يمكن نفيد بمعلومة لو قدرنا....

أسمحلى أوضح بعض النقاط فى ضوء معلوماتى البسيطة:

1- أعتقد اللمض على التوازى فى الضفيرة بدليل عندما يحترق فوج يبقى الأخر شغال
2- بطارية العربية بدون توصيل الكابلات و عند كامل شحنها فولتها 12.6 Volt----ست خلايا قيمة كل خلية 2.1 فولت يبقى المجموع 12.6 فولت
3- تعطى البطارية 13.5 ~ 13.8 فولت فى حالة القياس و العربية دايرة لأنه فعلياً خرج الدينامو هو المقاس فى هذه الحالة
4- فى لمض الزينون، بتكون مقاومة اللمض ما لا نهاية infinity لأنها ببساطة مش filament و لكن اتنين الكترودز two electrodes ما بينهم arc كهربائى فى حالة التشغيل و ما بينهم غازات خاملة فى حالة عدم التشغيل
5- يوجد كارتة إلكترونية فى إضاءة الزينون وظيفتها حاجتين أولاً إعطاء فولت عالى و تيار عالى فى الأول لتوليد ال arc و تسمى Ballast أو ما تعرف فى السوق بأسم ستارتر------ثانياً: مسرع لتسريع عملية الأضاءة لأنها بتاخد ثوانى بسيطة حتى تسخن و ال arc او الشرارة بين أطراف المبة تعطى ضوئها المظبوط

معاك طبعاً أنه كلما قلت قيمة الفيوز كان أكثر أماناً....كل الخوف من تيار البداية start up current هو اللى ممكن قيمته تعلى فى الأول و يطير فيوز....

أشاركك العجب لعدم احتراق فيوز 5 أمبير مع لمض 55 وات و أتفق معك انها ممكن متكونش بالقيمة دى و تكون أرقام غير دقيقة لقطع after market

رأى الشخصى لأن فنى التوكيل مهما كان هو على قد حالاته أن إحنا نعمل الأتى:

1- نتأكد أن الدويان تقدر تتحمل قدرة ال 55 وات دون مشاكل...لأن موضوع السخونة ده بيظهر مع كتر الأستخدام و بعد فترة و ذلك بالتأكد من القيمة القصوى المكتوبة على الدويل نفسه أو مراجعة كتالوج السيارة بالنسبة للقيم المسموحة
2- نجيب أميتر و نقيس التيار اللى ماشى فى أطراف بيت الفيوز عندما تكون الفوجات شغالة...و أهم حاجة نلاحظ قيمة التيار عند بداية التشغيل حيث تكون أعلى قيمة له و منه نقدر نحدد بدقة القيمة المظبوطة جداً لقيمة الفيوز المطلوب إستخدامه لهذا التعديل....

دايماً بسعد بالنقاش مع حضرتك و ببارك مرة أخرى للدكترة و لكل ملاك الكورولا الجميلة