الموضوع: استلمت الفلوينس الهاى لاين و مش مبسوط!!

المشاركة الأصلية كتبت بواسطة Dr.a.osman

السلام عليكم
استلمت النهاردة الفلوينس الهاي لاين بس في حاجات مضيقانى. أولا ساعات لما بقى بالعربية بلاقى ال rpm واقف على 1 وده طبعا مش طبيعى إطلاقا خصوصا أن العربية بتبقى متسخنة مش باردة !!!! لما أدى اطفيها و اشغلها تانى ألقى ال rpm رجع طبيعى و صوت الموتور هادى! !! مع العلم أن العربية مش مدية أي error. ايه السبب في رأيكم؟؟ تانى حاجة، فتحة السقف لما باجى اقفلها بتروح تفتح تانى لوحدها و لما سألت الموزع قال السبب خاصية ال anti pinch بتشتغل اتوماتيك لأن الماكينة بتحس بمقاومة صدادة الهواء فبترجع تانى تفتح و قاللي أن حد حصل معاه الكلام ده قبل كده و حط شوية شحم علي المجراه و اشتغلت بدون مشاكل. المثير في الموضوع انى اكتشفت أن فتحة السقف مافيها الخاصية دى أساسا وحاولت أحد ايدى وكانت الفتحة هتقفل عليها!!!!! تالت نقطة، العربية زواياها مش مضبوطة! !!!! الدرسوني لازم يكون مايل ناحية الشمال شوية علشان العربية تمشى عدل!!!!! المشكلة أن أول و تانى نقطة ماكانش ينفع اكتشفهم قبل الاستلام ﻷنهم مابانوش غير مع المشى!!!! رأى حضراتكم ايه؟؟ على فكرة الاستلام كان من التوكيل! ! شكرا

انا معايا اول فئه علي شان كده مش حعرف ارد عليك في موضوع فتحه السقف
بس فعلا موضوع ال rpm دا بيعلي اول ما اقف في اشاره ومش عارف السبب وبيرجع بعد نص دقيقه تاني طبيعي

اولا مبروك لحضرتك ثانيا بالنسبه لاول حاجه هي المفروض العربيه و هي بارده او ما تدور بتعلي الار بي ام علي 1.2 مثلا و بتنزل بالتدريج لكن حضرتك بتقول العربيه سخنه هل الموضوع ده بيحصل علي طول ولا في حالات معينه وجرب كده بدل ما تبطل انك تزود بنزين وانت علي ال n وشوف هيرجع طبيعي ولا لا بالنسبه لتاني حاجه مقدرش افيدك اوي بس هل بتفتح تاني علي طول ولا وانت ماشي بس تالت حاجه بقي دي لازم تروحلوهم بس هي حاجه بسيطه ومستنيين انطباع حضرتك عن العربيه بشكل عام بغض النظر عن الحاجات دي

المشاركة الأصلية كتبت بواسطة Meggieboy

اولا الف مبروك لحضرتك على الفلوانس و ربنا يباركلك فيها و يكفيك شرها
بالنسبة للنقطة الأولى انا مش فاهمها كويس...حضرتك تقصد و العربية دايرة و مش بتتحرك بيكون ال rpm على 1000 مش على 750 ؟ اللى هو عدد اللفات المفروض تكون عليه و هى سخنه...برحاء توضيح اكتر للنقطة دى

فتحة السقف بتعمل بضغطة واحدة فى الفتح و الإمالة...يعنى هنفرض انها مقفولة خالص...ضغطة واحدة طويلة للزر للأمام هتميل من الخلف للتهوية.....ضغطة تانية طويلة للزر للخلف هتقفل هذا الميل......ضغطة اخرى طويلة للخلف هتفتح بالكامل و لو حضرتك لمست الزر لمسة قصيرة و هى بتفتح هتقف عن موضع اللمسة ثم ضغطة طويلة اخرى للزر للأمام للغلق...

خاصية ال anti pinch ملهاش دعوة بالهوا و اللى قال عليه المندوب ده حماده بالجنزبيل....ممكن يكون فيه حاجة فى المجرى حايشة الفتحة و علشان كده بترجع تانى لوحدها....و ده بيأكد ان خاصية ال anti pinch شغالة على فكرة
حضرتك بص عليها و هى بتقفل و اللحظة اللى بتفتح فيها تانى و شوف بتخبط فى حاجة ساعتها و لا لأ؟
للتأكد من عمل الخاصية....حضرتك ضع اى عائق و بلاش ايدك للتأكد من عملها....لاحظ ان الخاصية لا تعمل عن طريق الاستشعار و لكن تعمل ميكانيكياً و هو انه فى حالة الاصطدام بعائق يقوم موتور فتحة السقف بعكس حركته للاتجاه المعاكس....يعنى لازم تكون فيه خبطة خفيفة علشان يرد للخلف

بالنسبة لنقطة الدريكسيون اللى بيحدف شمال: انا كان عندى نفس الموضوع فى الميجان لما استلمتها سنة ٢٠٠٦ و طلع عيب كاوتش الاستوك....و حله بيكون عن طريق الترصيص عند واحد بتاع كاوتش كويس و تبديل العجلة السىيئة و وضعها فى الخلف اذا لزم الامر....

الله يبارك فيك ياباشا. بالنسبه لموضوع ال rpm العربية بتبقى واقفة و متسخنة كويس و ال rpm بيبقى علي 1000 مش على 750 ذى أى عربية. ساعات بزود بنزين يمكن ينزل بعد ما أرفع رجلى لكن بفضل يهدى تدريجي لحد 1000 و يثبت!!! أطفى و اشغلها تانى يربط و ساعات يروح يرفع تانى لوحدها! !! مش فاهم ايه السبب! بالنسبة لنقطة الزوايا معتقدش أن الكاوتش هو السبب لأن الدركسيون نفسه فى ميل وده معناه أن ال total toe أو ال thrust angle بتاع العربية مش مضبوطة. اناخايف ده يكون بسبب أن العربية تكون لا قدر الله اتهبدت منهم مثلا و هما بيدها المعرض و بالتالي العفشة نفسها يكون فيها حاجة!! موضوع فتحة السقف ده مش مضايقنى أوى لأن حله سهل ان شاء الله. شكرا

المشاركة الأصلية كتبت بواسطة miceg

مبروك العربية ومتخليش الحاجات الصغيره ده تعكنن مزاجك
الاستلام مالهوش علاقة انك اكتشفتهم ولا لا لان مش هتكشف حاجة الا بعد إلاستخدام الفعلي
موضوع عدم القفل مع وجود العائق برضه عندي وبحط دراعي ولا كإنه موجود
ممكن يكون سيتيج الله أعلم
عندي برضه الزوايا مش مظبوطة وفي حدفه فالدركسيون
كلمت التوكيل النهارده حدد معايا معاد يوم ألاحد القادم فرع العبور
وانا لسه مرخصتش قولتلهم هكلمكو لما أرخص
لا تقلق كل ده هيخلص في أول زيارة إن شاء الله
ومتبصعش على نص الكوباية فاضي
والف مبروك

الله يبارك فيك ياباشا
انا بس اللى مضايقنى أن العربية لسة جديدة وفيها كل ده. طب ازاى؟! نصيب طبعا! كمان أنا خايف يكون مشكلة الزوايا دى بسبب حاجة حصلت فى العفشة نتيجة النقل أو خلال عملية توصيل العربية للمعرض خصوصا كان عند حد من صحابى عربية سيراتو مستلمها من التوكيل فيها torsion beam معوجة نتيجة خبطة جامده و طبعا اضطر يدفع 5000 جنيه عشان يغيرها لأن الوكيل ما بيعترفش بمشاكل العفشه فيما يتعلق بالضمان.ربنا يستر!