الموضوع: يعنى إيه تفتيح الموتور؟؟؟

كان فى كذا موضوع اتكلموا عن موضوع التليين هنا فى المنتدى قبل كدة والموضوع دة فية اراء كتير فى ناس بتقول القرص علشان تفتيح الموتور وناس بتقول العكس

اية فكرة التليين؟؟
التليين هو تطبيع الاجزاء المتحركة على بعضها كأنك بتعملها صنفرة لأن ومع تقدم الصناعة وتطورها مفيش دقة بنسبة 100%
الاجزاء المتحركة او المحتكة ببعضها تشمل الشنابر والسلندرات وعمودى الكامة والكرنك وقواعدهم والصمامات ..... جميع الاجزاء المحتكة ببعض داخل الموتور
يعنى التليين مش مجرد شنبر وسلندر التليين يشمل جميع اجزاء الموتور لأن الموتور لسة جديد يعنى الاجزاء دى مطبعتش على بعض
يعنى فترة التليين كأنك بتعلم طفل صغير المشى مفيش طفل بيقوم يجرى مرة واحدة ولا طفل بيفضل طول عمرة ماشى على مهلة , يعنى تبدأ مع الموتور واحدة واحدة فى الاول على سرعات هادية ومن غير تحميل وبعد قترة تبدأ تزود وهكذا

ملحوظة: فكرة عمل الشنبر انة زى السوستة مع ضغط الغازات المحترقة علية بيفتح علشان يقفل على جدران السلندر و يحكم الغازات المحترقة , اللى اقصد اقولة ان دى فكرة عملة سواء فى التليين ولا بعدة يعنى مش محتاج قرص جامد فى فترة التليين علشان يحكم غرفة الحريق ويحسن الاداء مانا فى اى فترة فى عمر الموتور لو قرصت هيعمل كدة صحيح مش مطلوب التحسيس على الموتور بس بردو مش مطلوب القرص الزيادة اهم حاجة تعرف موتور عربيتك

موضوع التفتيح مش وهم ولا حاجة وفعلا دة بيحصل بس الحكاية مش قرص وكبس بنزين وخلاص لأ محتاجة احساس بموتور العربية وازاى تتعامل معاة -كل عربية مختلفة عن التانية- فى ناس ممكن تكون بتقرص وتحس ان العربية مخنوقة او بتجرى بس تحس انها مش مرتاحة صوت الموتور عالى وتحس انها مكلبشة وناس مش بتقرص بس العربية بتجرى وتجمع بسرعة وهادية , ممكن فى نفس العربية واحد يركبها يخنقها وواحد تانى يركبها تحس ان العربية هادية وبتجرى بالرغم ان نفس العربية والموتور ونفس ظبطة الموتور معدلتش ولا غيرت حاجة وممكن بعد ماتتفتح تتخنق تانى حسب اسلوب السواقة

الموضوع دة اتناقشت فية مع ناس كتير وموصلناش لسبب قاطع واتناقشت فية مع دكاترة احتراق ايام الكلية بس للأسف معرفتش اقنعهم بالظاهرة او يمكن معرفتش اوصلهم الموضوع صح :D
اعتقد ان الفكرة كلها فى رواسب الكربون وتكوينها داخل السلندرات لأن الموضوع ملهوش دعوة باساسيات الموتور والدليل على كدة انة متغير مش ثابت .


bosyfadl:
ال rpm اختصار revolution per minute وهو عداد فى التابلوة بيقيس عدد لفات الموتور فى الدقيقة

بالنسبة للزيت حسب نوعة فى بيتغير كل 10 الاف وفى بيتغير على فترات اقل بس عموما لا ينصح بترك الزيت اكتر من 6 شهور حتى لو العربية متحركتش لأن خواص الزيت يتتغير