الموضوع: خطأ فادح في الفلوانس فيس ليفت

المشاركة الأصلية كتبت بواسطة miceg

ازيك ياباشا اخبارك إيه
انت فهمتني غلط
انا لا أعيب السيارة إطلاقا وتعليقاتي ومواضيعي تشيد بالسيارة وجمالها
ولو أي حد طلب مني النصيحة هفضل أنصحه بالفلوانس
لكن زي مانت قولت غلطة واحد بتاع مبيعات
لكن هما للأسف مكنش واحد
انا رحت سمير ريان ورحت معرض محمد زكي ورحت معرض القصراوي
وكلهم أكدو نفس المعلومة
وخاصة لما كنت بقولهم اني محتار بينها وبين الكورولا فكان طبعا بيذكر ألاوبشنز الضرورية
وفالنهاية عمر ما الفلوانس هيبقا فيها قصور عشان فتحة مبرد تابلوه
ولو فيها قصور من باب أولى كنا هنتكلم فنقطة ال esp اللي بتنزل بيها بره مصر
وهنا الوكيل بيستخسر فالمواطن
عشان فألاصل محدش قالنا إنها موجودة
نورت الموضوع ياباشا

إنت إللى منور بموضوعاتك ومشاركاتك
بصراحة عنوان موضوعك خضنى وخصوصا أنى متابع أنك إرتبطت وأخذت فلوانستك عن حب
مش إرتباط معارض تقليدى ههههههه

المهم فعلا فى الموضوع ده أننى لا أعتقد أن فيه سوء نية من مسئول المبيعات الذى أخبرك بهذه الخاصية ولا يقصد تحلية بضاعة بالكذب .. الموضوع بإختصار تقصير من الوكيل فى تحديث البروشور الخاص بالسيارة بالحذف أوالإضافة والجهل من مسئول المبيعات وخصوصا التجار والمعارض .. أما بخصوص معارض الوكيل والموزعين المعتمدين فالمعلومة واضحة بدون لبس (وهذا عن تجربة شخصية بفرع رينو أبورواش والسبع أوتوموتيف بألماظة)
وعلى سبيل المثال وليس الحصر :-

# طبقا للبروشور(المطبوع والموجود بالتوكيل) درج التابلوه مزود بالإضاءة والتبريد بدءاَ من الفئة e3 - تم حذف خاصية التبريد من كل الفئات بدون تعديل البروشور(تم إيضاح المعلومة الصحيحة بواسطة مسئول المبيعات)

# طبقا للبروشور (المطبوع والموجود بالتوكيل) راديو سى دى بــ 4 سماعات فى الفئة e2 تزيد إلى 6 سماعات بدءاَ من الفئة e3 - تم زيادة عدد السماعات إلى 8 سماعات بدءاَ من الفئة e3 بدون تعديل البروشور(تم إيضاح المعلومة الصحيحة بواسطة مسئول المبيعات)

# طبقا للبروشور (المطبوع والموجود بالتوكيل) الباركينج سينسورز موجودة بدءا من الفئة e3 sl - تم التعديل وإضافة هذه الخاصية إلى الفئة الأقل e3 s بدون تعديل البروشور(تم إيضاح المعلومة الصحيحة بواسطة مسئول المبيعات)

الخلاصة :- إذا إفترضت سوء النية فى إخفاء معلومة "حذف خاصية درج التابلوه المبرد" فذلك ينفيه إخفاء معلومة "زيادة عدد السماعات إلى 8 سماعات بدلا من 6" وكذلك "إضافة الباركينج سينسورز لفئة لم يكن موجودا بها "
وبذلك يخرج الموضوع من إطار سوء النية وتعمد التضليل ليدخل فى إطار الإهمال فى تحديث البيانات سواء بالإضافة أو الحذف

أما عن جهل مسئولى المبيعات - بناء على تجربة شخصية أيضا - ففى معرض محمد زكى بالقطامية لم تكن السيارة معروضة أصلا وكل المتاح التحدث فيه مع المندوب هو الأسعار والحجز فقط
أما معرض سمير ريان فهو عامل زى سوق الجمعة - كل يوم - ماحدش فاضى لحد والمندوب من دول عايز يقول الكلمتين إللى حافظهم ويشوف زبون ثانى .. وإللى يروح يتفرج على سيارة عندهم لازم يكون مذاكرها كويس ومايسألش المندوب أسئلة من خارج المقرر .. يعنى لازم الأسئلة تكون فى مستوى الطالب المتوسط .. قصدى المندوب المتوسط
طبعا مش لازم أحكي لك عن مندوبى البيع بمعرض "المصرية" .. حدث ولاحرج .. الراجل مايعرفش أساسا فئة السيارة إللى واقفة أمامه طول النهار ولا تأخذ منه معلومة أكثر من أن السيارة بها موتور 1600 سى سى وفيها 4 أبواب .. والباقى تعرفه مع نفسك ههههههه

خلاصة الخلاصة :-
تريد معلومة صحيحة "عليك بالوكيل"
هناك تقصير فى تحديث المعلومات "نعم"
هناك سوء نية فى إخفاء المعلومات "لا أعتقد إطلاقا"

أتمنى أكون إستطعت نقل وجهة نظرى بحياد

وتقبل تحياتى ،،،