الموضوع: <<< اللهم اجرنا في مصيبتنا واخلف لنا خيرا منها - إنا لله وإنا إليه راجعون >>>

المشاركة الأصلية كتبت بواسطة shikh_khaled

بسم الله ولحمد لله والصلاة والسلام على رسول الله

السلام عليكم ورحمة الله وبركاته

الإخوة الزملاء أعضاء أحلى منتدى في الدنيا , بعد عناء يومين مع البيروقراطية الكئيبة

بدايةً من قسم البساتين عند عمل مذكرات فقد رخصتي القيادة والتسيير والتي رفض المسؤل بها عمل مذكرة الفقد

وعايزني أجيب له شهاة بيانات من المرور إن العربية بتاعتي حيث أنه ليس معي أصل الرخصة ومعي صورة فقط ّّّّ!!!!!

قلت له الرخصة اتسرقت , قالي روح المرور هاتلي شهادة البيانات ,

وبعد معاناة ودخولي لنائب المأمور أكثر من 3 مرات , عملوا لي مذكرة الفقد

وانتهاءً بوحدات المرور في المعادي وحلوان

اتصلت بي زوجتي بالأمس وأنا في مرور حلوان أعاني الأمرين لاستخراج بدل فاقد لرخصة التسيير , بعد محاولات مستميتة لاستخراج بدل فاقد لرخصة القيادة

والتي أفادني المسؤلون بمرور المعادي أن المرور احترق في 2011 ,

وأن عليّ أن أقوم بعمل رخصة جديدة واستخراج شهادات طبية باطنة ونظر وأصل المؤهل الدراسي و4 صور شخصية

اتصلت بي زوجتي وقالت لي البواب طالع بيقول فيه واحد عايز يطلع بيقول أنا لقيت الرخص والبطاقة بتوع الشيخ مرميين عند أكادمية الشرطة

نزل عبد الرحمن وقابله وخذ منه البطاقة والرخص

وقال الرجل له والله ما لقيتش معاهم أي فلوس , وكل اللي معايا صرفته في المواصلات من التجمع لحلوان وأنا جعان وما كلتش من امبارح

راح عبد الرحمن خذه وجابله فطار واداله 100 ج وشكره

والحمد لله الذي بنعمته تتم الصالحات

يا رب لك الحمد عدد خلقك ورضاء نفسك وزنة عرشك ومداد كلماتك

عدد ما أحاط به علمك وخط به قلمك وأحصاه كتابك ووسعته رحمتك

عدد ما خلقت في الأرض وعدد ما خلقت في السماء وعدد ما خلقت بين ذلك وعدد ما أنت خالق

كما ينبغي لجلال وجهك وعظيم سلطانك

وصلّ اللهم وسلم على الحبيب محمد

الحمد لله رب العالمين
الله أكبر ولله الحمد

ألف مبروك يا شيخنا الجليل وخبر جميل والله أسعدنى جدا .
السر فى الرضا بقضاء الله والتسليم بقضاؤه وقدره
والصبر على البلاء والأخذ بالأسباب

حضرتك صبرت وإحتسبت وشرعت فى إستخراج
بدل فاقد لما فقد منك وتحملت سخافات وبيروقراطيه
النموذج السلبى للمواطن المصرى خاصه فى المصالح الحكوميه
وكانت جائزه السماء الفوريه والعادله والسريعه

وكان الجانب المضئ فى الواقعه دى
الراجل الطيب البسيط الفقير
اللى مفكرش وعمل ما يمليه عليه دينه وضميره
وقطع مشوار كبير علشان يسلمك حاجتك واللى عرف أكيد
إنها مهمه بالنسبه لك لأنها اوراق رسميه ومهمه لك ولغيرك
وكان ايجابى 100% وقام بالعمل على اكمل وجه .

يعنى مفكرش إنه يبعت الحاجات
دى لحضرتك بالبريد العادى
او بالبريد المسجل بعلم الوصول
او حتى عن طريق شركات البريد الخاص .
لأ ده راح بنفسه لمكان يمكن يكون
بعيد عن محل سكنه
يمكن يكون أساسا
ميعرفش المكان ده

إتصرف بايجابيه كامله ونادره
بالرغم من ظروف بلدنا وعدم الأمان
اللى عايشين فيه كلنا دلوقتى

بالرغم من بساطه الراجل ده إلا إنه
أعطانا درس فى كيفيه
إنك تكون إيجابى ومسئول
كان ممكن يقول أنا مالى
كان ممكن يقول عادى
ما صاحب الحاجات ده هيطلع غيرهم
كان ممكن يخاف إنه يجى بنفسه
كان ممكن يعمل حاجات تانيه
سلبيه بخلاف إنه يكون إيجابى 1000%

تحيه تقدير وإعزاز لهذا الرجل
البسيط الكبير فى أخلاقه
اللى قالى وقال لحضرتك ولنا جميعا
إن الخير موجود بينا بالرغم مما نعانيه

أسأل الله العظيم رب العرش العظيم
أن يرزق هذا الرجل الخير كله
وان يكفيه ويغنيه ويرحمه
ويسخر له من يساعده
وأن يعينه على ظروفه
ويزيد من صبره وقوته
وان يرزقنا وإياه الإيجابيه والمسؤليه

اللهم إرزقنا الصدق فى القول والفعل والعمل
اللهم إرزقنا نقاء القلب وصفاء العقل وحلاوه اللسان
اللهم إجعل قلوبنا وأعمالنا خالصه لوجهك الكريم . اللهم امين

جزاك الله خيرا اخى الحبيب وصديقى العزيز أبا عبد الرحمن
وحفظك وأهلك من كل مكروه وسوء .......