الموضوع: نيسان سنترا

المشاركة الأصلية كتبت بواسطة khaled_afandy

فقيرة من ناحية التقفيل الداخلى و المساحة الداخلية، الشكل الخارجى السنترا اشيك فى رأيى، الميكانيكا أكيد الكورولا تكسب فيما عدا الإرتفاع عن الأرض، بس أنا لم أدرس السنترا ميكانيكيا حتى الآن و ده مجرد تخمين مبنى على سمعة التويوتا مفارنة بالنيسان

حضرتك بتقول شفت الكوروﻻ 20 مرة و فصصتها و بتقول ماعدا الارتفاع عن الارض !
طب ايه راى حضرتك ان الكوروﻻ ارتفاعها اتعدل من زمااان ،فانا انصح حضرتك تشوف الكوروﻻ للمرة ال 21 لان فيه معلومات كتيرة ممكن تكون مختش بالك منها. و للعلم الكوروﻻ واسعة جدا بعكس ما حضرتك بتقول و تقفيلها افضل بكتييير من السينترا ، اكيد حضرتك بتتكلم علي عربية تانية خالص.
تقبل تحياتي

المشاركة الأصلية كتبت بواسطة khaled_afandy

هى واسعة بالعافية و الا ايه، جرب تقعد 3 اشخاص كده فى الكنبة الخلفية و ابقى تعالى قول واسعة والا لأ، ايوه فيه مساحة للأقدام بس الكنبة نفسها ضيقة. تقفيلها تعبان جدا بصراحة بالمقارنة بسيارات أخرى فى نفس الفئة السعرية زى الأسترا و الفوكاس و الفلوانس. أذا اتكلمنا على الهاى لاين ام 210 يبقى قارن بالستروين c5 حتلاقى الكورولا تعبانة قوى بالنسبة لها، و شكرا على المعلومة بخصوص الإرتفاع بس أرجو ان يكون متسق مع التصميم العام للسيارة لأن الإتزان و الكلام ده ما فيهوش هزار.

بص حضرتك ,
ممكن تكون حضرتك شفت العربية 20 مرة و ركبتها 20 مرة زي مبتقول, يعني تعرف كل كبيرة و صغيرة عنها و فصصتها 20 حتة و متعرفش ان العربية ارتفاعها اتعدل ؟ طب ازاي يعني ؟؟
بالنسبة للتقفيل لو بالشكل و النظر فدي حاجة نسبية انا ممكن اشوف بلاستيك او جلد يعجبني و ممكن ميعجبش حد تاني لانها حاجة بتختلف من شخص للتاني و الدليل ان ناس كتير عاجبهم جدا التابلوه بخاماته و لو بنتكلم صح عشان تعرف التقفيل حلو ولا لأ يبقي تستني علي العربية كام سنة و تشوف بقي التزييق و الحاجات بتفتح من بعضها و الكلام ده كله .
طب اقولك معلومة تانية انا كان معايا كورولا 2011 اللي هي تقفيل ياباني 100% و بعتها و جبت 2014 و عارف تقفيل الاتنين و مش هقولك شغتها 20 مرة لأ ده و لا 1000 مرة .
عموما العربية معايا من اول منزلت و سافرت بيها كذا مرة و كنا 5 في العربية و زي الفل ولا في اي مشكلة , و لعلم حضرتك كورولا 2014 ابعادها و مساحتها الداخلية اكبر و اوسع في الطول و العرض الداخلي عن الموديل اللي قبليه اللي كان معايا برضو سبحان الله و كنت بسافر 5 في العربية و الناس مستريحة , اعتقد دي اجابة علي سؤال حضرتك اللي هو "ابقي تعالي قول واسعة ولا لأ" طب مدام حضرتك شايف الكورولا ضيقة امال حضرتك هتقول ايه عن وسع الاسترا و الفوكاس !!! طبعا هتقول انهم اوسع بكتيير من الكورولا صح ؟ وياريت برضو تقولي رايك في الشنطة بتاعتهم .
و بالنسبة للمقارنة مع الفلوانس فهي اقل واحدة فيهم عشان مفيهاش عوامل امان اساسية زى ال esp و ال trc والفلوانس واخدة 4 نجوم فقط في عوامل الامان ال euroncap مقارنة ب 5 نجوم للكورولا .
بالنسبة للكورولا فهي تتفوق ان فيها 7 ايرباج مقابل 4 للاسترا و الفوكاس ده غير الاوتوبارك طبعا لو حضرتك تعرفه .
بالنسبة للستروين c5 هو حضرتك عايش في مصر ؟ و لو عايش في مصر شفتها كام مرة من ساعة منزلت في الشارع ؟ ولو شغتها ياترا صاحبها عامل ايه مع التوكيل ؟ و لو حب يبيعها ممكن يعمل ايه ؟
بالنسبة للارتفاع برضو معلومة حضرتك متعرفهاش من ال 20 مرة اللي شفت فيهم العربية و سالت عليها ان الكورولا في اسيا و اقصد بيها النسخ الخليجية و الروسية بتنزل بارتفاع اعلي 2 سم من اللي بتنزل فيه في مصر , يعني هما مخترعوش كل اللي عملوه انهم غيرو العفشة باللي بتنزل في الموديل ده اللي متجرب و معروف ابعاده و ثباته وده اجابة علي كلام حضرتك "متسق مع التصميم العام للسيارة لأن الإتزان و الكلام ده ما فيهوش هزار"
تقبل تحياتي و شكرا لسعة صدرك

المشاركة الأصلية كتبت بواسطة zangry

انا عندي الاوكتافيا ولما ركبت الكورولا لاقيتها واسعة جدا

احييك علي حيادية حضرتك