الموضوع: حسبي الله ونعم الوكيل في دايموند موتورز......... الرجاء النصيحة

السلام عليكم
العربية لانسر 2008 1600 سي سي عاملة 190،000
القصة بدأت إن العربية سخنت مني وجابت وش سلندر ، روحت للميكانيكي وعمل الوش وقالي اخدنا منه مسحة صغيرة وغير جوان وبس

المهم العربية اصبح ادائها سئ جدا جدا والميكانيكي ده كان في اسكندرية (محل ميلادي) ولكن سافرت بعد كده 6 اكتوبر حيث محل عملي، روحت للشرقاوي في اكتوبر اشتغل فيها كذا يوم واخد فلوس علي الفاضي ومعرفش يعمل حاجة نقدر نقول تحسنت بنسبة 5% مثلا

المهم استخرت ربنا ورحت دايموند (التوكيل) الكلام ده يوم 23\12\2013
قابلت اسوأ مهندس هناك اسمه ابراهيم (ساب التوكيل دلوقتي) قالي لازم نعمل اختبار كبس الموتور وكمان كبس دورة المياه
عمل الكبس وماتصلش بيا ،حاولت اكلمه رد بعد كذا مرة قالي اداء الموتور وحش وكل سلندر كبسه مختلف متراوح من 7 الي 11 والمفروض كله 14 ولازم نفتح الموتور علشان نشوف حنعمل ايه بس لو فتح ورفضت التصليح حدفع 1000 تمن الفك والتركيب و400 تمن الاختبار
قلتله بس لازم تديلي قيمة تقديرية قالي لو مش خنغير وش سلندر ولا عمود كرنك التكلفة في حدود 6000 الي 7000 المهم فك وقالي 12300 وحنغير طقم بستم وطقم شمبر وبيل وطقم كرنك وشوية حاجات تانية ومصنعية وحنعمل خصم 10% علي العمرة، قلتله مش انت قلت 7000 بالكتير قالي معلش ومتوقعتش وكلام من ده

سألت كذا حد بره قالولي العمرة اهم حاجة فيها الخراط وقطع الغيار ، قلت اعملها في التوكيل اضمن من بره واحسن من اني اخد مخاطرة موتور استعمال خارج وخاصة ان العمره علها ضمان 6 اشهر او 10000 كم
المهم قالي 10 ايام علشان حنجيبلك قطع الغيار مخصوص من اليابان وانا اللي حدفع تمن الDHL من ضمن التكلفة اعترضت علي النقطة دي بس ماعلينا
وهنا ابتدا السواد
اكلمه بعد 10 ايام ميردش افضل باليومين اتصل مايردش واروحله التوكيل مالاقيهوش ومحدش متابع غيره بعديها يرد ويقولي معلش الحاجة اتأخرت اسبوع كمان وهكذا شوية ما يردش وشوية اتأخرت
عملت شكوي في خدمة العملاء بالتفصيل قالولي 72 ساعة وحد حيتصل بيك ومحدش اتصل
عملت بتاع 6 شكاوي ولا حياة لمن تنادي روحت التوكيل لقيت ابراهيم سا ب التوكيل وده بعد شهر ونص تقريبا وقابلت مهندس البهاء وده مدير الصيانة في الفرع .
اعتذر اكثر من مرة وكان بيرد عليا كل مرة بإعتذار ومعلش المشكلة في المصنع وفاضل بستم واحد هو اللي لسا مستنينوه

المهم البستم اخيرا وصل 12\3\2014
قالي 3 ايام وكله حيبقي تمام
لكن النهارده مهندس عمرو بيكلمني بيقولي احنا جبنا الموتور من عند الخراط لكن للأسف طلع وش السلندر الlevel بتاعه قليل ولازم يتغير ، قلتله مش قيستوه في الاول ، قالي المقاس بتاعنا طلع مختلف عن مقاس الخراط ولما جربناه لقيناه مش نافع
طبعا انا اتجننت قولتله هو انا بتعامل معاكم ولا مع الخراط اتنوا اللي تدفعوا تمنه مليش فيه او ترجعولي العربية زي ما كانت
قال اصل المهندس ابراهيم وهو اللي قاس، ده جنني زيادة وقلتله وانا مالي هو كان شغال معاكوا
قالي عندي حلين ممكن نجيب وش استعمال خارج في حدود 2000 (الاصلي ب 7000)
او نعمل مليء للوش القديم وهو لا يرجح الفكرة دي
المهم قافلنا وانا متنرفز وبقوله اتصرف انا مش حدفع فلوس زياده وحجيب ميكانيكي وقت الاستلام يتأكد من الوش ده

علي فكره انا في ايميل لمتسوبيشي اليابان لقيته وبعتله في الاول قالي تواصل مع المسؤلين في مصر احنا فيما معناه مش معنيين بالموضوع ده

دلوقتي انا عايز نصيحتكم اعمل ايه واخد حقي ازاي من التوكيل الزباله اللي ما شفتش زيه في حياتي
ونصيحة لوجة الله ابعدوا عن التوكيل ده
اسعار زباله
خدمة عملاء في الارض
تخبط اداري (المهندسين بيتخانقوا مع بعض امام العملاء وما فيش حاكم ليهم)
وعلي فكرة مش هو ده العادي في توكيلات زي توكيل رينو قمة في الاحترام

ملحوظة وكمان العمال معندهومش امانة غالبا
علشان لما سلمت العربية ماخدتش محضر التسليم علشان كنت مستعجل
لكن لما الموضوع اتأخر روحت اخد المحضر علشان اضمن حقي لو حصل مشاكل ، لقيت ابراهيم معملهوش اصلا وكان مشي نزلت مع مهندس عمرو عشان نعمل تقرير لقيت كف المرايا الشمال متاخد من العربية وهو مصر انه يكتب في المحضر ان الكف مش موجود يعني كمان حراميه


رجاء الرد العمل ايه واشتكيهم ازاي، علشان حروحلهم الصبح

ربنا يعوض عليك ..... قدر الله و ما شاء الله فعل ....

انا ليا بعض الملاحظات على كلام حضرتك ....

- 6 اكتوبر مفيش فيها ميكانيكى محترف ..... كلهم هواه و على اد حالهم
- انا كنت معتقد زى حضرتك كدة ..... ان التوكيل افضل ناس تعمل عمرة .... اكتشفت ان التوكيلات مبتحبش تعمل الحاجات دى ... و سياستهم فى التغيير .... الميكانيكية بتوع زمان افضل ناس تعمل الحاجات دى
- احد ميزات اللانسر انها منتشرة .... و قطع الغيار موجودة استيراد و جديد و تقليد و كورى و يبانى .... فلما حد يقولك حجيبلك حاجاتها من برة .... ترد و تقوله .. انا ابيعها احسن !!!!!

اعذرنى ... انا متغاظ جدا من الى عملوا التوكيل مع حضرتك ..... الله يكون فى عونك
اقتراحات بسيطة للعلاج ان شاء الله

اولا ... حضرتك تحاول تاخد عربيتك منهم .. بأى شكل .... و طبعا تحاول تشتكيهم فى حقوق المستهلك و تتخانق معاهم خناقة محترمة ... بعد ما تلم عربيتك

ثانيا ..... انا ارشح لحضرتك 2 ميكانيكية .... كويسن جدا.
1- عم حمدى الفنى .... انسان محترم جدا و معلم ... و ده زميلنا هنا فى المنتدى
2- همام ... و ده ميكانيكى فى صقر قريش بيشتغل فى الميتسوبيشى بس

و اكيد فيه ميكانيكية غيرهم كويسين .. حضرتك تروحلهم علشان ترجع عربيتك زى الاول ان شاء الله