إلى أى مدى كان لفخامة الفلوانس دور فى تنفيذ قرارك بالشراء؟

**Hany Saad** · 22-03-2014 02:00 PM

المشاركة الأصلية كتبت بواسطة برنس الليالي

استاذ Meggieboy هو حضرتك اللي عديت من يومين كدا من قدام شركة كابو في الحضرة ولا مش انت دا ؟ :) :) اصلها كانت سودا وهايلاين بردو :)

- انا عندي سؤال واقف في زوري بقالي شهر عايز اسئله وخايف من الاجابات الانحياذية.. نفسي في اجابة تكون ضغري
صوت الموتور يا شباب ... صوت الموتور بيظهر من الـ100 فعلاً وبيوضح جامد ع الـ120 من غير كبس؟ بيأثر على ارتياح السائق على الطرق الطويلة ؟

برنس بيه....أنا بعدى كتير من عند كوبرى الإراهيمية و ممكن عزبة سعد لأنى ببقى داخل سموحة....مش عارف هل ده أنا و لا لأ....أنا ملاكى القاهرة على فكرة...فهتلاقينى مميز فى أسكندرية.....

باشا بكل أمانة و بدون أى إنحياز صوت الموتور كان عالى أول ما أستلمت و كنت بلاحظه فى الجراج عندى أول ما أدور الصبح و بعدين نصف الدقيقة تسخن شوية و صوت الموتور يبقى لوز العنب
دلوقتى أنا داخل على 3000 كيلو و حتى الصوت العالى بتاع الصبح بقى كويس جداً....طبعاً بما أنه على كتينة جنزير فهو بالكبيعى أعلى من المواتير اللى على كاتينة كاوتش

نيجى بقى للمشى و السحب و الكلام ده ملهوش أى علاقة بالسرعة خالص و اللى يقولك بعد ال 100 أسمحلى يبقى مسقش العربية و مش فاهم فيها أو الأتنين و بيقول أى حماده بالجنزبيل....

خد من أخوك الخلاصة و الكلام ده فى كل العربيات ال CVT سواء هوندا-نيسان -تويوتا - سوبارو-أى عربية طالما فيها CVTهتحس بالأتى:

- صوت عالى طالما بتكبس و لو حتى على سرعة 40 مش 100 وده ضريبة ال CVT
- مفيش صوت للموتور خالص و بقول خالص طالما العربية واخدة سرعتها و الكلام ده أنا مجربه بنفسى لحد 150 كم/ساعة و ممكن أكتر بس أنا مجربتش فوق كده

قولى ليه؟
أقولك أنا بأه: ال CVT على سرعة 140 كم/ساعة بيخلى الRPM عند 2000 لفة....متخيل الكلام ده....هل تتخيل تسمع صوت موتور عند 2000 لفة....ولا الهوا و لا كأن العربية دايرة أصلا و الصوت لوز العنب

-دوس بأه كده كبسه حلوة...يعنى واحدة kick down كده و أنت تسمع صوت يزعلك و نعره لأن الRPM لغاية 4000 و 5000 و يمكن فوق كمان حسب كبستك للدواسة....هى لحظات الموتور يجمع السرعة المطلوبة منه و ال CVT يظبط نسب تعشيقة على السرعة الجديدة و تلاقى الموتور لوز العنب....مفيش صوت و مرتاح و 100 فل و 14
-طيب إزاى بقى نلافى صوت النعرة دى قى القرص؟
الحل: أكبس و سيب الCVT يعدل نسبه و بعدين أكبس تانى....يبقى لوز العنب و الصوت مقبول
أما لو كبست كبسة طريق اللى يروح ما يرجعش يبقى هتسمع صوت موتور بتحرق عليه على الأول....و الكلام ده فى أى عربية CVT

الكلام ده من الأخر.....

**برنس الليالي** · 22-03-2014 03:14 PM

الله يباركلك يا برنس ... يعني طلاما ماشي طبيعي مافيش كلام مندا

**heeshooheeshoo** · 22-03-2014 04:53 PM

أخى المحترمMeggieboy
أكاد أجزم وبدون إدعاء أننى أستطيع أن أرى ملامح العشق إن لم يكن الهوس الفرنسى French Mania يطل من بين سطور موضوعك -الجميل الشيق- والتى كان ينقصها فقط تحدثك عن العطر الفرنسى الرقيق الذى يتسلل إلى أنفك بمجرد فتحك لباب السيارة وجلوسك فيها من باب الحب والترحيب بك بينما ينساب إلى أسماعك صوت الموسيقى الفرنسية الناعمة من خلال أغنية عاطفية للرقيقة "مارى ماتيو"
ههههههههه .. هذا ما أكاد أشعر به من موضوعاتك السابقة وسطور هذا الموضوع

المشاركة الأصلية كتبت بواسطة Meggieboy

فخامة الفلوانس فيس ليفت لافتة و لا تخطئها العين، ساهم فى ذلك طول قاعدة عجلاتها و الزوائد الجنابية فى الرفارف....من الداخل و مع الأنوار الهادئة و فخامة الصالون، خامات الفرش الداخلى التى تحسها بيدك و شكل المفاتيح، كل هذا أعطى نوع من الفخامة الفرنسية المميزة يشعر و يحس بيها ليس مالك السيارة فقط و لكن كل ضيوفه أيضاً

المشاركة الأصلية كتبت بواسطة Meggieboy

طبعاً الشامبين أو الدهبى عليها و كأنك من باريس رأساً و سايق فى الشانزليزيه

ألم أقل لك أنك عاشق ولهان ؟
كلماتك تفضح هذا الهوس الفرنسى وبروفايلك أيضا "كليو - ميجان - فلوانس"

وأنا أيضا .. وجذور هذا الهوس عندى تمتد فى الماضى السحيق بدءاً من عشقى لأفلام ألان ديلون وجان بول بلموندو وبرجيت باردو ثم أغانى الرقيقة مارى ماتيو وداليدا وصوت الأكورديون والهارمونيكا إلى أن سعدت بسيارتى الستروين AX الحمراء موديل 95 والتى لم تستطع النيسان أن تنسينى أيامها الحلوة
وبالمناسبة .. لا أعلم مدى الإرتباط ما بين النيسان صنى "old shape" والفلوانس ؟ فكما ذكر الأخ المحترمmicegكثير من مالكى النيسان صنى تحولوا إلى رينو فلوانس !!
وأنا متأكد من أننى فى الخطوة التالية لنيسان سيكون إختيارى للوجيهة الفخمة الرقيقة "فلوانس" التى أسرتنى من أول نظرة لها فى معرض فورميولا 2010 إلا أننى لم أستطع تدبير مهرها فى ذلك الوقت فإرتبطت بنيسان بينما عينى عليها حتى الآن
وفى رأيى أن لكل لون منها حكاية إلا أننى متحير مابين الأوف وايت أو كما يسمونهMory، والــ Stone أو مايسمونه خطأ بالشامبين ، واللون الموكا ، وأعتقد أن إختيارى لن يخرج عن تلك الألوان
أحييك على هذا الموضوع الجديد والمبتكر

وتقبل تحياتى ،،،

**heeshooheeshoo** · 22-03-2014 05:33 PM

المشاركة الأصلية كتبت بواسطة meggieboy

مشكور خالد بيك على مشاركتك لينا قصتك الشيقة لأختيارك عربيتك الجميلة ربنا يباركلك فيها يا رب....

حابب أعلق تعليق بسيط و مش عارف هتشاركونى الرأى و لا لأ.....

الأحساس ده حسيته من ساعة ما جيبت الميجان و حتى الأن مع الفلوانس....بحس أن فيه قصة غرامية بينى و بينها....مش بس عربية بركبها و بتودينى مشوارى و مريحة و كده...لأ الموضوع بيدخل لمرحلة أعمق...أنا أحدثها من داخلى....لما أجى أشد بأقولها يالا بينا....لما بوصل من مشوار سفر بطبطب بأيدى على الدريكسيون و أشكرها أنها كانت أمينة على، مثيرة، ممتعة، رشيقة، مسلية معى طول الرحلة.....

بحبها دائماً متأنقة و فى أبها صورها، و كأنى نازل مع حبيبتى فى سهرة سعيدة.....الفلوانس مش عربية بنركبها.....الفلوانس قصة عشق.....

مش قلت لك ؟
أنا نظرتى ماتخيبش أبددددا
عاشق ولهاااان .. والقلب له أحكام

أنا شخصيا أؤمن تماما أن السيارات زى الستات
يعنى ممكن الواحد يتقدم لواحدة بطريقة الصالونات (أو البروشور) .. زى مابيقولوا زمان .. يعنى مواصفات وأخلاق ودين وأهل وحسب ونسب وتقعد تحسبها بالورقة والقلم وفى الآخر ممكن تشوفها ماتحسش بحاجة بتنغبش فى قلبك
وممكن واحدة تخطف قلبك من أول نظرة بغض النظر عن مواصفاتها .. وياسلام لوكانت برضه بنت حلال ودين وأصل وفصل وأخلاق .. تبقى ساعتها الست الوالدة داعية لك

بالنسبة لى شخصيا لو بالورقة والقلم تبقى تويوتا كرولا
إنما بالقلب تبقى فلوانس .. الفرنسية الجميلة ومن حظى إنها طلعت برضه ماتتعيبش .. مال وجمال

هى مسألة كيمياء وإحنا كيميتنا متضبطة مع الفرنسيات الجميلات

ربنا يحفظك ويبارك لك فيها

وتقبل تحياتى ،،،

**Hany Saad** · 22-03-2014 05:52 PM

المشاركة الأصلية كتبت بواسطة heeshooheeshoo

مش قلت لك ؟
أنا نظرتى ماتخيبش أبددددا
عاشق ولهاااان .. والقلب له أحكام

أنا شخصيا أؤمن تماما أن السيارات زى الستات
يعنى ممكن الواحد يتقدم لواحدة بطريقة الصالونات (أو البروشور) .. زى مابيقولوا زمان .. يعنى مواصفات وأخلاق ودين وأهل وحسب ونسب وتقعد تحسبها بالورقة والقلم وفى الآخر ممكن تشوفها ماتحسش بحاجة بتنغبش فى قلبك
وممكن واحدة تخطف قلبك من أول نظرة بغض النظر عن مواصفاتها .. وياسلام لوكانت برضه بنت حلال ودين وأصل وفصل وأخلاق .. تبقى ساعتها الست الوالدة داعية لك

بالنسبة لى شخصيا لو بالورقة والقلم تبقى تويوتا كرولا
إنما بالقلب تبقى فلوانس .. الفرنسية الجميلة ومن حظى إنها طلعت برضه ماتتعيبش .. مال وجمال

هى مسألة كيمياء وإحنا كيميتنا متضبطة مع الفرنسيات الجميلات

ربنا يحفظك ويبارك لك فيها

وتقبل تحياتى ،،،

هشام باشا و أتمنى أن يكون الأسم مظبوط.....تفضح العيون كل عاشق ولهان....
فعلاً يا كبير أنا عاشق قديم للسحر الفرنسي ، و فعلاً عربياتى (حالياً الكليو و الفلوانس) ليهم محبة خاصة فى قلبى و يوجد harmony او كيميا ما بينى و ما بينهم.....
الجمال و الأناقة و العطر الفرنسى أشياء لا يمكن لأى عاشق للجمال أن ينكرهم، فعلاً ريحة عربيتى مميزة و بحبها دايماً مشدودة و نظيفة و أنيقة.....أحب ان نخرج سوياً و هى فى أبهى أناقتها...شياكتها من شياكتى
أنا كمان بقالى ١٨ سنة شغال فى شركة فرنساوى و سافرت فرنسا أكثر من مرة أخرها الصيف الماضى....أعتقد ده كان له تاثير كبير على....أتعودت أتأمل فى تفاصيل كل شىء و أستمتع بيه....
أشكرك جداً من أجل كلامتك الرقيقة و أن شاء الله نبارك لحضرتك قريباً بجميلة الجميلات..
تقبل خالص تحياتى

**ahmedelfeky** · 22-03-2014 08:48 PM

[QUOTE=Meggieboy;3875481480]أهو عمالين بنجدد فى المواضيع علشان نكسر الملل شوية.....

فخامة الفلوانس فيس ليفت لافتة و لا تخطئها العين، ساهم فى ذلك طول قاعدة عجلاتها و الزوائد الجنابية فى الرفارف....من الداخل و مع الأنوار الهادئة و فخامة الصالون، خامات الفرش الداخلى التى تحسها بيدك و شكل المفاتيح، كل هذا أعطى نوع من الفخامة الفرنسية المميزة يشعر و يحس بيها ليس مالك السيارة فقط و لكن كل ضيوفه أيضاً....

هي الفخامه التي لاتخطئها العين دي بسببها كل واحد فينا هتلاقي حاجه حصلت معاه في العربيه حتي ولو خربوش صغير عمال يجي في دماغه كل شويه ومزهقه

أنا بالنسبه لي كانت حسبه سهله لابعد الحدود انا بحب العربيات الالماني لانها اعلي جوده موجوده لكني عدلت عن شراء اي من المعروض منها لاسباب

1-تكلفه التشغيل عاليه صيانات العربيه ولو لاقدر الله في اي حاجه
2-انا مش ناوي اقعد بالعربيه 10 سنين 5 ان شاء الله وابيع ....مفهوم عربيه العمر ده مش مطروح في تفكيري
3-نظم التعليق والعفشه في العربيات الالماني مكلكعه ومليانه مقصات وشدادات عشان حضرتك تاخد الملفات علي 170 وتقول ثبات الالماني وده طبعا عيب خطير مش ميزه لانه هيجرأ الواحد في السواقه ومش عندنا الطرق اللي معموله عشانها العربيات دي وكل شهر هقعد اغير في اجزاء في العفشه واسمع اصوات وانا محسوك اساسا فكانت هتبقي معاناه كبيره بالنسبه للطرق المنيله بتاعتنا.
4-اغلبها عربيات واطيه عشان الثبات الواو بتاعهم جيتا وبي ام مثلا حتحك حك السنين في المطبات وما اكثرها في طرقنا.

اسباب اختياري للفلوانس :

1-أخويا كان اول واحد ربنا يخليه يلفت نظري ليها ده مش بس كده انا كنت هشتري الشكل القديم وماكنتش متحمس للعربيه بصراحه ومش عارف ان في شكل جديد هينزل هو اللي قالي وطبعا مشاركاتك يا هاني بيه وشرحك للفروق بين الاتنين خلاني اقعد 3 شهور احلم بالعربيه ويوم استلامها وكانوا 3 شهور سواد احلام كلها ب ال CVT والعدادات الديجيتال والهيصه دي.
2-اول ماوقعت عيني عليها في اتوماك 2013 شهر يناير وكانت معروضه باللون الفضي قولت هي دي ومفيش غيرها وحجزتها فورا في المعرض وماتفرجتش علي اي عربيه تانيه حاجه كده حب من اول نظره.
3-عربيه عاليه عن الارض مفيش مطبات باخدها بالجنب نهائياو هو مقص واحد قدام وتورشن بيم ورا يعني تكلفه صيانه العفشه هتبقي حنينه.
4-التوكيل وسمعته الحلوه انا حاليا اعرف كل الناس في فرع العبور وكلهم قمه في الاحترام.
5-ان العربيه مش منتشره فححس ان معايا حاجه مميزه.
6-اكيد قبل اي شيئ انها كانت ولازالت best value for money للفئه دي ولو رجع بيا الزمان هشتريها تاني وتالت.
7-انا بطبعي بحب ال Electronics واقلب واغير اوبشنز وكده..... تقريبا بعد استلام العربيه باسبوع مفيش خرم ابره معرفوش فيها الا ام البكره اللي مدوخانا دي هو انا عارف ال scroll استخدامه ايه انما لما اضغط عليها للداخل ناحيه دراع التحكم فايدته ايه ده اللي مجنني واغلب الظن انها مالهاش وظيفه حاليا الا اما اعمل ابديت للسوفت وير بتاع الكاسيت لان الخواجه مش هيحطها من غير لازمه.

**Hany Saad** · 22-03-2014 09:04 PM

[QUOTE=ahmedelfeky;3875482480]

المشاركة الأصلية كتبت بواسطة Meggieboy

أهو عمالين بنجدد فى المواضيع علشان نكسر الملل شوية.....

فخامة الفلوانس فيس ليفت لافتة و لا تخطئها العين، ساهم فى ذلك طول قاعدة عجلاتها و الزوائد الجنابية فى الرفارف....من الداخل و مع الأنوار الهادئة و فخامة الصالون، خامات الفرش الداخلى التى تحسها بيدك و شكل المفاتيح، كل هذا أعطى نوع من الفخامة الفرنسية المميزة يشعر و يحس بيها ليس مالك السيارة فقط و لكن كل ضيوفه أيضاً....

هي الفخامه التي لاتخطئها العين دي بسببها كل واحد فينا هتلاقي حاجه حصلت معاه في العربيه حتي ولو خربوش صغير عمال يجي في دماغه كل شويه ومزهقه

أحمد باشا الكبير...أولاً مشكور على مروركم الكريم و دايماً منورنا
تصدق بمناسبة موضوع الفخامة و العين ده أنا لسه بايس باب الجراج ببوظ العربية علشان كنت بعدى واحد...يالله الحمدلله على كل شىء و كل اللى يجى فى الريش بقشيش.....
أنا برده كنت زيك كده فى أختيارى للفلوانس و موضوع التوكيل ده كان مهم قوى بالنسبة لى
بالنسبة لموضوع الscroll و ال ok انا برده هفضل وراه لغاية لما أوصل لحل
خالص تحياتى يا كبير

**Hany Saad** · 22-03-2014 09:52 PM

المشاركة الأصلية كتبت بواسطة mrashadnt

والله يا باشمهندس / هاني مش عارفين نشكرك ازاي على مواضيعك الشيقة الجميلة دي ويمكن حضرتك كنت من الأسباب الرئيسية لاختياري الفلوانس بمواضيعك المميزة وتحليلك الممتع لمميزات وعيوب السيارة .... أنا كان معايا شيفروليه لانوس موديل 2009 ودي كانت أول عربية أركبها وجيت تقريبا شهر 9 سنة 2013 كنت خلاص تقريبا قررت اني أغير عربيتي على أول سنة 2014 وكانت الفلوانس خارج اختياراتي تماما لعدة أسباب أولهم : سعر العربية اللي فوق امكانياتي بصراحة - ثانيا ان واحد صاحبي قاللي انها ضيقة جدا من الداخل وواحد تاني قاللي ان فيها مشاكل كتير - علشان كده كان حلم حياتي الصراحة اني أركب سيراتو الجديدة لكن وبما اني مدير مبيعات فبدأت التفكير بشكل عملي وعمل زيارة لتوكيلات كتير جدا وركبت السيراتو - الكارينز - الكورولا - السيتروين c4 - السيات ليون - وأخيرا الفلوانس ... مش عاوز أوصف أد ايه الانبهار اللي حسيته لما ركبت الفلوانس رغم أن ممكن بعض العربيات التانية تحس أنها نوعا ما أحسن شوية في الشكل من الفلوانس .... المهم رحت على فرع رينو في أبو رواش وجربت العربية وصممت اني أشتري العربية دي ورحت دفعت فعلا مقدم حجز أواخر شهر 1 اللي فات للفئة e3 s لكن قابلتني مشكلة كبيرة وهي ان مراتي لما شافت العربية في الصور قالتلي لأ شكلها مش حلو وحاولت أقنعها بشتى الطرق لكن كل المحاولات فشلت . المهم كنا في مشوار مع بعض أنا وهي وكنا معديين على رينو مصر الجديدة قلت لمراتي تعالي معايا ننزل نلغي الحجز ( بصراحة دي كانت حجة بس علشان ترضى تنزل معايا ) ودخلنا المعرض وأول ما مراتي شافت العربية نفس الانبهار اللي حصلي بالظبط حصلها ولقيتها بتقولي هو انت المفروض تستلم امتى قولت لها ده أنا هلغي الحجز قالت لي لأ أنا ما كنتش متخيلة العربية حلوة بالشكل ده .... وعليها فضلت مستني وأنا على نار وبتابع من المنتدى كل أخبار الفلوانس من الأعضاء الكرام لحد ما ريتو كلموني يوم الخميس وقالولي العروسة جاهزة ومستنياك والمفروض ان شاء الله اني هستلم الأسبوع ده بعد ما يجهزوا لي ورق الترخيص ... ادعوا لي ربنا يبارك لي فيها ويكفيني شرها

الله يخليك يا فندم و أشكرك على كلماتك الرقيقة المشجعة...أن شاء الله أكون أفدتك و مضرتكش و تستلم أن شاء الله على خير و تكون بركة ليك و لأسرتك...أن شاء الله الفلوانس تبيض وشنا مع حضرتك.....
أختيار موفقك و تستلم على خير و تحت أمرك فى أى إستفسار
تحياتى لشخصكم الكريم

-

الموضوع: إلى أى مدى كان لفخامة الفلوانس دور فى تنفيذ قرارك بالشراء؟

LinkBack

أدوات الموضوع

عرض

-

-

-

-

-

-

المواضيع المتشابهه

مطلوب سياره bmw 325 e30 كابوليه...جاد جدا بالشراء

مطلوب سياره bmw 325 e30 كابوليه...جاد جدا بالشراء

نصيحة لكل من يرغب بالشراء من التوكيل

لو رجع بيك الزمن هايبقى قرارك ايه

الكلمات الدلالية لهذا الموضوع

المفضلات

المفضلات

ضوابط المشاركة