الموضوع: إلى أى مدى كان لفخامة الفلوانس دور فى تنفيذ قرارك بالشراء؟

انا بقى عاشق لكل ما هو فرنساوى .. مش فى العربيات و بس .. لكن فى كل حاجة كمان
و زى ما بيقولوا مفيش زى الركوبة الفرنساوى :)
انا كان عندى لوجان 2012 فول مانيوال و لسه بايعها من شهر كانت بشوكها عاملة 11 الف كيلو اللى اخدها كاسبها والله و بعتها عشان انا مش موجود فى مصر و فضلت مرفوعة .. حسيت ان كده عمرها بيقصر روحت بايعها

انا قاعد فى دولة من دول الخليج ... هنا بقى فكرت فى اول عربية فلونس ... منزلين شكل جديد برضه بس مش نفس الشكل اللى نزل مصر (الشكل بتاع مصر احلى بصراحة ) فضلت فترة مقتنع بيها لحد لما روحت توكيل بيجو و ركبت ال508 ايه ده !! حسيت انها حاجة تانية خالص .. قولت خلاص ادوس فيها بس حصل شوية مشاكل بالنسبة لسعر القسط و البنك و شوية حجات كده ,, بعدها روحت توكيل فورد اشوف الوكس .. عربية ظريفة بس ضيقة بس من جوة تحفة شبابى جددا مش فخمة بس فيها شغل و لعب كتير .. و بعدين رجعت فى كلامى معرفش ليه و لقيتنى رايح للفلونس تانى بقفكر فى الاسود او الفرانى الغامق ان شاء الله .. المشكلة انك هنا ممكن تبقى مكسوف وانت راكب الفلونس ههههههههه مش الفلونس بس اى عربية مش 4X4 طبعا ما عدا البي ام و الاودى و البورش و الليكزس و بينتلى والكاديلك و الماركات اللى انتم عارفنها ديه

العربية عجبانى جداا بس البيجو 508 مش عايزة تطلع من دماغى عشان عايز ابقى انزلها مصر

المشاركة الأصلية كتبت بواسطة mrashadnt

والله يا باشمهندس / هاني مش عارفين نشكرك ازاي على مواضيعك الشيقة الجميلة دي ويمكن حضرتك كنت من الأسباب الرئيسية لاختياري الفلوانس بمواضيعك المميزة وتحليلك الممتع لمميزات وعيوب السيارة .... أنا كان معايا شيفروليه لانوس موديل 2009 ودي كانت أول عربية أركبها وجيت تقريبا شهر 9 سنة 2013 كنت خلاص تقريبا قررت اني أغير عربيتي على أول سنة 2014 وكانت الفلوانس خارج اختياراتي تماما لعدة أسباب أولهم : سعر العربية اللي فوق امكانياتي بصراحة - ثانيا ان واحد صاحبي قاللي انها ضيقة جدا من الداخل وواحد تاني قاللي ان فيها مشاكل كتير - علشان كده كان حلم حياتي الصراحة اني أركب سيراتو الجديدة لكن وبما اني مدير مبيعات فبدأت التفكير بشكل عملي وعمل زيارة لتوكيلات كتير جدا وركبت السيراتو - الكارينز - الكورولا - السيتروين c4 - السيات ليون - وأخيرا الفلوانس ... مش عاوز أوصف أد ايه الانبهار اللي حسيته لما ركبت الفلوانس رغم أن ممكن بعض العربيات التانية تحس أنها نوعا ما أحسن شوية في الشكل من الفلوانس .... المهم رحت على فرع رينو في أبو رواش وجربت العربية وصممت اني أشتري العربية دي ورحت دفعت فعلا مقدم حجز أواخر شهر 1 اللي فات للفئة e3 s لكن قابلتني مشكلة كبيرة وهي ان مراتي لما شافت العربية في الصور قالتلي لأ شكلها مش حلو وحاولت أقنعها بشتى الطرق لكن كل المحاولات فشلت . المهم كنا في مشوار مع بعض أنا وهي وكنا معديين على رينو مصر الجديدة قلت لمراتي تعالي معايا ننزل نلغي الحجز ( بصراحة دي كانت حجة بس علشان ترضى تنزل معايا ) ودخلنا المعرض وأول ما مراتي شافت العربية نفس الانبهار اللي حصلي بالظبط حصلها ولقيتها بتقولي هو انت المفروض تستلم امتى قولت لها ده أنا هلغي الحجز قالت لي لأ أنا ما كنتش متخيلة العربية حلوة بالشكل ده .... وعليها فضلت مستني وأنا على نار وبتابع من المنتدى كل أخبار الفلوانس من الأعضاء الكرام لحد ما ريتو كلموني يوم الخميس وقالولي العروسة جاهزة ومستنياك والمفروض ان شاء الله اني هستلم الأسبوع ده بعد ما يجهزوا لي ورق الترخيص ... ادعوا لي ربنا يبارك لي فيها ويكفيني شرها

إختيار موفق بإذن الله .. ربنا يحفظك من كل شر ويبارك لك ويجعلها قدم خير
اللهم آمييين

وتقبل تحياتى ،،،