الموضوع: إلى أى مدى كان لفخامة الفلوانس دور فى تنفيذ قرارك بالشراء؟

المشاركة الأصلية كتبت بواسطة miceg

أخونا الفاضل أستاذ هاني
بتدهشنا بمواضيعك وبتحسسنا بكل كلمة وبتيجي على جرحنا حين حديثك عن معشوقة الجماهير
وبتنشط القسم في حال خموده زي ألايام دي
جزاك الله عنا خير الجزاء
القصة مع الفلوانس كالاتي
كان معايا نيسان صني اوتو موديل 2010
والعربية كانت كافية جدااااااااا خاصة ان إستخدامي ليها غالبا كنت ببقا لوحدي لاأن زوجتي وابنتي كانو في صعيد مصر وتحديدا أسيوط وكنت بتردد عليهم مرة كل 3 أسابيع أو كل شهر من القاهرة الى أسيوط
لكن تأتي الرياح بما لاتشتهي السفن
من خلال إدماني بهذا المنتدى وأقسامه
جاءت فكرة التغيير لعربية أخرى
وخاصة إني من هواه العربيات المستعمله وليست الزيرو
فكرت في الرائعه هوندا سيفيك وفولكس جيتا فيما قبل ال dsg مرورا بجميع أقسام المنتىدى
ثم تمضي ألايام و أفكر في أول ساحرة فرنسية ستروين سي إليزيه واختها بيجو 301
ومن ثم يأتي كلام الخبراء وهو انك في حالة تغيير الصني إلى تلك إحدى السيارتين مش هتحس بالنقلة .
إلى أن يأتي الجيل الجديد من تويوتااااا كورولا 2014
تابعت السيارة دي بلهفة شديدة ومواضيعها وأخبارها وفيديوهاتها
إلى أن علمت بإن في منافس شرس تدعى فلوانس فيس ليفت
أهتممت بالموضوع أكثر وجدت مقارنات حادة بين تلك السيارتين
الى ان تم المعاينة على أرض الواقع وتحديدااااا معرض سمير ريان
ومن كثرة المقارنة بين الفلوانس والكورولا كانو موجودين جنبا إلى جنب أمام المعرض
قعدت ساعه ونصف أتمعن في كل سيارة شوية
الجلوس في الفلوانس من أول وهلة أعطاني إحساس مش عارف أوصفه لغايت دلوقتي
عكس الجلوس في الكورولا
لكن لن تسحرني الفلوانس في شكلها الخارجي بشكل كبير وكانت المعروضة هناك لون شامبين تقريبا أو برونزي
إلى أن جاءت الحيرة ونزلت معرض رينو محمد زكي انا والأسرة :d
وكانت المعروضة هناك اللون الاوف وايت
وشعور غريب عبارة عن سرعة دقات قلبي لفخامة هذا اللون وطول العربية الملفت الذي يجعلها في فئة أكبر من فئتها
وهنا أخدت قرار الشراء إلى أن دخلت في حيرة أخرى لتلك الساحرة
وهي مرحلة إختيار اللون مرورا باللون الفضي -الاوف وايت - ال oyster gray - الموكااا
الموكا معرفتش أشوفه في أي مكان الا في فيديوهات أجنبية
وفعلا مكدبتش خبر فهو يجمع بين الشياكة والفخامة وجذب إلانتباه وكلمت المعرض وقولتله عاوز الفئة الهاي لاين لون موكااااااااا
وقاللي مش متوفرة ولازم حجز مسبق
ولكنها متوفرة الفئة e3s الى أن تسرعت وقولت الايرباجز الخلفية ليست مهمه نظرا لإن معظم سفري يتضمن الكرسين الاماميين فقط
الفرش الجلد قولت هعمل أخوه في جينز كار - الزينون قولت هجيب واحد من التوكيل مع اني عارف ان الاستوك حمادة تاني خالص
حجزت واستلمت السيارة الموكا وزاد إعجابي أكثر وأكثر
وتم الخروج في نفس اليوم وتجربة السيارة ليلا على محو المشير طنطاوي
وتشغيل الاضاءات داخل الانتريور وبداية المتعة الحقيقية
متفق معك جداااااااا ان السيارة توحي بشخصية صاحبها والدليل ان معانا زملاء ملاك الفلوانس وكان معاهم الصني قبل كده ----
فوجه الاتفاق بين السيارتين هو الكلاسيكية مع أخذ الاعتبار التغيرات الشبابية في الفيس ليفت
ثاني وجه تشابه هو شركة نيسان وإعتبارها رمز للإعتمادية
خلى الكثير يكملو في نفس المدرسة اليابانية بإمتلاك سيارة يابانية بتقفيل وأوبشنز أوروبي

كفاية كده وطولت عليكم لاني ممكن اكتب صفح عن العاشقة الملهمه فلوانس

مشكور خالد بيك على مشاركتك لينا قصتك الشيقة لأختيارك عربيتك الجميلة ربنا يباركلك فيها يا رب....

حابب أعلق تعليق بسيط و مش عارف هتشاركونى الرأى و لا لأ.....

الأحساس ده حسيته من ساعة ما جيبت الميجان و حتى الأن مع الفلوانس....بحس أن فيه قصة غرامية بينى و بينها....مش بس عربية بركبها و بتودينى مشوارى و مريحة و كده...لأ الموضوع بيدخل لمرحلة أعمق...أنا أحدثها من داخلى....لما أجى أشد بأقولها يالا بينا....لما بوصل من مشوار سفر بطبطب بأيدى على الدريكسيون و أشكرها أنها كانت أمينة على، مثيرة، ممتعة، رشيقة، مسلية معى طول الرحلة.....

بحبها دائماً متأنقة و فى أبها صورها، و كأنى نازل مع حبيبتى فى سهرة سعيدة.....الفلوانس مش عربية بنركبها.....الفلوانس قصة عشق.....