تقييم اللوجان بعد 1000 كيلو

**Mohamed.Ramah** · 27-05-2009 11:42 PM

انا ليا نفس الاستفسار بردة لان فى ناس كانت بتشتكى ساعات من الدواسات او الصوت او من الفتيس بتاع العربية ارجو ا منكم توضيح المعلومة

**abohalmos** · 28-05-2009 01:26 PM

معلش يا اخ ALF- WE
لو فيها تعب .......برضه اخبار التكييف معاك ايه خصوصا زى مانت عارف جو الصعيد اليومين دول
ظريف جدا ....يعنى اخباره برضه على السحب و لما تكون العربية مليانة و كده ؟؟؟؟؟؟؟
و برضه كونت عاوز اعرف عملت كام كيلو بيها لحد دلوقتى و اخبار الاداء بتاعها ايه ؟؟؟
وانا عارف انها ابتديت تنتشر فى الاقصر ....ليا واحد صاحبى له شغل هناك ....قاللى كده
واخيرا معلش لو تقلت عليك يا بلدياتى
و طبعا لو انت بتنزل قنا......لازم تقولى عشان نعمل معاك واجب ان شاء الله ..:k32:

**alfa_we** · 28-05-2009 10:42 PM

والله منور يا دكتور ابو حلموس
بص هى ليها توكيل ومركز صيانة
ناس كويسة جدا ومحترمين جدا فى التعامل مع العملاء
التكيف بتاع العربية كويس اوى
بالنسبة للسحب مع تشغيل التكييف بيقل شوية مع بداية السحب بس وانت ماشى على طريق سريع مثلا مش هاتحس بفرق انا جبت 170 والتكيف كان شغال والعربية فيها 4 افراد
عملت بالعربية لحد دلوقتى حوالى 14.500 كيلو والحمد لله ماشية وزى الفل
بس مشكلة صوت الكركرة ودا مش عندى بس على فكرة فى اكتر من عضو اتكلم على الموضوع دا

على فكرة انت كدة تقلت عليا اوى مش هاقدر استحمل بعد كدة يعنى لو عندك اى استفسار تانى هارد عليك لانى مقدرش اعمل غير كدة
ومرة تانى منور لو عايز تنزل الاقصر وتتفرج على العربية وتجربها انا تحت امرك
وان شاء الله تيجى فرصة وانزلك قنا عشان تعمل معايا الواجب زى مانت بتقول ولا دى عزومة مركبية ؟

**abohalmos** · 29-05-2009 12:29 AM

الف الف شكر .......يا صديقى ALF-WE
على ردك الجميل و كتر خيرك يا باشا
على فكرة انا اسمى د/جلال حلمى
ووالدى من القرنة فى الاقصر
وانا بنزل الاقصر كتير ...بس اليومين دول مفيش فرصة لللاسف .....كونت اتعرفت على شخصية محترمة
زيك يا ALF-WE
لا و الله مش عزومة مراكبية ......ده انا قايلك على مكان شغلى فى قنا و دى مستشفى كبيرة و معروفة
وادينى كمان قولتلك على اسمى عشان تصدقنى .....وتصدق انه دى عزومة صعايدة مش مراكبية
وانت يا باشا تشرف
وانا مستعد اديلك رقم موبييلى عشان لو نزلت قنا .....نتشرف بيك و بمعرفتك ..اوك
انا بصراحة محتار بين اللوجان و السيريون وان
وانا استخدامى بسيط ......يعنى انا عندى البيت و العيادة و المستشفى .......تقريبا فى شارع واحد
انا بس محتاج العربية عشان يعنى لوخرجت مع المدام و بنوتى مريم (سنة ونص) وابنى اللى ان شاء الله هايشرف كمان شهرين ....او خروجة مع صحابى ......او مضايق بعد الشغل الف شوية ......واسمع كاسيت فى العربيه....يعنى طلبات البيت ....و الحاجات دى ....
فانا بصراحة محتار .....بس اللى مخلينى لغاية دلوقتى مختار السيريون ......موضوع التقسيط المباشر ......عشان انا مش معايا الكاش دلوقتى .....وعايز ابعد عن البنوك و الربا و الشبهات ....و انا هاشترى كمان شهرين ان شاء الله على وش ولى العهد باذن الله ....
انما لما نزلت اللوجان ........شوفتلها كليبات على اليوتيوب و جمعت عنها معلومات و كله بيشكر فيها
فانا محتار .....السيريون يابانى .....بس موضوع الهاتشباك انت عارف انه هنا فى الصعيد لازم العربية تبقى سيدان
و السريريون عاجبانى .......و كمان اللوجان على الرغم من ان انها عاجبانى ......الا انه مفيش اى ملامح للتقسيط ليها لانها لسه نازلة و عليها اقبال....
انت بقى رايك ايه يا صديقى ؟؟؟؟ يا ريت لو عندك خبرة او راى قولوه يمكن تقدر تساعدنى و تخلصنى من الحيرة دى ؟؟؟؟؟؟؟؟؟
معلش لو طولت عليك ......

**alfa_we** · 31-05-2009 09:22 PM

ازيك يا دكتور جلال بجد انا مش عارف اعتزرلك ازاى بس والله كنت مشغول الى كام الى فاتو مكنتش عارف ارد عليك
على فكرة انت كدة خليتنى اعرف انى حظى وحش بسبب انك مبتنزلش اليومين دول
وانا عارف والله انها مش عزومة مركبية ولا حاجة بس انا كنت بهزر معاك
بس انا عايز اعرف انت ركبيت العربيتتين الى بتتكلم عليهم ولا لسة ؟
بصراحة انا لو كنت مكانك هاختار السيدان مهما كان النوع لانك بتقول معاك مريم ( ربنا يخليهالك )
ويكرمك ان شاء الله بأبنك الى هايشرف
يعنى انت محتاج عربية عائلية دا اول سبب
تانى حاجة لو هانتكلم على اللوجان هى عربية كويسة وكل حاجة زى مانت قريت عنها وفى حاجة كمان
موضوع الصيانات مش هاتكون بعيدة عليك + توكيل محترم جدا عن تجربة
ولتانى مرة بقولك لو عايز تجرب العربية انا تحت امرك كفاية انى اتشرف بحضرتك والله
موضوع التقسيط المباشر انا سمعت عنه بصراحة بس معرفش تفاصيله
وان شاء الله تخلص الموضوع دا على خير
على فكرة اسمى احمد عاطف
وبجد انا سعيد جدا بمعرفة حضرتك

**PoweRPassioN** · 31-05-2009 10:44 PM

شكرا على التقييم والردود

**abohalmos** · 01-06-2009 12:48 PM

متشكر يا بوحميد على كل المجاملات الرقيقة اللى فى كلامك اللى بتعكس ذوق و انسانية حضرتك
و ده طبعا مش جديد على الصعايدة ..صح ؟؟
متشكر يا غالى على نصيحتك و انا لسه بفكر و الله المستعان ان شا ء الله.
على فكرة انا فى القاهرة اليومين دول فى شغل و مش بعرف اخش بانتظام ...
واسف لو اتاخرت عليك فى الرد .
و لو برضه فيه رزالة منى .....لو انت معدى ناحية التوكيل بتاع رينو فى الاقصر اسالى كده على موضوع التقسيط المباشر .....او لو حتى بالتليفون ....وابقى قولى بالله عليك .....
الف شكر ليك ..يا احمد
و سعيد جدا انى كسبت صديق فى ذوقك ....
و بالمناسبة انت بتشتغل و لا بتدرس ؟؟؟؟؟؟

**أبو أدم** · 01-06-2009 04:16 PM

شكرا لك احمد باشا على التقييم والافادة و المتابعة

**modygemy86** · 02-06-2009 02:31 AM

معلومه مفيده: توكيل رينو متعاقد مع شركه كونتاكت في التقسيط، والشركه دي عندها تقسيط اسلامي، وتقدر تتعرف علي النظام الاسلامي بتاع الشركه اكتر لودخلت علي الموقع بتاع شركه كونتاكت (كونتاكت كارز).
ربنا يقدرني واشتري انا كمان العربيه دي .... وانا بحضر مقدم الحجز اليومين دول .... دعواتكوا