عايز أشترى أوبل فيكترا وعندى أسئلة كتير

**mostafaomran** · 07-10-2008 09:46 PM

انا معايا 60000 وعايز اشترى احسن أوبل فيكترا فى حدود السعر ده، تنصحونى بايه؟

انا قبل ما اكتب المشاركة دية قرأت بعض المواضيع اللى الناس كاتباها ولاقيت فيها اجابات على اسأله كانت فى دماغى بس لسه فيه شوية استفسارات.

المواتير اللى موجودة فى الموديلات بتاعة الشكل اللى من 96 الى 2003 ايه أنواعها بالضبط فى 1600 و 2000 سى سى، وهل مثلا موديل 2001 بيبقى نفس الموتور فى الاثنين ولا لأ؟

طيب هل موتور B ده بيطلق على كل مواتير الموديلات دية؟ ولا ده نوع منها بس؟

هل الموتور بتاع موديل معين للأوتوماتيك غير بتاعه للمانوال؟ ولا نفس الموتور بس اختلاف الفتيس؟ يعنى هل مثلا حد يقدر يغير عربية مانيوال يخليها اوتوماتيك بتغيير الفتيس بس؟ ولا ده بيبقى اختلاف فى الموتور كله؟

لو حد مثلا مغير موتور عربيته من 1600 الى 2000 المفروض دية حاجة تقلق علشان العربية بقت مش على طبيعتها ولا عادى؟ وهل ده المفروض يقلل سعر العربية اد ايه ؟ ولا ميقللش اصلا؟

ABS موجودة فى ايه من الموديلات دية؟

هل فيه مكان فيه مقارنة بين cd , cdx , glx ؟

هل هناك قطع غيار أصلية استعمال الخارج متوافرة لكل الموديلات دية؟ وهل فيه مشكلة فى الاعتماد عليها بدل التوكيل علشان مسألة السعر؟ انا سمعت انها موجودة بكثرة فى بورسعيد، وفيه ناس بتقول لا مفيش للموديلات اللى من اول 2001 تقريبا؟

ايه رأيكم فى شراء سيارة مستعملة استيراد اوروبا من موضوع سيارات المعاقين اكيد سمعتوا عنه ، بعد فك الحظر طبعاً؟ بس السعر هيكون اغلى من السوق المصرى بشوية

لما العربية الاوبل جميلة اوى زى ما الناس هنا بتروج ليه سعرها فى السوق عمال يقع كل شوية، وسوقها واقف فى البيع خالص، دية حقيقة لا جدال فيها.

انا شايف فيه ناس مستغربه اسعار معروضة على ناس تانية بس دية الحقيقة سعر السوق بيقل قوى لأن اللى عايز يبيع مش عارف يبيع الناس كلها متجها لليابانى والكورى.

ممكن حد يسرد الاوبشنز اللى موجوده فى الموديلات دية كلها (المشتركة يعنى) وبعدين الاختلافات بين الموديلات المختلفة؟

**ENG\AHMED** · 08-10-2008 02:08 AM

-من 96 الى 99 فى 1.6 مانيوال كامة , 2.0 اوتو كامة
من 2000 الى 2003 1.6 كامة مانيوال , 1.6 كامتين اوتو , 2.0 كامتين اوتو

-مفيش حاجة اسمها موتور B ال B دة كود العربية .. الموديل دة اسمة فكترا B والشكل الاقدم فكترا A والجديد فكترا C

-اعتقد كل المواتير الكامتين بيركب عليها اوتو ومانيوال
ال 1.6 الكامة مانيوال بس

-العربية واحدة ... ركبلها ال 2.5 ومفيش مشاكل بس يبقى حد بيفهم اللى يركبة انما كشاسية وكدة دى مش 128

-ال ABS فى كل فكترا B استاندرد

-الفرق بنهم فى الاوبشنز والمواتير .. ال cd 2.0 كامة وكامتين , ال CDX 2.0 كامتين وال GLS 1.6 كامة وكامتين

-كل قطع الغيار موجودة فى التوكيل وبرة وجديد واستيراد

-السوق كلة نايم سواء جديد ولا مستعمل مش سوق الاوبل بس ومعروف ان العربيات الالمانى صيانتها مكلفة بالنسبة لليابانى والكورى فا طبيعى مش هتتباع بسرعة زى الهيونداى واللانسر مثلا .. االالمانى عموما مش هيشترية غير حد دماغة فية وعارف قيمتة مش واحد بيدور على حاجة تمشى حالة وخلاص وحمارتك العارجة تغنيك عن سؤال اللئيم
الالمانى حاجة واليابانى والكورى حاجة يعنى مينفعش تنزل من فكترا وتقول كورولا ولا سيفيك ولا لانسر ولا دايو وهيونداى !!

االاسعار اللى بتتقال هنا مش منطقية يعنى مفيش عربية فكترا تتركب وهتتباع على 52 و 54 الف والكلام دة (انا بتكلم على موديلات فوق 96) كان لسة فى موضوع هنا بعنوان كشف شامل على اوبل فكترا تقريبا صاحب الموضوع نزل مع صاحب العربية ل 54000 بس ممكن هو يحكيلك حالة العربية كانت عاملة ازاى .. فى الامانى بالذات لو عايز تشترى اشترى حالة غير كدة متشتريش حتى لو سعرها واقع ولقطة لأن اللى وفرتة فى التمن هتدفعة وزيادة تصليح بعدين
مفيش عربية نضيفة هيتخسف بسعرها الارض مهما قعدت انا لو عربيتى مش مدايقانى تقعد معروضة للبيع زى ماتقعد ان شالله تقعد سنة مادام مجابتش السعر اللى انا عايزة انما لو قارفانى هنزل فى السعر وهخسف بيها الارض وادلل عليها علشان تتباع
واحد صاحبى بيدور على فكترا موديل بعد 2001 المهم شاف واحدة 2003 وعلى كلام صاحبى العربية بحالتها صاحبها طالب 100000 وغير قابلة للنقاش صاحبى قالله كتير وحاول ينزل معاة قالة دة سعرها ودى حالة العربية اتباعت بالسعر دة كان بها ماتباعتش تقعد انا مش خسران حاجة

**ahmed_magdy_shaaban** · 08-10-2008 02:45 PM

أحب أزود معلومة.في عربيات فيكترا b مانوال 2000 سي سي.ودي بتكون مواصفة خاصة و ألماني 100%. ودي معايا شخصيا. أنا كنت فاكر إن مفيش غيرها. لكن شوفت كذا واحدة بعد كدة.علي فكرة هي هي نفس العربية اللي تقفيل محلي مع فرق طبعا مفيش عيوب تقفيل ومكوناتها كلها ألماني مفيش مسمار فيها مصري.زي ضفيرة الكهرباء والفرش بتاع الصالون وطقم الكاوتش بتاع الأبواب وسماعات الكاسيت.بس لو حضرتك لقيت العربية دي وحالة كويسة توكل علي الله بدون تفكير.العربية دي قوتها = قوة الشيروكي مثلا بدون مبالغة.أنا كنت شاريها بـ 64000 من حوالي سنة وصرفت عليها كتير طبعا عشان تبقي زيرووووووووو.حاليا واقفة عليا بحوالي 70000 جنيه.

**أشرف العدوي** · 08-10-2008 03:12 PM

االاسعار اللى بتتقال هنا مش منطقية يعنى مفيش عربية فكترا تتركب وهتتباع على 52 و 54 الف والكلام دة (انا بتكلم على موديلات فوق 96) كان لسة فى موضوع هنا بعنوان كشف شامل على اوبل فكترا تقريبا صاحب الموضوع نزل مع صاحب العربية ل 54000 بس ممكن هو يحكيلك حالة العربية كانت عاملة ازاى .. فى الامانى بالذات لو عايز تشترى اشترى حالة غير كدة متشتريش حتى لو سعرها واقع ولقطة لأن اللى وفرتة فى التمن هتدفعة وزيادة تصليح بعدين

انا صاحب الموضوع ده و سألت على علبة الدركسيون في الشيماء لقيتها 3800 و جوان التاكيهات بردو مش موجود بس قالي في حدود 45 جنيه بس

فى الامانى بالذات لو عايز تشترى اشترى حالة غير كدة متشتريش حتى لو سعرها واقع ولقطة لأن اللى وفرتة فى التمن هتدفعة وزيادة تصليح بعدين

انا معاك قلباً و قالباً في الموضوع ده
لاني بعد ماحسبت تكلفة تصليح الي انا اكتشفته ساعة التجربة لاقيتها حتبى واقفة عليا تقريباً بـ 62000 و لسة بقيت الحاجات الي لسة ما اكتشفتهاش و كمان 251000 كم
لقيت البيعة مش جايبا همها.
الـ 62000 ممكن الاقي بيهم حاجة نظيفة و محتاجة شوية حاجات صغيرة بس