الموضوع: مشكلة تنقيط مياه تحت السيتى

اول مشكلة , دية مش مشكلة اصلا

دية حاجة اسمها امان فى العربيات بتسمى ( مسوجر الدركسيون ) لازم بعد كل ماتركن , تشيل المفتاح من الكونتاكت , وتحرك الدركسيون شمال او يمين لحد ماتلاقى الدركسيون مابقاش بيتحرك

ولما تيجى تدور بعد كدة , هتحرك الدركسيون وانت بتدخل المفتاح , هتلاقية بات فى مكانة عادى جدااا زى محصل معاك


المشكلة التانية : لو عندك مياة القربة بتقل , يبقى ممكن يكون فية خرم فى الريدياتير , او فى احدى الخراطيم , فلازم تراجع على الدائرة كلها

المشاركة الأصلية كتبت بواسطة Martin5555

الحمد لله يا أستاذ سامح ان المشكلة الاولى طلعت حاجة متعلقة بالأمان ، انا قلبي وقع في رجليه
ربنا يخليك ، بالنسبة للمشكلة التانية بتاعة الميه ، انا عايز انتهز لحظة وجودك دلوقتي في المنتدى لاني بمنتهى الامانة بثق في رأيك أوووووووووووووووي ، فالحمد لله انك رديت عليا
انا اول لما فتحت القربة حطيت قلم جاف ودخلته في القربة بالكامل علشان اقيس الميه موجوده لغاية فين ، بس ملقتش ولا نقطة ميه على القلم ، روحت قلت ازود الميه تقريباً حطيت اكتر من ازازتين مايه كانوا معايا في شنطة العربية (الازازة 600 مم) يعني تقريباً حطيب لتر ونص مايه عاديت كنت مليتها من الحنفيه وقولت اشلهم معاياه في الشنطة
وحطيتهم في القربة وكانت العربية مش داية ، الميه كانت سخنة بس مش بتغلي لاني كنت قاعد على قهوة قريبة من البيت يعني لما وصلت الجراج مكنتش سايق اكتر من 5 أو 10 دقايق على اكتر تقدير

المفروض ده غلط على العربية ولا رأيك ايه ؟
طيب وبكره الصبح وانا رايح الشغل الساعة 7 ، أعمل ايه ؟
اروح للمكانيكي وخليه يشوف الحكاية ديه ؟ ولا في حد معين غير الميكانيكي المفروض اروح عنده ؟
ورأيك الصبح لو لقيت ميه بتنزل المفروض اعمل ايه ؟
ولو ملقتشي ميا خلاص كده الموضوع خلص ولا ايه ؟
ولا ازود ميا تاني قبل ما ادور العربية الصبح ؟

معلش انا بنتهز ان حضرتك موجود دلوقتي معلش انا مضايق شويه لشان مش بفهم خالص في العربيات ؟
العربية هوندا سيتي 2005 اوتوماتيك cvt ?

هل المية لما تنزل ده شيء عادي بيحصل مع كل الناس ولا انا عملت حاجة غلط ، علشان مش بشيك على الميه بقالي اتكتر من شهر

شكراً لاهتمامك

شوف ياباشا , معنى ان العربية تاخد كل المياة دية فى القربة , معناها انها فاضية تماما

وكدة عندك تسريب , يأما من ( الخراطيم - الريدياتير - القربة نفسها )

طريقة بقى ملىء المياة فى دائرة تبريد السيارة فى الحالات الاتية :

1-فى حالة ان المحرك بارد تماما :

* ودية المفروض هتدور العربية وتفتح غطاء القربة وتزود منها لحد علامة ال max بتاعتها ماتزودش عنها

- وتقفل القربة , وتفتح غطاء الريدياتير للتأكد من منسوب المياة فية وتقفلة

2- فى حالة ان المحرك سخن :

* لازم تكون مدور المحرك عشان تزود مياة لان معنى دخول مياة بدرجة حرارة مختلفة عن المياة الموجودة بداخل المحرك , ممكن يؤدى لتلف وش السلندر


* المفروض بقى هتروح للميكانيكى , يراجعلك على الخراطيم والقربة والريدياتير اكيد هيكون فية اثار للمياة واضح

- لو نزلت الصبح ولقيت مياة بتنزل زود المياة اللى نقصت ( زى مانا قايلك فوق ) وروح لاقرب ميكانيكى وعينك على لمبة الحرارة

* لو مالقيتش مياة خالص, لأ بردة راجع على الدورة , عشان مافيش قربة بتقل كدة الا لما بيكون فية تسريب , فلازم تعالجة