الموضوع: كهربائي وصل لحل لمشكلة ارتفاع الحرارة بي ايه ... صااااايع

واحد جارنا معاه فكترا بي
المهم لأني بدور على فكترا ومهتم بيها ونفسي أركب واحدة
سألته على العربية وأخبارها معاه
قعد يقول فيها شعر
مع إن اطول مشوار بيروحه حوالي 13 كم
المهم ... سألته على أهم حاجتين
التكييف - الحرارة
التكييف مش شغال ... عايز شحن وانا مش هشحنه
طيب ليه يا عم الحاج
أنا مش بحتاجه والميكانيكي قاللي إنه بيحمل على الموتور
طيب ماشي ... أخبار الحرارة ايه
زي الفل الحرارة دايما 85 اقصى حاجة
اتفاجئت الصراحة ...
سألته إنت معدل المراوح ولا عامل إيه
قاللي هي كانت بتسخن فالكهربائي ركبلي منظم حرارة ظبط الدنيا
قلت عبقري الكهربائي ده
أشوف بقا عامل ايه يمكن فكرة جديدة أهو الواحد يستفاد
واستأذنته وفتحت الكبوت مع وعد بعدم لمس شئ
الراجل أصله موسوس شوية وبيخاف جدا على حاجته
ألاقي ايه بقا منظم الحرارة ده يا عم الحاج
اختراع .... ثم اختراع ........... ثم اختراع ... لحد بكرة قول
وحركة صايعة جدا
الراجل جه على السلك الاحمر بتاع الحساس وراح مركب مقاومة معرفتش أقرأ قيمتها
وطبعا لو قلت للراجل هوصل الافوميتر ممكن يفكر اني هبوظ العربية
المهم الكهربائي الصايع بقى عامل ايه
طبعا الراجل راحله يشتكي من حرارة العربية
وأكيد هوا عارف إن مواتير الاوبل حرارة تشغيلها عالية ........ أو مش عارف
الراجل الكهربائي راح حاطط مقاومة تخلي الاشارة اللي جاية من الحساس تقل فالمؤشر يدي قراءة أقل من الفعلية
يعني ممكن العربية تكون حرارتها 95 أو حتي 100 والعداد يقوللك إنها طبيعة ولسه في الامان
صايع أوي الكهربائي ده