عيوب النيو اكسنت

**m6r1282** · 06-05-2014 11:27 AM

المشاركة الأصلية كتبت بواسطة mrmatrix

انا من طبيعتى مش بجرى يعنى انا عايز حاجة اوبشن وكماليات ووسائل حماية وثبات برضو mohamed jetta

ذي ما ذكرت في التعليقات السابقة، النيو أكسنت موفره حتى 120 وده كويس في البنزين
بالنسبة للأمان، زميل هنا قال إن فارمل ألأوبترا أفضل، وأنا قلت إن كاوتش أكسن الأصلي وحش والناس بتظن إن الفرامل وحشه بسببه، والفرامل مش ممتازه في أكسنت لأنه كوري والكوري لا يرقى مهما كان إلى الألماني والياباني في الفرامل

الأوبشن ده وجهة نظرك إنت ماحدش هايختارلك فيها

**m6r1282** · 06-05-2014 12:22 PM

تابع اللينك ده كمان أنا رادد فيه بوفره عن أكسنت وياريس

http://www.nilemotors.net/Nile/418273-2009-2009-a.html

واستخير أهم حاجة، والله الاستخاره تفرق، أنا قبل التجربة والمعرفة الواقعية للياريس أو الأكسنت كنت رايح أشتري ياريس وأول ما شوفتها معرفش ربنا صرفني عنها ليه

ورجعت بأكسنت والحمد لله رب العالمين.

**Mohamedjetta** · 06-05-2014 01:17 PM

المشاركة الأصلية كتبت بواسطة m6r1282

أنا مافتيش في موضوع فرامل الأوبترا، لأني ما جربتش ومش مكذبك طبعا.
لكن البنزين اعمل بحث على النت وشوف الشكوى من أكل البنزين، وأنا بقول إنها بتاكل بنزين لأنها قوية مش عيب ماتور لكن بتاكل على الفاضي لأنه مافيش طريق أظهر فيه قوة الماتور ده بأكله للبنزين، ودي شكوى ناس أعرفها برده

لكن أقسم بالله أنا فولت العربية أكسنت 2010 بتاعتي وسافرت بيها مرتين منوفية طنطا ريح جاي ومااتحرك المؤشر لدرجة إني شكيت في العداد والعوامة والحوار ده، ولكن ولا كان فيها مشكلة وبعد شويه اتحرك وفضلت معايا التفويلة فترة عجيبة، وحتى الآن ماعرفش السر، هي أصلا موفره جدا لأن طريقة الحقن بتاعتها ذكية ومناسبة لطرقنا بمعنى

الموبينه شغالة بنص الصبابات حتى 120 بعد 120 بيفتح الصبابات كلها فابتحس إنها طور جري تسارع فظيع بعد الـ 120

وطبعا مافيش حد هايجيب 120 في أغلب الطرق اللي في مصرنا الجميلة، وده منه توفير بنزين.

ومتابع

يا باشا انا مصدقك ومن غير حلفان و حكايه ان الاوبترا بتسحب بنزين اعتقد عشان اتوماتيك 4 سرعات فقط واعتقد ده سبب
اما عند صاحب اخويا مانويل 5 سرعات وهو مش بيدوس ف السرعات الاولانيه فيمكن عشان كده مش بتسحب بنزين معاه
حضرتك عند الصحراوي يغري اوي ف السرعه

**mrmatrix** · 06-05-2014 08:28 PM

تسلم استاذ mohamed jetta
تسلمm6r1282
بس بالنسبة هية مش خفيفة اوى لانها مع واحد صاحبى وماشاء الله عليها يعنى وقطع غيارها كويسة
بس الناس بتكلم فى الاوبترا على اساسا انها واسعة واحسن فى الفرامل
لاكن الناس بتشكر فى الاتنين
طيب بشمهندسm6r1282 حضرتك تعرف رينجتها كام النيو اكسنت 2010 او 2011
ولو الاوبترا يا استاذ mohamed jetta اخد موديل كام ورنجاته اية

**Mohamedjetta** · 06-05-2014 09:05 PM

الله يسلمك

انا هقلك تاخد 2009 عشان ده اللي مع صاحب اخويا وماشيه250 الف كيلو وزي الفل
انا مسافر بره بس بتابع ع النت وملاحظ اسعارها من 65 الي 75 الف جنيه حسب حالتها ويفضل انك تاخدها خليجي عشان يبقي فيه كماليات وخد عداد قليل يعني بالكتير 60 الف او 65 الف و خلي بالك من اللعب ف العدادت لانها زادت اوي وبالاخص من التجار الخليجي فخلي باالك و حاول تاخد عربيه فيها فواتير سيرفسها و اكشف عليها ف التوكيل
وبرضو بقولك لو ملقتش اوبترا حاله نضيفه روح جيب النيو اكسنت و اختيار موفق سواء اخترت دي ولا دي ومبروووك مقدما وربنا يبعد عنك شرها وعين العربيه

**m6r1282** · 07-05-2014 10:21 AM

المشاركة الأصلية كتبت بواسطة mrmatrix

تسلم استاذ mohamed jetta
تسلمm6r1282
بس بالنسبة هية مش خفيفة اوى لانها مع واحد صاحبى وماشاء الله عليها يعنى وقطع غيارها كويسة
بس الناس بتكلم فى الاوبترا على اساسا انها واسعة واحسن فى الفرامل
لاكن الناس بتشكر فى الاتنين
طيب بشمهندسm6r1282 حضرتك تعرف رينجتها كام النيو اكسنت 2010 او 2011
ولو الاوبترا يا استاذ mohamed jetta اخد موديل كام ورنجاته اية

سلمك الله ولا شكر على واجب.

أظن الأكسنت هاتكون غالية شويه، يعني المانيوال حالة نضيفه هايكون في السبعينات والأوتوماتيك هايكون في التمانينات (أنصح بالأوتو بشده لو معاك سيوله والشكر فيها كان من مهندس في التوكيل).

في شويه حاجات في الموضوع ده:

- وسع الأوبترا يفرق عن الأكسنت، فهل أنتو من الناس الطويله أو البدينه هايكون الأوبترا أحسن بفارق ولكن ليس كبير.
- ولو إطار الأوبترا 15 فافرق البوصه دي بيكلف كتير في شراء كاوتش جديد لأن أكسنت 14.
- قطع الغيار لشيفروليه غالية عامة عن الكوري لأنه بيبيع بإسم شيفرولية.
- مازلت بقول موضوع البنزين دا مهم جدا في الأزمه اللي فيها البلد دي (عربية تسفرك بالتفويله 4 مرات أحسن من 3 أو 2).

دي حاجات كانت في خاطري

.

الاستخارة ستدلك على الخير ودعاؤها هو:

اللهم إني استخيرك بعلمك وأستقدرك بقدرتك وأسألك من فضلك العظيم، فإنك تقدر ولا أقدر وتعلم ولا أعلم وأنت علام الغيوب، اللهم إن كنت تعلم أن (تسمي حاجتك) خير لي في ديني ومعاشي وعاقبة أمري عاجله وآجله فاقدره لي ويسره لي ثم بارك لي فيه، وإن كنت تعلم أن (تسمي حاجتك) شر لي في ديني ومعاشي وعاقبة أمري عاجلة وآجله فاصرفه عني واصرفني عنه ثم اقدر لي الخير حيث كان ثم رضني به.

ما أحسنه من دعاء والله، ما دعوت به وخاب اختياري أبدا ولا مره والله.

**mrmatrix** · 07-05-2014 01:53 PM

ربنا يباركلكم جميعا وشكرا تعبتكم وربنا يسهل هستخير ربنا وربنا يقدم اللى فيه الخير

**m6r1282** · 07-05-2014 02:40 PM

المشاركة الأصلية كتبت بواسطة mrmatrix

ربنا يباركلكم جميعا وشكرا تعبتكم وربنا يسهل هستخير ربنا وربنا يقدم اللى فيه الخير

بالتوفيق إن شاء الله، لكن ماتنساش تفرحنا معاك، بعد الشراء إن شاء الله وإنطبعاتك الأولى.

**Mohamedjetta** · 07-05-2014 06:13 PM

المشاركة الأصلية كتبت بواسطة mrmatrix

ربنا يباركلكم جميعا وشكرا تعبتكم وربنا يسهل هستخير ربنا وربنا يقدم اللى فيه الخير

تسلم يا باشا وربنا يوفقك في الشراء

**Ahmed El Shamy** · 09-05-2014 02:00 AM

انا معايا نيو اكسنت 2008 اتوماتيك بصراحة العربية روعة سريعة ججا من اقلل لمسة بنزيين وموفرة جدا في استهلاك البنزيين وبالنسبة للثبات انا شايفها ثابتة جدا يعني انا مشيت انا ومراتي علي طريق السخنة علي 190 و زي الفل بس هي المشكلة في العفشة ويممكن ده سبب ثباتها انهم متقليين العفشة يعني بالبلدي اي حتة زلطة في الارض حتحس بيها والفرامل انا شايفهاﻻكويسة الصراحة