الموضوع: والدي يريد الانتحار ، ماذا أفعل؟

الحمد لله ان ربنا كرمك بمستشفى كويسه
واسمح لى بما انى مريت بظروف شبيهه لكن مش صعبه لادرجه المهوله ديه أنقل لحضرتك اللى اتعلمته
والدى رحمه الله كان رياضى من الطراز الاول بشكل متواصل وبدون انقطاع يوميا حتى بلغ 52 عام
بدون مبالغه والدى مكنش بيمرض ولا بيروح لدكاتره
كان لما يجي له برد يقول اللى ياخد دواء علشان شوية انفلونزا ده تييييييييييييييت ومش راجل
ابتدى الموضوع انه راح بعد عذاب لدكتور الاسنان لأن عنده ضرس تاعبه جدا
بدون أى مقدمات بعدها بشهرين اكتشف ان عنده التهاب كبدى
فى الاول عدى على مرحلة عدم التصديق
بعدها بدء التعايش مع المرض
واستمر على كده لمدة 6 شهور فقط
وفجأه قرر انه مش هاياخد اى علاج وهايرجع ياكل تانى براحته وما شابه
التقصير مننا اننا سبناه براحته
أول سنه مفيش حاجه حصلت
بعد كده والدى جسمه بدأ ينهار بمعنى الكلمه - الكتل العضليه اللى كانت عنده واللى كان بيفتخر بيها جدا انهارت فجأه - بدأ حجم بطنه يزيد وبدأت المأساه - بدأ أول غيبوبة كبد
ساعتها فعلا احنا زى ما نكون حصلت لينا حادثه وبدأنا نفهم ايه اللى احنا فيه
لأول مره والدى اللى مشهور بمحافظته على صحته وشكل جسمه بالاضافه لأن والدى رحمه الله كان وسيم جدا - بقى زيه زى غيره
والله انا كنت دايما بقول كلمه على والدى رحمه الله انه هايدفنا كلنا وهو مش هايحصل له حاجه
كلنا بدأنا نعدى الصدمه وبصفتى انى الابن الاكبر أصبحت انا ووالدتى ربنا يشفيها مسئولين عن والدى مسئوليه تامه فى كل حاجه

بداية الفتره ديه كانت المأساه وانك تتعرف على الوجه البشع لكونك مصرى (بدون دخول فى اى اتجاهات سياسيه)
بدأنا العلاج فى مستشفى اسمها مبرة محمد على والمفروض انها علاج اقتصادى رخيص
تقريبا احنا دفعنا سنة 1998 تقريبا 7000 فى 15 أو 16 يوم (مش متأكد من الرقم ولا الفتره لأنى كنت لسه مبدأتش أركز)
بدأنا كل شويه نكابر ونقول بلاش مستشفيات ونقضيها فى البيت علشان المصاريف - لكن كانت الحاله سيئه جدا ودايما كنا بنحتاج المستشفى أول لما يدخل فى غيبوبة الكبد
لغاية لما استسلمنا وبدأنا نعالجه فى مستشفيات التأمين الصحى
أول تشخيص لوالدى وده كان فى شهر 11 سنة 2000 انه قدامه بالكتير من أسبوع لشهر وهايتوفاه الله وديه كانت صدمه مهوله بالنسبه لينا
والدى رحمه الله انا وهو كنا دائما وابدا على خلاف
بدون اى مقدمات أصبح أبويا هو صديقى الصدوق بجد
مش بسيبه لا أنا ولا والدتى
قسمنا نفسينا مجموعات لأن والدى كان محتاج عنايه فائقه تقريبا 18 ساعه يوميا
والدتى بحكم وظيفتها وانها مدير عام كانت بتقدر تاخد اجازات زى ما هيه عايزه و انا كنت لسه ببدء حياتى العمليه فبقت الدنيا ماشيه كالتالى
انا موجود بشكل متواصل مع والدى جميع ايام الاسبوع من الساعه 6 مساءا وحتى 8 صباح اليوم التالى ما عدا يوم الخميس والجمعه والسبت مكنتش بخرج من المستشفى ويوم الثلاثاء كنت باخده أجازه
والدتى شفاها الله يوميا فى المستشفى من الساعه ال 7 صباحا وحتى ال 6 مساءا عدا يوم الجمعه والسبت - كانت بتبقى اجازة أمى بسبب ظروفها الصحيه
أختى (متزوجه وطبعا عايشه فى بيتها) مسئوله عن تجهز الاطعمه والملابس الخاصه بنا جميعا وفى بعض الاحيان احضار الطعام لى بسبب اصابتى بحالة نفسيه سببت تقريبا انى كنت باكل مره واحده فقط فى اليوم بسبب القرف اللى كنت بشوفه
اخى الاصغر وظيفته انه بيقوم بكل المشاوير ويقضى يوم الثلاثاء مع والدى فى المستشفى
الدكاتره كانت بتقول فى شهر 11 سنة 2000 ان والدى امامه ايام
والدى توفاه الله شهر 9 سنة 2003
من قمة اليأس والاحباط لفعليا انه بدأ يتقبل الموضوع
بدأ تقبله للموضوع لما حس ان فعليا بقينا معاه - مش بنرقبه او بنحدد حياته
ابويا كان فعلا بدأ يزهق مننا
من أول لما دخل المستشفى ولا عمره عرف اسم علاج هو بياخده
احنا اللى عارفين ومره اديلوه الدواء ومره اهزر معاه وادهوله فى بقه - ومره ادهوله بالعافيه واقوله انت عايز مراتك (اللى هيه أمى) تيجى تعلقنى
عملنا أسلوب حياه فرضته علينا الظروف
اكتشفنا اننا لو سيبنا نفسنا للدكاتره والمستشفيات العاديه هانحتاج مصاريف طائله لا قبل لنا بيها - تقريبا والدى كان بيستهلك شهريا أدويه تزيد عن ال 5000 ما بين أدويه وبلازما ونقل دم
والدى رحمه الله كان أطيب مخلوق ممكن تقابله فى حياتك - مع انه رحمه الله كان على قدر من القوه الجسمتانيه لكن عمرى ما شوفت أبويا بيستقوى على حد - أنا كمان كنت لاعب كمال أجسام - بطلت العب نهائيا علشان والدى لأن طول عمره جسمه احسن من جسمى بالاضافه لأن الظروف حكمت بكده

باعتذر جدا جدا جدا على الاطاله
لكن اسمح لى اوجه لك شوية نصائح
1- معجب جدا بصراحتك انك قلت ان والدك عايز ينتحر
2- ياريت حضرتك ماتتكلمش كتير فى النقطه ديه فى محيط والدك (اعتبر الموضوع كأنه لم يكن)
3- المستشفيات مهمه جدا لكن حاول على قد ما تقدر تبعد عنها أو تتعامل معاها بأقل الخسائر
4- ابدؤأ فكروا حضرتك ووالدتك واخوتك هاتعملوا ايه وهاتمشوا حياتكم ازاى
5- وجهة نظر شخصيه لو هاتسيب والدك فى مستشفى وهاتدفع فلوس بس يبقى حضرتك منعته من انه ينتحر لكن حكمت عليه بالاعدام
6- وجهة نظر شخصيه لازم على الاقل 10 ساعات يوميا احد الاشخاص المقربين لوالدك يكون معاه
7- من الواضح ان والدك من الشخصيات الناجحه (وليس قليل الايمان زى ما حضرتك مركز على النقطه ديه) الاشخاص الناجحين مش بيتقبلوا الهزيمه (والدى كانت اكبر حسراته لما يقف امام المرأه والدى كان وزنه 110 كيلو تقريبا 90% منهم عضلات و 10% فقط دهون وطوله 185 سم - عند وفاته كان 75 كيلو تقريبا) حاول دايما توجه نظره لحاجه هو كان فخور بيها - مع والدى دايما كنا بنقول له ان الدكاتره بتحلف وتتحالف بقوة جسمه وقدرته على التحمل وان لو واحد عادى كان مات وشبع موت
8- موضوع التدين والايمان بالله صدقنى موجود عند والدك لكن بتختلف من شخص لأخر - أصبروا عليه وأن شاء الله هايبقى مثال تحلفوا بيه - بس المهم انكوا كلكم تثقوا بالله انها مرحله وهاتعدى - لازم كل اللى حواليه يبقوا متأكدين ويتعاملوا على المنطلق ده
9- اى تقدم ولو بسيط فى حالة والدك لازم يعرفها وكل شويه اتلككوا بأى حاجه بسيطه تحصل لوالدك فى حالته الصحيه واتجمعوا كلكم وافضلوا باركوا له وحسسوه ان كلكم معاه وكلكم متابعينه
10- الاكلات المفضله لوالدك واللى ممنوع منها بأمر الدكتور اتفق مع الدكتور ووالدتك انك تهرب لوالدك كميات بسيطه بدون علم أى حد (والله العبط ده بيفرق جدااااااااااااااااااااااا اااااااااا) وخلى والدتك هيه اللى تطلع بدور الشريره وانت واخواتك اللى بتحبوه
11- انا الحمد لله مسلم - وربنا يسامحنى على الكلمه ديه انا مش متدين أوى ..... لكن ..... تصدق تصدق تصدق تصدق ......................... ان شاء الله هاتلاقى فارق كبير جدا - الصدقه الخالصه لوجه الله سبحانه وتعالى مفعولها سحر بجد

فى النهايه اللى بقوله ده صعب جدا فى البدايه لكن بعد كده صدقنى هايبقى أسلوب حياه
بلغ والدك تحياتى - واكتب لنا رقم تليفونه علشان يعرف ان كلنا عايزين نطمن عليه وبنحبه
ربنا يشفى والدك ويعافيه - ويرحم والدى وموتى المسلمين - ويشفى والدتى ومرضى المسلمين