الموضوع: بتعمل ايه مع السايس الغلس

الموضوع ده فعلا بقي مستفز جدا جدا.
انا كل مرة انزل روكسي اجي اركن الاقي واحد واقف جنب العربيات واحيانا لما بيلاقيني بدور علي ركنة فاضية بيندهلي عشان اركن وممكن يساعدني في الركنة فبديله جنيه كل مرة على نفس الحال لان مقداميش حل تاني
بقالي كام مرة بنزل وملاقيش ركنات خالص ومبحبش اركن صف تاني اجي اركن حتى لو لاقيت الركنة بنفسي وركنت لوحدي من غير مساعدته الفظيعة ليا :D بلاقيه جاي جري عليا واول مانزل من العربية الاقيه بيمدلي ايده (ومليانة جنيهات مفرودة ورا بعضيها كده ) اقوله لما اجي اطلع هابقي اديك يقولي لا دلوقتي وفعلا عملتها مرة واديتله جنيه لاقيته بيقولي لا 2 جنيه ياانسة قلتله هو جنيه مفيش غيره وكل مرة بركن هنا بدفع كده لما يلاقيني مصرة بيسكت ويمشي الغريب بقي اني وانا طالعة لاقيت واحد تاني جاي بيطلعني وبيوقفلي الشارع ورايا عشان ارجع بظهري يعني ولاقيته بيبصلي قلته انا دفعت للتاني قالي معلش اي حاجة يعني قلتله وانا هادفع مرتين مرة للي مدخلني ومرة للي مطعلني قالي طب هاتي نص جنيه بس، بصراحة احرجت واديتله واعتبرتها صدقة وخلاص وهو كان راجل كبير يعني.
المرة اللي بعديها بقي جيت اركن لاقيت الاتنين واقفين ولما نزلت قلتله لما اجي اطلع هادفع قالي لا دلوقتي قلتله لما اجي اطلع انا مش هادفع مرتين انا كل مرة اركن كررها مرة رديت وقلته المرة اللي فاتت دفعتلك ودفعتله لما اجي اطلع هادفع للي مطلعني بقي وعليت صوتي (بخوفه يعني :D) فسكت ومشي وانا جاية طالعة بقي مجاليش لانه كان ملخوم في عربيات تانية فطلعت بسرعة ونفضته طبعا وانسبطت اني مدفعتش المرة دي :D بجد لانه فعلا مش من حقه انه يخلينا ندفع مكان ركنتنا في الشارع يعني.
اما بقي اللي قدام سيتي ستارز دول معلمين اصلا ده بيشترط عليك تدفعله 3 جنيه واول ماتنزل من عربيتك مش وانت طالع حاولت اقوله وانا راجعة قالي لا ياآنسة دلوقتي بس دي كانت اول مرة اركن في المكان ده خصوصا اني سألت علي باركنج سيتي ستارز لاقيت الساعة ب 7 جنيه وفعلا مرة كنت مع صاحبتي بعربيتها ركنت في الباركنج ودخلنا اكلنا واتمشينا شوية وخرجنا دفعت 36 جنيه وقتها تقريبا حق 4 ساعات فلاقيت ان 3 جنيه اوفر من 36 جنيه بكتير :D
بس فعلا ياجماعة انتوا متأكدين ان الناس دي مالهاش حق في الكلام ده في منهم بيقوا لابسين Uniform لونه بني كده بس مش بيبقي معاهم تذاكر وبتبقي الركنة بردة في الشارع.
طب سؤال بيطرح نفسه الحكومة ليه سايبة الناس دي كده بقي ؟ والغريب اني بلاقيه بيخلي الناس تركن صف تاني والامين بيبقي واقف الناحية التانية اساساً تفتكروا مظبط مع الامين ولا الناس دي بتركن وبتاخد مخالفات وهي مش عارفة وبتدفعله باركنج في نفس ذات الوقت؟:k41:

المشاركة الأصلية كتبت بواسطة karim_monir

باركينج سيتي ستارز اول ساعة ب 5 جنية وتاني ساعة ب 3 جنية وكل ساعة بعد كدة ب 2 جنية
واجمالي ثمن اليوم 25 جنية لان مفيش بيات اطلاقا بيطلعوها بونش
ولو ضاعت التذكرة كلها تمنها 25 جنية
اكيد صاحبتك حاسبت غلط او الراجل غالطها في الحساب
ولو دخلتي سينما تاخد 3 ساعات ب 5 جنية
ولو اشتريتي حاجات من سبينس تاخدي عن كل 100 جنية في الرسيت خصم ساعة
بحد اقصى 3 ساعات

بس فعلا ده حصل قدامي يااستاذ كريم احنا كنا في رمضان اللي فات وكان الإفطار بتاع الشركة في الإنتركونتيننتال بتاع سيتي ستارز يومها فطرنا ولفينا شوية فيالمول ودوخنا لحد ماوصلت لمكان العربية لانها نسيت هي راكناها فين :D ودفعت المبلغ ده.
وكمان السنة دي بردة في رمضان كان الفطار بتاعنا في نفس الفندق برده وانا معدية سألت الحارس هناك اللي عند المول والفندق في واحد قالي الساعة مش عارفة ب 3 جنيه وبعدين بتقل بعد كده بس مش متأكد، والتاني قالي الساعة ب 7 جنيه وده تقريبا بالنسبة لأول ساعة والسعر ده تقريبا من الساعة 6 لحد الساعة معرفش كام .
غالبا الفرق ده ممكن يكون بين باركنج المول وباركنج الفندق بيبقي اغلي شوية لاني سمعت كده فعلا والله اعلم.
بس برده يعني لو ركنها في الباركنج اقل واجب في الليلة دي هاتدفع 10 ل 15 جنيه يبقي ال 3 جنيه اوفر وياسلام بقي لو عرفنا ننفض للسايس ومدينالوش فلوس خالص يبقي تمام اوي :D