الموضوع: حاسس بنااااااااااااااااااااااا ااااااار

حاول تحسبها بالورقة والقلم !!

اولا : خسارتك
حاجة واحده بس وهى اهتزاز ثقتك فى نفسك لاحساسك انك كان بينضحك علية
طبعا ده كل الى انت بتفكر فيه دلوقتي لكن لو بصيت بشكل اعمق هتلاقي ان الانسان الى فى طابعه الخيانه ده مريض ميفرقش عنده مين الى فى ايده ايا كان مين الى فى ايده
هديك مثال بسيط رشدي اباظه ذات نفسه كانت واحده من زوجاته بتخونه واعلنت كده بعد انفصالهم "بدون داعي لذكر اسماء"
فالموضوع متعلق بدناوة وطبع الخيانه المتوفرين في الى قدامك لكن مش متعلق بشخصك انت

ثانيا : المكاسب
1- ان ربنا انقذك من الانسانه دي وانتم فى الاول تخيل لو كنت اكتشفت كده بعد الجواز او بعد الانجاب كنت هتعيش فى جحيم وهتشك فيها وفى وألادكم كمان
2- انك اخدت حقك وفضحتهم وعيلتك كلها عرفت والى مكنش يعرف بعد خطوبتهم دي أكيد عرف الى حصل فى فتره خطوبتك ليها
انت مش هتلاحظ او تسمع نظرة قريبك ليهم او رأيهم فيهم قدامك لكن من وراكم وبينهم وبين بعض هيبوصلهم بصة زباله اوي
3- غير فضيحتهم قدام قريبكم كلهم فضيحتهم وتعريتهم قدام نفسهم ولو حصل بينهم حاجه هيحاولوا انها ماتبنش عشان يتجنبوا النظرة الى ليها اكتر من معنى من قريبكم ليهم

احب أأكد ليك انهم حاليا فاقدين الثقة فى بعضهم يعنى لا هيا واثقه فيه لانها شايفاه على حقيقته انسان حاقد ولا هو واثق فيها لانه شايفها انسانه خاينه
وفى نفس الوقت مع كل مشكله بسيطه مش هيكون سهل عليهم ان حد يسمع بيهم زي ما وضحت ليك قبل كده وده ليه تأثير على المدي البعيد وبالتالى مش هيكون فى غير حلين اصعب من بعض
أ- الانفصال : ويكون خسروا كل حاجه اولهم انت ثانيها الفضيحه
ب- الاستمرار : وده في حد ذاته هيكون الجحيم فى كل يوم هيعدي عليهم مع بعض لان العلاقة هتكون اساسها أو قايمة بينهم على التخوين وعدم الثقة فى بعض

المطلوب منك حاليا :
1- انك تشكر ربنا انه نجاك من الوقعة السودة دي
2- تعيش حياتك عادي وتنبسط وتظأتط كمان واعرف ان شعورهم بحزنك بيحسسهم بأن ليهم قيمه " وانهم فازوا ببعض " على حسابك
لكن لو حسوا انك مبسوط ان ربنا نجاك ومش فارق معاك الموضوع " يحسوا انهم لبسوا بعض " وانت خلعت

ديما الى برة الموضوع ممكن من رتوش بسيطه يفهمه أكتر من الى جوه الموضوع خصوصا فى المسائل العاطفية الى زي دي عشان كده تعالي نبص للموضوع بزاوية اوسع شوية من الى انت بتبص بيها

أول نقطة فى الاول لازم تعترف قصاد نفسك انك محبتهاش بجد او " أوهمت " نفسك انك بتحبها لكن الحقيقه انك محبتهاش حب حقيقي بأمارة انك لما عرفت انهم بيكلموا بعض وفسخت الخطوبه مااديقتش زي لما عرفت انهم خطبوا بعض

نيجي على الجانب التاني هنلاقى واحد واضح انه منفسن منك وحاسس انك عايز تكوش على كل حاجه فدخل يلعب عليها من حتة انها لقطه والف واحد زيه وزيك واحسن منك كمان يتمنوها وانها لو كانت صبرت شوية كان هتلاقي فرص كتير طبعا هيا الغرور اتمكن منها وفي نفس الوقت هيا عارفه وحاسه انك مش بتحبها حب حقيقي "البنات عندهم قدرة فظيعه في معرفة مدى حب الى قدامهم ليهم وعندهم قدرة اكبر على اخفاء الموضوع ده"
المهم قالتلك خليني ماشيه معاك رسمي وخلي التاني استبن عشان لو حصل حاجه معاك يبقى التاني موجود احتياطي

حصل انك اكتشفت الى بينهم وواجهتها كانت لسه فى حالة سكرة وكلام التاني لسه فى دماغها لما انت قررت الفسخ بدأت تفوق واهلها بدأوا يفوقوها فجاتلك مذلوله تطلب العفو والصفح وواضح من كلامك انك استجوبتها أكتر من مرة وذلتها وبينتلها قدام نفسها ان هى وهو أزبل من بعض وفى الاخر رفضت الرجوع لها تاني

رجعت لاهلها اكيد طبعا وروها ايام سودا ضيعتى ده من ايدك عشان خاطر التاني لعب فى دماغك وهيخلع منك هو كمان وبعدها محدش هيبصلك بعد الفضيحه دي
راحت للتاني اتشقلبتله قبل ما يخلع هو كمان لحد ما راح خطبها من اهلها عشان يعتقوها وكمان تغيظك

تعالى بقى نحلل وضع كل واحد فيهم واحساسه بالتاني:
بالنسبه ليها :
1- اهلها اكيد ذلنها بعد الفضيحه
2- حاسه بالخيبه لانها لا بتحبه وعارفه انه مش بيحبها وعرفت انه انسان حاقد وكان بيلعب بيها
3- اكيد بتعمل مقارنات بينك وبينه دلوقتى وتندم عليك " واكيد لما كانت مخطوبه ليك كانت بتعمل مقارنات بينكم وكانت النتيجه بتطلع لصالحك عشان كده محاولتش انها تفسخ الخطوبه معاك"
4- هيبدأ يتنطط عليها ويوريها ايام سوده وهيستغل حكاية اهله دي اسوء استغلال بس أتقل

بالنسبه ليه :
1- موقف اهله من الموضوع أكيد مش مبسوطين انه هيرتبط بواحده خاينه
2- هو مش بيحبها وعارف انها خاينه وممكن تخونه فى اى وقت والى رماها عليه انها مزنوقه فيه للخروج من الوضع الهباب الى وقعها فيه
3- هو كان واخد الموضوع لعب ومكنش متوقع ابدا انه ممكن يلبس
4- احساسه انه اتقرطس جه يقرطسك قرطسته انت وشيلته الليله

انا حبيت اني أوريك الصورة بزاوية اوسع عشان تشوف حجم الجحيم الى هما الاتنين عايشين فيه دلوقتي سيبك من الى بيحاولو بينوه للناس عشان يغيظوك وفكر فى كلامي كويس هتلاقي مظبوط