الموضوع: رايك اية في التجنيد الاجباري

المشاركة الأصلية كتبت بواسطة sha2e

اولا : حضرتك قولت ان التعليم الجامعي فى فرنسا مجاني "برغم ان ده يعتبر استثناء فى اغلب الدول المتقدمة" بس مقولتش ان متوسط المصاريف الادارية 1000 يورو يعني حوالي 10000 جنية مصري مش 50 جنيه زي الجامعات المصرية

ثانيا : قبل ما تحكم على حاجه او تتكلم عن مقارنه لازم تبص وتفهم الواقع الاول قبل ما تكتب الكلام الى انت كاتبه عن المقارنات

نبدأ الاول بالمقارنة بالدخل القومي لمصر والدول المتقدمه
مش هدخلك فى متاهات لكن هضربلك مثل بسيط
اهم حاجة طبعا الضرائب شوف هناك الضرائب على الدخل كام وهنا كام
هتلاقي هناك على كل حاجه ضرائب " وبتندفع "
هنا 80% من التجارة غير رسمي والرسمي بيعمل شقلبظات عشان يتهرب من الضرائب

نيجي على المصروفات :
هتلاقي الموازنه العامه للدوله هنا فى مصر متقسمه لاربع تربع :
الربع الاول : الدعم : بترول - طاقة وكهرباء - رغيف عيش ........الخ
الربع الثاني : لسداد الديون واقساط الديون
الربع الثالث : رواتب الموظفين (الى اساسا مش بيشتغلوا واغلبهم عبء على الدوله)
الربع الرابع : الى البلد كلها ماشيا بيه تعليم وصحة وامن و.......الخ

عرفت الفرق بينا وبين الدول المتقدمه

ومع ذلك ذلك البلد بتدعم الفلاح فى التقاوي - الاسمدة - قروض ومبسددهاش -
بتدعم رغيف العيش
بتدعم الكهرباء سواء المصانع او البيوت -
بتدعم البترول سولار بنزين بوتجاز غاز -
بتدعم التعليم والصحة ........الخ


هاتلى دوله واحده فى العالم بتقدم دعم لكل ده او نصهم حتى
حتى لو مش عليها الاعباء الى على مصر وماشيا بكل موازنتها مش اقل من ربعها فقط زي مصر

وعلى فكرة الى بيحصل ده مش شطارة من الحكومة بالعكس ده عبء على البلد والاجيال الجايا لكن الحكومات شايفه الشعب عايز كده وأكتر كمان ومش مهم بكرة
عمر ما البلد دي حالها هيتصلح غير لما كل واحد يفكر ازاي يفيد البلد ويبطل يفكر ازاي يستفيد من البلد وخلاص ومستكتر عليها سنه واحده من عمره

ثالثا : واضح من آخر فقره من كلامك واخد الموضوع بناء على توجهك السياسي وللأسف انا مش عايز انحرف بالموضوع للسكه دي وكلامي اجتماعي واقتصادي فقط

لا سيبنا من السياسة خالص انا مكانش قصدى ده مثال بس عشان ابين قد ايه كل حاجة مختلفة هناك يعنى هما سبقونا بمراحل فى كل حاجة المهم

بالنسبة لفرنسا فالحد الادنى للمرتبات حوالى 1450 يورو فى الشهر يعنى المصاريف الادارية ديه اقل من مرتب شهر ده غير الدخول فى الفرق فى جودة التعليم بين الدولتين فالمبلغ ميعتبرش كبير و مينفعش ان احنا نحول لأن التعليم موجه للفرنسيين نفسهم اللى هم ملهمش اى علاقة بالجنيه المصرى.

معاك ان الضرائب فى اوروبا اعلى بس فيه ناس برضه بتتهرب كتير و بتتحايل على القانون خصوصا اصحاب اعمال صغيرة بس الكبار و اللى معاهم فلوس بيدفعوا ضرايب كتير جدا و ده اللى خلى كتير منهم يسيب فرنسا بعد قوانين الضرايب الجديدة .. طبعا فى مصر العكس تقريبا معظم اللى بيدفع هما اصحاب الاعمال الصغيرة و الحيتان معظمهم بيتهربوا بطريقة او اخرى بس حضرتك نسيت تقول بقى ان الضرايب صحيح كتير فى فرنسا بس الشعب فعلا بياخد خدمات باللى بيدفعوا مش زى مصر بتدفع ضرايب حتى لو مش كتير بس مش بتاخد بيها حاجة ..

الدعم فى مصر فعلا استهبال و الدولة بتدعم حاجات كتير جدا انا معاك فى ديه بس الخدمات تحت الصفر و فيه حاجة زى الجمارك مثلا بتدخل دخل كبير برضه و مش موجودة فى دول كتير او لو موجودة بيبقى فيه بدايل من انتاج البلد نفسها مثلا ..

المهم انا مش مستكتر ان ادى للبلد سنة واحدة بس فعلا السنة ديه بتضيع قولى انا بقدم ايه للبلد لما ادخل الجيش اتهان و اشتغل شغل ملهوش اى علاقة بتعليمى و فى نفس الوقت فعليا انا مش بقدم حاجة يعنى اكيد لو اشتغلت جرسون او ببيع اكل انا كده مش بحمى البلد

لا بالعكس بقى انا السنة ديه برة ممكن اشتغل فى المجال بتاعى و افيد البلد اكتر 100 مرة من دخولى الجيش و تضييع وقت و لا انا بستفيد منه و لا الدولة بتاخد منى حاجة فعليا .. انا شايف ان حضرتك ماشاء الله فاهم و اكيد تعرف اللى بيحصل فى الجيش و ان فعليا الدولة مش بتستفيد من معظم اللى بيدخلوا تجنيد اجبارى