هل يحمى الحجاب الفتيات من التحرش والمعكاسات

**Abdelrahman** · 13-10-2008 02:43 AM

الحجاب عنصر من مجموعة عناصر مهمة جدا بتوافرها جميعا ان شاء الله تشكل حصنا وحماية بأمر الله للبنات
من هذه العناصر
1-التربيه الدينيه الصحيحه
2-اللبس المحتشم
3-الحجاب الشرعي
4-غض البصر
5-الوقار والاستقرار في البيت قدر المستطاع وعدم الخروج للفاضيه والمليانه
6-البعد عن الاختلاط واماكن الاختلاط والشبهات

وبالنسبه للأهل
الحث على الزواج المبكر وتيسير الامر لكل من الطرفين الولد والبنت

**Ramy.Gamal** · 13-10-2008 04:29 AM

انا شايف ان من اهم اسباب انتشار التحرش هو احدى نتائج وثمرات غياب وانعدام الامن ولا فيه دوريات راكبه وتلاقوا المخبرين على المقاهى وامناء الشرطه كل همهم تجميع الاتاوات من الشعب والظباط على مكاتبهم

**Ramy.Gamal** · 13-10-2008 04:38 AM

الواحد بجد بيحترم جدا البنات اللى بيمشوا فى حالهم وبيتجنوا تجمعات الماره وبيكون لبسهم فعلا واسع وطويل بس برده لو اى بنت من دول اضطرت انها تمشى فى مكان فاضى مع وجود شباب ضايع من بتاع المخدرات مش هيهمه حد

**OlaOsman** · 13-10-2008 07:57 AM

طيب ماذا عن التحرش في المواصلات العامة بالمحجبة و الواحدة من دول قاعدة في كرسي جنب الشباك في حالها و المتحرش قاعد في الكرسي اللي وراها على طول و مش شايف منها غير حجابها؟ يعني مش شايف أصلا إذا كانت محجبة حجاب شرعي و لا حجاب مودرن؟ ده يبقى اسمه ايه؟

**fiatto** · 13-10-2008 10:29 AM

المشاركة الأصلية كتبت بواسطة OlaOsman

طيب ماذا عن التحرش في المواصلات العامة بالمحجبة و الواحدة من دول قاعدة في كرسي جنب الشباك في حالها و المتحرش قاعد في الكرسي اللي وراها على طول و مش شايف منها غير حجابها؟ يعني مش شايف أصلا إذا كانت محجبة حجاب شرعي و لا حجاب مودرن؟ ده يبقى اسمه ايه؟

كلام وجيه جدا ومحتاج رد من السادة اللى مركزين بس على البنت على اعتبار انها فتنة تتحرك على قدمين , الكلام اللى بتقوله الاستاذة يتفق مع كلام الاستاذ سبعاوى وانا شايف ان المريض مريض والمنحرف منحرف والمشكلة ان عددهم بقى كبييييييييييييييير جدا فى مجتمعنا هى دى المشكلة اللى المفروض تتناقش ليه عدد المنحرفين كتر بالغباوة دى مش البنت ولا الولد السبب

**Islam_galal** · 13-10-2008 12:53 PM

لا يجب الخلط بين القاعدة و الاستثناء
الفتاه المحترمة و المحجبة حجاب شرعي صحيح عرضه للتحرش ---- نعم و لكن ده يسمي استثناء، القاعدة ان محفزات الشذوذ غير موجوده و بالتالي احتمال التحرش ضعيف جدا
طب ليه في احتمال ضعيف - لان لكل قاعدة شواذ و دايما في ناس شاذة بس أقل بكتير

بشكل عقلاني ، لو شاب عادي خرج الصبح و قابل زمايله و اتفسحوا و اتفرجوا علي فيلم بكل ما فيه من اغراءات و بعدين مساءا شاف بنت او اتنين لابسين زي مانتوا عارفين و الشارع هادي و مايمنعش من نظرتين تمنع و دلال مع وجود يأس من امكانية الزواج و ضعف في الاخلاق و فهم هامشي للدين (ان وجد) ، تفتكروا نسبة ان الموقف يمر علي خير كام؟؟

لو واحدة محجبة حجاب شرعي ، لا تسير في وقت متأخر أو في شوارع مريبة وحدها و تراعي الله في نظراتها و حركاتها ما احتمال حدوث شئ

المرأة مسئولة بنسبة 80% من مشاكل التحرش لانها لديها ما هو بمثابة شمعة الاحتراق (البوجيه) في المحرك

البداية عند المرأة لأنها أهم في التأثير علي المجتمع ككل فهي الأم و الأخت و الزوجة و البنت- هي التي تثير و هي التي تربي و هي التي تسبب العفة و هي التي تزيلها

**OlaOsman** · 13-10-2008 01:30 PM

طيب عودة للسؤال الأصلي انا إجابتي هي إن الحجاب يحمي الفتيات من المعاكسة.. و لكن ليس بالضرورة يحميها من التحرش.

معظم حالات التحرش بتكون من حد مش محتاج أكتر من أنثى.. اما المعاكسة فهي بتكون نوع من جس النبض كمقدمة للتحرش و حتة جس النبض دي لا تأتي غالبا إلا مع مظهر منحل من ناحية الفتاة و مشجع على جس النبض و هي المعاكسة، انما الحجاب أو الاحتشام غالبا ما يمنعوا الدخول في اي مقدمات أصلا.

اما نقطة ان التحرش بالمحجبة حالات فردية أو غير سائد فده للأسف غير صحيح.. الموضوع سائد بدرجة مخيفة في المواصلات العامة و خصوصا في ال CTA و بيعملوها بطريقة ماتبانش خالص و للأسف البنت بتخاف تزعق للمتحرش أو تفضحه عشان بتكون محرجة من الفعل نفسه و بتكتفي بإنها بتقوم من مكانها خالص و تقعد في كرسي يكون وراه سيدة قاعدة مثلا او تقعد جنب حد. طبعا الراجل أو اللي معاه عربية عمره مع هايقدر يقدر حجم التحرشات اللي بتحصل في المواصلات العامة و اللي زي ما اتفقنا المتحرش لا يحتاج فيها أكتر من أنثى بغض النظر محجبة و لا لأ و حجابها شكله ايه.

**fiatto** · 13-10-2008 01:34 PM

المشاركة الأصلية كتبت بواسطة Islam_galal

المرأة مسئولة بنسبة 80% من مشاكل التحرش لانها لديها ما هو بمثابة شمعة الاحتراق (البوجيه) في المحرك

وعشان كدة الحل انها تلبس زى الوهابيات او الافغانيات او البدويات عل وعسى متولعهاش وهى ماشية ! لو الكلام ده صح ابقى تابع نسب التحرش والاغتصاب فى المجتمعات اللى انا ذكرتها برغم ان الست مغطية جسمها كله وماشية بنقاب بعين واحدة !! وبرغم كدة بيحصل تحرش ليـــــــــــــه علشان مفهوم الثقافة الشرقية فى العام والعربية فى الخاص ان الست فتنة تتحرك على قدمين او زى ماحضرتك قلت شمعة الاحتراق , وبناء عليه محدش يلومنى ولا يعتب عليا لو لمحت حتة منها!!
امال ليه مكارم الاخلاق اتعملت عشان لو هى مش محترمة ابقى انا محترم
عليكم وآداب الطريق اللى من ضمنها غض البصر واللى عاوز يغض بصره هيغض بصره راح فين الكلام ده , لا تشتهى امرأة أخيك راح فين الكلام ده .
انا معاك ان خضوع المرأة بالقول والفعل بيطمع الذى فى قلبه مرض , لكن لما اى حاجة ماشية فيها تاء التأنيث تتعاكس يبقى مش فى قلبه مرض ده هو نفسه مرض
والسؤال نعالج المرض ولا نستأصله ولا نستخبى منه

**Islam_galal** · 13-10-2008 02:03 PM

أنا أوضحت و جهة نظري و سأكتفي و لن أعقب
شكرا

hh · 13-10-2008 05:24 PM

المشاركة الأصلية كتبت بواسطة Islam_galal

لا يجب الخلط بين القاعدة و الاستثناء
الفتاه المحترمة و المحجبة حجاب شرعي صحيح عرضه للتحرش ---- نعم و لكن ده يسمي استثناء، القاعدة ان محفزات الشذوذ غير موجوده و بالتالي احتمال التحرش ضعيف جدا
طب ليه في احتمال ضعيف - لان لكل قاعدة شواذ و دايما في ناس شاذة بس أقل بكتير

بشكل عقلاني ، لو شاب عادي خرج الصبح و قابل زمايله و اتفسحوا و اتفرجوا علي فيلم بكل ما فيه من اغراءات و بعدين مساءا شاف بنت او اتنين لابسين زي مانتوا عارفين و الشارع هادي و مايمنعش من نظرتين تمنع و دلال مع وجود يأس من امكانية الزواج و ضعف في الاخلاق و فهم هامشي للدين (ان وجد) ، تفتكروا نسبة ان الموقف يمر علي خير كام؟؟

لو واحدة محجبة حجاب شرعي ، لا تسير في وقت متأخر أو في شوارع مريبة وحدها و تراعي الله في نظراتها و حركاتها ما احتمال حدوث شئ

المرأة مسئولة بنسبة 80% من مشاكل التحرش لانها لديها ما هو بمثابة شمعة الاحتراق (البوجيه) في المحرك

البداية عند المرأة لأنها أهم في التأثير علي المجتمع ككل فهي الأم و الأخت و الزوجة و البنت- هي التي تثير و هي التي تربي و هي التي تسبب العفة و هي التي تزيلها

سيدي الفاضل, رأيك السابق به تجني شديد على الفتيات و السيدات انا واثقة انك لا تتعمده و لكن ببساطة انت و غيرك من الرجال المحترمين لا يتخيلون وجود هذا الكم من المرضى في شوارعنا. التحرش ليس بشئ جديد و لكن ما جد هو وجوده بهذا الشكل العلني و السافر مؤخرا مما سمعناه من تحرش جماعي و نحوه. الواقع اننا جميعا كفتيات و سيدات نتعرض للمضايقات و التحرشات التي تصل في كثير من الاحيان الى مد الايدي. ارجع الى كلام اختنا علا:
"اما نقطة ان التحرش بالمحجبة حالات فردية أو غير سائد فده للأسف غير صحيح.. الموضوع سائد بدرجة مخيفة في المواصلات العامة و خصوصا في ال CTA و بيعملوها بطريقة ماتبانش خالص و للأسف البنت بتخاف تزعق للمتحرش أو تفضحه عشان بتكون محرجة من الفعل نفسه و بتكتفي بإنها بتقوم من مكانها خالص و تقعد في كرسي يكون وراه سيدة قاعدة مثلا او تقعد جنب حد. طبعا الراجل أو اللي معاه عربية عمره مع هايقدر يقدر حجم التحرشات اللي بتحصل في المواصلات العامة و اللي زي ما اتفقنا المتحرش لا يحتاج فيها أكتر من أنثى بغض النظر محجبة و لا لأ و حجابها شكله ايه."

الموضوع ده بجد ما اعتقدش ان في واحدة بتحتاج تركب مواصلات لدراستها او عملها و ما تعرضتلوش قبل كدة!! صدقني انت نفسك ممكن تكون فى سيدات من افراد اسرتك اتعرضوا للحاجات دي بس هي يعني مش حترجع البيت تحكي القرف ده!!!
و مش بس في المواصلات في الشارع كمان بس للاسف الرجالة مش حاسين. انا مرة ايام الجامعة كنت واقفة عند احد اكشاك تصوير الورق -في عز الضهر و انتو عارفين مكاتب التصوير دي بتبقى زحمة قد ايه - و كمان معايا خطيبي (زوجي حاليا), و بعدين شعرت ان في حد - اسفة في التعبير - حط ايده عليا. انا اتنفضت و بصيت للي واقف ورايا و بالصدفة خطيبي كان بيلف فالشخص ده افتكره شافه قام طالع يجرى زي الصاروخ. خطيبي ما كانش فاهم حاجة و سألني ايه اللي حصل فحكيت له. هو طبعا اتجنن و قعد يقوللي كان لازم تزعقي و كان لازم نمسكه نقطعه و الكلام ده, بس طبعا مفيش واحدة في الموقف ده ممكن تتكلم هي يادوب تبعد عنه بسرعة و خلاص و الا مش حتخلص من الافتراءات و البذاءات اللي حيدعيها عليها لو هي قالت حاجة. و هي طبعا قدام الناس المتهمة الاولى و المدانة الوحيدة زي ما اراء اغلب الناس هنا وضحت. على فكرة برضه انا محجبة و مش بلبس بنطلونات خالص و لا بلبس ضيق الحمد لله. و المرة دي ماكانتش اول و لا اخر مرة اتعرض لمضايقات, انا بس بحكيها عشان رد فعل خطيبي و زهوله للموقف عرفني ان الرجالة مش عارفين فعلا حجم القرف اللي احنا بنتعرض له من غير ذنب.
انا ما كنتش عايزة اشارك في الوضوع ده من الاول لأن انا حاسة ان الردود واخده طابع مع او ضد المرأة مش الحجاب او التحرش. بس للأسف النظرة اللي منتشرة في المجتمع دي بتخلي اي واحدة مسكينة تتعرض لحادثة اغتصاب مثلا تعيش ما بقى لها من عمر في عار و فضيحة لأن المجتمع ينظر لها بأنها المجرم الحقيقي اللي اتسبب في اللي حصل و "يستاهل كل اللي يجراله".
و بعدين يا سادة طالما التحرش مش بيحصل غير لو واحدة مش محترمة و لبسها مستفز, تقدروا تقولولي ليه بتحصل حوادث تحرش و اغتصاب لبنات لم يكملوا العشرة سنوات؟؟؟ دول كمان مظهرهم مستفز و جابوه لنفسهم؟
يا اخواني المتحرش انسان غير سوي ما ينفعش تقيس تصرفاته بمنطق او عقل.