الموضوع: تجربتي مع شركة ساندن للتكييف - بالمعادي

أخر تطورات الأوضاع معايا في السيارة الأوكتافيا

ذهبت إلي شركة ساندن في المعادي
و العربية كانت كل شوية بتبطل لدرجة إنها كانت بتبطل و أنا علي سرعة عالية 80 مثلا أو 70
وللأسف كانت بتطل علي غيار الــ(d) و طبعا دة غلط إن تخلي العربية تجري علي هذا الغيار و العربية مبطلة
فكنت بضطر أنقل علي الـــ(n) لغاية ما احاول تدويرها ثم أنقل علي الـــ(d) مرة أخري

و بمجرد وصولي لشركة ساندن العربية بطلت و مش عايزة تدور خالص (يا دوب تسمع صوت المارش فقط) لكن تدوير لاء مفيش

المهم

الأخوة الأفاضل الصنايعية منهم لله و حسبنا الله و نعم الوكيل فيهم كل واحد عمال يرمي الحمل علي الكهربائي و الميكانيكي و يقول إنها مش مشكلتهم

المهم

تم توصيل اللاب توب علي السيارة و هنا ظهر بعض الأخطاء علي البرنامج (بسبب البرجلة و أخطاء ظهرت في التيس و أخطاء أخري)

تم مسحها بالكامل

و هنا بقي جيه أحد الصنايعية و قام بتوصيل جهاز قياس شحن الفريون و قام بفتح محبس الشحن و تفريغ القليل من الفريون من السيارة

و تم التدوير بنجاح و بدون أي مشاكل و التكييف إشتغل حلو جدا و درجة البرودة كانت قليلة شوية يعني التكييف مش ثلاجة بمعني الكلمة يعني ... مجرد هوا ساقع خارج و خلاص بس مش بالقوة المطلوبة

العربية ما بطلتش و لا برجلت زي الأول ... طبعا إستغربت من الموقف ... العربية هادية و كويسة

بالعقل كدة دة عيب إيه بقي

حسبنا الله و نعم الوكيل فيهم علي البهدلة دي كلها

و معاملتهم بعد البيع سيئة للغاية و ردودهم مش مقنعة خالص .. يقولك أصل عيب ميكانيكي و عيب كهربائي
و محدش منهم عايز يطلع نفسه غلطان

و بقوا مش طايقين وجودي بصراحة و لا طايقين العربية

المهم مشيت من عندهم و بقالي أهو أربع ايام العربية مضبوطة كويس و الحمد لله مفيش اي مشاكل

الخلاصة :

شركة ساندن (((حرامية و إستغلاليين))) حرام أدفع في كمبروسر صيني و سربنتينة الله أعلم نوعها و لا بلدها 3800 جنيه
و فلتر التكييف موجود في المحلات ب 90 جنيه ... للأسف إشتريته منهم ب 150 جنيه و يقوللي أصل أبو 90 دة بتاع أوكتافيا a4

دفعت 700 جنيه في خرطوم كان ناقص عندي و لحام خرطوم ألومنيوم كان مقطوع

شركة ساندن مش محترمين في خدمة ما بعد البيع و معاملتهم سيئة للغاية و أسلوب كلامهم إتغير عن الأول


الرجاء من الناس تسأل عن كذا واحد و ماتروحش للناس الغالية و تسأل علي الأنواع و الماركات

و دي مشكلتي إللي أنا وقعت فيها إني ما سألتش و لا لفيت


شركة ساندن عايزة عربيات من الأخر مايكونش فيها أي مشاكل حتي لو بسيطة

عايزين يركبوا و يشتغلوا علي طول و خلاص (((دول صنايعية ليسوا متخصصين)))) أخرهم يشحنوا و خلاص فريون و ياخدوا منك فلوس بأي وسيلة


____ التكييف شغال أه ... بيجيب هوا ساقع أه ..... لكن درجة البرودة قليلة جدا بالمقارنة بعربيات تانية .... ----------

حسبنا الله و نعم الوكيل في كل واحد بيستغل أي زبون مش فاهم