الموضوع: بتعلم سواقه جديد

[justify]بسم الله الرحمن الرحيم
[/justify][justify]انا بفضل ربنا بتعلم سواقه طبعا مش منظرة بس عشان ارحم بنتى من ركوب الباص وبهدلته وهى لسه طفله ما كملتشى 6 سنين
المهم من حوالى 4 سنين بابا كان بيعلمنى والموضوع فشل وحسيت انه صعب ولان فى الوقت دة ما كنتش محتاجه للسواقه اهملت الموضوع خالص
بس دلوقتى ربنا كرمنى بمدربه بتيجى تعلمنى انا واختى على عربيتى 128 من اول يوم نزلنا شوارع زحمه وطلعنا كبرى ونزلنا كبرى ومشنا ولفينا واخدت معاها 3 حصص هو الكورس 5 حصص
انهاردة قلت انزل مع بابا عشان اتمرن وياريتنى ما نزلت من اول ما ركب جنبى وانا اتوترت يمين شمال دوسى بنزين هدى اطلعى التانى لفى الدريكسيون اوى مش اوى كدة وفى الاخر دخلت فى عربيه خدشتها كانت مركونه جنب الرصيف والسبب انى كنت ماشيه وقالى امسكى فرامل بس طبعا بزعيق والنتيجه انى نسيت فين الفرامل وكملت الحمد لله صاحب العربيه طلع شاب محترم وتدارك الموضوع وطلع ذوق الله يكرمه ورجعت منهارة من العياط لدرجه انى قررت انى مش هاسوق تانى
طيب ازاى لما بكون مع المدربه بسوق طبعا مش محترفه بس بمشى لدرجه ان اخر حصه قالتلى انى بقيت اعتمد على نفسى وانى ممتازة
مش عارفه انا متوترة جدا ولولا انى محتاجه انى اتعلم كنت كنسلت الموضوع كله بس بفتكر بنتى وبهدلتها بقول استحمل
هل فعلا هاتعلم وبابا هو اللى كان موترنى ولا مافيش امل
اسفه انى طولت عليكم بس محتاجه رايكم جدا [/justify]

المشاركة الأصلية كتبت بواسطة j a g u a r

الاول خليكى مع المدربه طالما هيا كويسه معاكى ولو حطيتى فى دماغك تتعلمى كويس وتمشى فى الزحمه هاتمشى بس واحده واحده لغايه متاخدى ثقه اكتر .. بس انا من وجه نظرى شايف ان فى الفتره دى هاتسوقى وكل حاجه بس مش هاتبقى متمكنه اوى وكل يوم هايعدى اكيد هاتبقى احسن من الاول .. وعلى فكره دى وجه نظر مش احباط هههه .

متشكرة جدا لرد حضرتك وربنا يسهل واتعلم وهاخد بنصائح حضراتكم واتمرن كويس وابدا بالاماكن الفاضيه
جزاكم الله خيرا جميعا