الموضوع: ألقاب x ألقاب

المشاركة الأصلية كتبت بواسطة kimo-nubira

انا بقول للمكانيكي بتاعى يا دكتور اصل كل ما اروحله يقولي بتشتكتي من ايه :D:D:D

حلو اوي التعليق ده بجد :k48: :k48:

انا بقي صاحب الجراج اللي بركن فيه والسياس اللي شغالين فيه كلهم مش بيقولولي غير يادكتورة (طبعا بين بتتنطق بطريقة مختلفة شوية "داكتورة" :D) وكل ميشوفوني اتفضلي يادكتورة وسع الدكتورة هاتطلع في الاول كنت بقول اصححلهم لكن بعد كده بقيت اضحك واقول اصححلهم علي ايه حلوة دكتورة حلوة انا عشان افهمهم وظيفتي هابذل مجهود يبقي خليني دكتورة وخلاص :D

مرة سايس منهم سألني الا هو صحيح حضرتك دكتورة قلتله الصراحة لا ومش عارفة انتوا جبتوها منين انا موظفة في شركة مش دكتورة خالص :D

اما بقي موضوع الالقاب بالنسبة ليا مع صحابي مالوش مكان لاني الإناسن مش بلقبه يعني ولا كلمة استاذة ولا بشمهندسة ولا دكتورة هي اللي هاتعليني او تنزلني بس انا اتعودت اقول لأي حد غريب ياأستاذ وحضرتك ولو انا عارفة انه مهندس بقوله يابشمهندس (مع انها لما بتجي في وسط الكلام بتخليني اتلغفن :D وانطقها غلط) بس خلاص اتعودت عليها لاني بقالي اكتر من 5 سنين شغالة مع مجتمع 95% منه مهندسين حتى اخويا بقي مهندس يعني بقت في الشغل والبيت كمان :D ده غير اني في ناس هنا في الشركة وفي الشركات المتعاملة معانا وبيبعتولي اميلات فاكراني مهندسة بحكم ان مجال الشركة هندسي احيانا بصححلهم واحيانا بطنش.

اقولكوا بقي على موقع يضحك بجد بخصوص الموضوع ده:
لما كنت في الكلية ومروحة مع واحدة صاحبتي وركبنا ميكروباص فصاحبتي بتقول للسواق على جنب يااسطي راح رد عليها بلهجة استنكار وقالها اسطي؟ :K13: (شوية شوية كان هايديها قلمين :D) فراحت موشوشاني وبتقولي هو انا غلطت امال المفروض اقوله ايه قلتلها تقوليله يابمشهندس يادكترة ياحضرة الضابط ياباشا كده يعني لكن اسطي ايه بس!! كده يفتكرك بتشتميه :D :D
ومن ساعتها وانا اقول لسواق التاكسي على جنب من فضلك او الشارع الجاي لو سمحت حضرتك وبقيت اتكسف من الكلمة دي واخاف اقولها لحد وطبعا مبقتش عارفة اقول للميكانيكي ايه بدل يااسطي وبقيت اندهله بإسمه وخلاص :D

انا اول ماتخرجت كنت لسة عايشة الدور و بحب الناس تقوللي يا باشمهندسة, خصوصا اني كنت بشتغل في مستشفى و كل الناس (ممرضين, عمال...الخ ) بيحاولوا يرفعوا الالقاب من باب عقدة النقص.
دلوقتي مش بتفرق معايا خالص و عمري لما اعرف حد بنفسي ما بقول مهندسة قبل اسمي. اصل لما الواحد بيكبر بيحس قد ايه انه هو اللي بيفرض احترامه على الناس بأسلوبه مش مسألة القاب و بتلاقي اغلب الناس من نفسها بتناديك بلقبك. طبعا انا عشان باشتغل في الاجهزة الطبية ففي ناس كتير من العملاء بيقولولي يا دكتورة:)
اما لما بانادي على حد انا متعودة من صغري (باصرار شديد من والدي و والدتي) ان اي حد كبير لازم يتقال له حضرتك. و طبعا المديرين عندنا في الشركة باناديهم بألقاب يعني باشمهندس, دكتور, أستاذ كل واحد حسب تخصصه. بصراحة انا مش بحب خالص طريقة الاجانب في رفع الالقاب دي, مسألة احترام الاكبر سنا او مقاما دي حاجة من الحاجات الحلوة عندنا و مش شايفة اننا المفروض نقلدهم فيها.
من الالقاب اللي باستعملها كتير كلمة "يا سيدي". لما باطلب حاجة من حد في المكتب, شاي او نسكافيه مثلا او حد من المخزن او السكرتارية يعمللي حاجة بأقول له "شكرا يا سيدي". باكون قصدي ابين له تقديري للعمل اللي هو بيعمله حتى لو بسيط.

حاليا بقى احلى لقب بافرح لما حد يقولهولي هو لقب " أنسة". طبعا ده مش باسمعه غير في الشارع او في المحلات بس بصراحة بأخلف مع اختنا علا و بأكون مبسوطة بيه جدا.



ما تستغربوش, اصل انا متجوزة و عندي بنت عندها سنتين:) فطبعا عشان الستات مخهم صغير اوي في الحاجات دي, باقى فرحانة ان انا لسة الناس بتقوللي يا انسة باعتبار ان ده معناه ان انا شكلي مابقاش "ماداماتي":)