الموضوع: نصيحة لأخوكم الصغير في اختيار سيارة العمر

المشاركة الأصلية كتبت بواسطة kingrab

أنا فى نفس الحيرة بتاعتك وبقالى فترة بلف فى المعارض علشان أجيب عربية للمدام بعد مابعت عربيتها بمبلغ 60000 وكنت عايز أكمل عليها 40000 وأشتريلها زيرو وهقولك النتيجة اللى أنا طلعت بيها من وجهة نظرى وليك الحق فى الإختيار بعد كده
السيارات اللى شوفتها فى الرينج ده كانت كالآتى
1 - جيلى إيمجراند
عربية واسعة جداً وناس كتير مجرباها وفيها تقريباً كل الحاجات اللى إنت عايزها بس لما سألت عليها أحد الأصدقاء شغال فى توكيل غبور قاللى إن العربية فيها مشاكل إلى الآن محلوهاش والله أعلم ... ومانيوال بس 1600 cc كماليتها لذيذه وسعرها 84400
2- بروتون ساجا
سعرها 87900 وأتوماتيك وشكلها من بره معقول وعربية شديده بس شكلها من جوه من وجهة نظرى وحشششش أووووووووووووووووى
3 - بروتون بيرسونا أو جين2
1600 cc سعرهم أتوماتيك حوالى 116000 بس نفس المشكلة بتاعة الخامات والتجهيزات الداخلية ( وحشة أوى )
4 - mg 350
1500 cc سعرها فى أباظة 115000 أتوماتيك ( عامل عليها عرض منزل فيها 8000 جنيه ) ومش هقول عليها واسعة ... هقول عليها بحررررررررر ... وشكلها من جوه ومن بره حلو أوى ... بس معجبتش المدام ليه مش عارف ( وبينى وبينك قلت أحسن علشان ال 15000 ألف الزيادة )
5 - رينو لوجان
1600 cc أعلى فئة فيها بحوالى 98000 ودى فيها كل الحبشتاكانات اللى إنت هتعوزها ومش هتعوزها .. مثبت سرعة وبلوتوث وحساسات وفوجات وجنوط ونافيجيشن ( طب آه والله نافيجيشن ) مع إنى متأكد إنه مش هيبقى شغال .. وطارة مالتى ... موتور ضعيف شوية 87 حصان
خامتها الداخلية مش أد كده والصاج بتاعها خفيف أوى بس شكلها حلو .. الثبات بتاعها على الطريق معرفوش ومانيوال
6 - بيرليانس fsv
1500 cc عربية شكلها حلو من جوه ومن بره بـ 90000 .. سعرها ممتاز.. كماليتها حساسات بس .. واسعة جداً وصاجها محمل أوى .. بس مفيش منها أتوماتيك ... موتور من إنتاج بيرليانس 110 حصان
7 - بيرليانس frv cross
1500 cc عربية برده حلوة وأتوماتيك سعرها 104000 .. موتور من إنتاج ميتسوبيشى 110 حصان برده شكلها برده حلو أوى من بره ومن جوه ... وثباتها على الطريق ناس كتير إتكلمت عليه وقالو إنه ممتاز .. صاجها محمل أوى
8 - ميتسوبيشى أتراج
الأتوماتيك بتاعها الفول أوبشن ب 113000 .. طلعتها فوراً من حسابى .. إستحرمت أدفع أكتر من 100000 فى عربية 1200 cc و 3 سلندر حتى ولو ميتسوبيشى
الخلاصة إننا رسينا تقريباً على عربيتين بعد إستبعاد باقى العربيات
الرينو اللوجان أم 98000 أو frv cross
الرينو فرنساوى تصنيع هندى ... فيها كماليات كتير أوى .. صاجها خفيف وخاماتها الداخلية ضعيفة حبتين .. أكر الأبواب من بره ومن جوه ضعيفة أوى ... مانيوال
البيرليانس مع إنى شايف إن سعرها مبالغ فيه شوية على عربية صينى بس توكيل الشركة البافارية ( توكيل محترم ) وموتور ميتسوبيشى فى ناس كتير إتكلمت عليها فى المنتدى بالخير بالنسبة للعفشة والثبات.. صاجها محمل عن اللوجان بكتييرررر وموتورها أقوى بكتيررر وفوق ده وده أتوماتيك
المساحة الداخلية للإتنين معقولة ومتقاربة لحد كبير
مساحة الشنطة الخلفية لصالح اللوجان بمراحل
فى النهاية أعتقد والله أعلم إن الى الآن أنا بميل للبيرليانس مع إنها صينى
يارب أكون عرفت أفيدك ولو حاجة صغيرة
عموماً بص على العربيات اللى أنا إديتهالك دى كلها

أنا لو عملت المقارنة بتاعتك دي ... مش هاخرج برة عربيتين فقط لا غير

البيرسونا ... لو أنا عايز سيدان قوية وكماليات كويسة وعوامل أمان ممتازة بالنسبة للسوق المصري ... (بالنسبة لي التابلوه بتاعها والتصميم بتاعه غير التقليدي جميل جدا والكاسيت والسماعات بتوعها لوحدهم ثروة) .. هو فرشها بس اللى خامته مش قد كدة ولازم يتعمل جلد هو والأبواب والطارة عشان تستمتع بيها

البريليانس frv cross ... لو أنا عايز كروس عالية شوية وبرضه فيها كل اللى أنت عايزه من كماليات أو عوامل أمان وموتورها برضه كويس مش وحش

وبصراحة أنا شايف إن المدام عندها حق في عدم إعجابها بالـ mg350 ... أنا شايف إن خاماتها سيئة الجودة بمراحل عن الجين 2 أو البيرسونا وغالية قوي على جودة التقفيل دي من عربية صيني ... أنا قبل ما أروح أشوفها تخيلت إني لما أركب عربية صيني بالسعر هاروح ألاقيها كلها من جوة جلد وخشب طبيعي ... لكن ألاقي صيني بالسعر ده وبلاستيك زيه زي بتاع الاسبيرانزا a113 ... يبقى فيه حاجة أنا مش فاهمها

البريليانس برقبتها في كل موديلاتها لو عايز صيني

المشاركة الأصلية كتبت بواسطة abdellatif1987

السلام عليكم

اولا شكرا لاهتمامكم جميعا والمساعدة في الاختيار ولذوقكم طبعا
ومن خلال رحلة بحثي على النت لقيت فعلا هي دي الاختيارات المتاحة بالسعر ده وكنت وصلت ل3 سيارات افاضل بينهم زي ساجا وسويفت و ستيبواي وقلت ان شاء الله هي واحدة منهم.
بس عملت الموضوع دل عشان اشوف لو حد عنده اختيارات تاني انا ممكن اكون معرفهاش .
انا بشكركم تاني وبشكر استاذ kingrab لانه فتح نفسي للبريليانس وممكن ادخلها في اختياراتي وانزل اجربها باذن الله.

لو انت بتقارن بين عربيات صغيرة ويهمك التوفير في الوقود ومش مهم المساحة الداخلية قوي ومقارناتك ما بين ساجا وسويفت وستيب واي ... يبقى الاختيار لازم يبقى السويفت على طول من غير تردد

تقفيلها أحسن من الساجا بكتير
موتورها مش ضعيف أبدا بالعكس كويس جدا عليها وطلعتها حلوة جدا
الساجا موتور أقوى لكن غول بنزين ومافيش فرق في الوسع غير في الشنطة للساجا ... والسويفت فيها سيدان زي الساجا بالضبط .. بس أغلى من 100 .. بتعمل 107

الستيب واي تقفيلها كويس من جوة بالنسبة للموديل الجديد لكن موتور تكنولوجي قديم و8 صباب وضعيف جدا على العربية موتور السويفت الـ 1200 سي سي بيطلع قدرة حصانية 87 حصان الرينو الـ 1600 سي سي يادوب بيطلع 3 حصان زيادة يعني 90 حصان ..


لو مش فارق معاك استهلاك الوقود ويهمك الوسع الداخلي وعايز كروس مش سيدان يبقى أنا شايف إن البريليانس أفضل خيار

لو عايز سيدان وبرضه يهمك الوسع وعايز موتور قوي يبقى البيرسونا أو الجين 2

لو عايز عربية موفرة في الاستهلاك ومش فارق معاك الوسع الداخلي يبقى السويفت على طول (على فكرة السويفت واسعة وكويسة جدا من الصالون هي عيبها الشنطة بتاعتها فقط بالنسبة للهاتش باك ضيقة شويتين) لكن السيدان ليها شنطة معقولة لكن مش كبيرة برضه

المشاركة الأصلية كتبت بواسطة abdellatif1987

دكتور أيمن بشكر حضرتك على اهتمامك وانا فعلا كنت فكرت في البريليانس كروس لكن لما كنت بشوف الستيب واي ماشية في الشارع كنت بتنح :) ولما ركبتها في المعرض كنت مرتاح جدا في قعدتها ووسعها وعلوها عن الارض كمان.
لكن برضه لازم ادي فرصة للبريليانس كروس واركبها عشان اقارن كويس بينهم.
الساجا وكل موديلات بروتون لا يعلى عليها كقوة وثبات انا معاك لكن قفلت منهم عشان سمعة توكيل عز العرب ودي نقطة مهمة جدا.
السويفت انا مش عارف هي فين معارضها او موجودة فين عشان اركبها واجربها لكن من خبرة الناس عنها هنا في المنتدي ان هي خفيفة على السرعات العالية ومفيش برضه معلومات كافية عنها وخايف من التجربة بتاعتها من غير ما اعرف عنها كتير .

الموضوع ده فيه شوية معلومات عن السوزوكي لو ما كنتش شوفته لسة وفيه على صفحة الملف الشخصي بتاعي أرقام وعناوين معارض الوكيل ومراكز الصيانة كنت ناقله من البروشور بتاعهم

http://www.nilemotors.net/Nile/43066...post3875662688

وعايز أقولك إني انهاردة كنت جايب بيها سرعة 100 لأول مرة بعد استلامها وكنت ماشي على طريق فيه شوية ملفات حادة ... وثباتها حلو جدا ما شاء الله في الملفات

هي بس عربية شنطتها صغيرة يعني اعتبرها ولا كأنها موجودة مش هاتنفع غير شنط فرد واحد ... لكن الصالون بتاعها كويس جدا يقترب من البيرسونا في الوسع كمان

ولو اللى موقفك عن البروتون "عز العرب" فقط .. صدقني ما تخليش حاجة زي كدة توقفك ... لأن في مراكز صيانة محترمة زي عصام صفا وناس كثير دلوقتي ممكن تتعامل معاها ... وكمان قطع غيارها بقت في أماكن كثير جدا في القاهرة زي شارع دمشق والمريوطية وناس متخصصة في الحرفيين

غير إن بالنسبة لي مش فارقة من توكيل لتوكيل ... كلهم في مصر مقرفين وما شفتش حد عدل يمكن حتى البافارية بتوع بي إم وبتاع رينو وكيا .. كله وقت الجد ووقت المطالبة بأي حاجة داخل الضمان بيعملوا من بنها لو مش على مزاجهم

ولسة من يومين توكيل البافارية متحول للنيابة العامة بسبب عدم تنفيذه لأوامر جهاز حماية المستهلك بتغيير موتور إحدى السيارات البريليانس وبرضه توكيل تاني مشهور مش فاكر اسمه إيه ... وكيل نيسان برضه من حوالي سنة كدة ولا حاجة

حتى في أمريكا .. لسة توكيل هيونداي مغرمينه هناك 10 ملايين دولار لعدم إبلاغه بعيب في فرامل الأفينسيس ولم يقم بمعالجة أو سحب السيارات المعيبة وإلزامه باستدعائها وسحبها كلها لإصلاحها