الموضوع: يا مدرسينا.. يا

المشاركة الأصلية كتبت بواسطة TaoTao

موضوع قيم جدا وأنا هاستغله لإرجاع الفضل لأصحابه، وأنا أدين لكل من سأذكرهم بالفضل في تعليمي جزاهم الله كل خير:
بدايةً قضيت المرحلة الابتدائية في خمس مدارس، فلم تكن لي ذكريات مع أي من المدرسين إلا في الصف الرابع والخامس (أول مرة اقضي سنتين في نفس المدرسة :)):
أبلة آمال: (طبعا تعليم حكومي وزي ماتفضلت علا كنا بنستعمل أبلة وأستاذ): مُدرسة الرياضيات، كانت بتتنرفز لما نقول حصة "حساب" وتقول "انتو كبرتو خلاص .. المادة اسمها رياضيات".
أبلة آمال كانت تقوم في أول الحصة بطرح سؤال على ما شرحته في الحصة السابقة (الفصل كله بيكون واقف لتحيتها ولا نجلس إلا بعد إجابة السؤال). وفي آخر الحصة تعطينا مسألة لنحلها في الحصة وتقوم بترتيب الطلبة حسب سرعة حل المسألة. نظام فريد في الشرح وإخلاص غريب جداً.
الأهم من كدة أتذكر لأبلة آمال أنها علمتني درسين في التربية لا أنساهما أبداً (حيث كانت تهتم بالتربية أكثر من التعليم) الدرس الأول أن زميلتنا (كانت تنافسني على المركز الأول دائماً) كانت "تطقطق" أصابعها أثناء الكلام .. وحين فعلتها أمام أبلة آمال نهرتها بحزم ورفق مع بعض وقالت "متطقطقيش صوابعك وانتي بتكلمي حد كبير" والدرس الثاني لنفس الفتاة حيث قالت لها الأبلة شيئاً ما فلم تسمعها زميلتنا فسألتها -مستوضحة-: "إيه؟" . وبرضه أبلة آمال نهرتها في رفق وحزم ونصحتها "ماتقوليش إيه .. قولي نعم أو أفندم".
ودرس ثالث افتكرته .. حين طلبت مني القيام بشيء فقلت لها "ماشي" فنهرتني في حزم ورفق :d وقالت: "ماتقولش ماشي" بس ماقالتليش اقول ايه !!
من ساعتها لا أطقطق أصابعي أمام أحد .. وأستعمل "افندم" للاستيضاح .. وأستعمل "تمام" بدلاً من "ماشي"
كانت المدرسة للتربية والتعليم

ياه يا تامر.. هي أبلة آمال كانت من أعضاء جمعية مناهضي كلمة ماشي؟ يا ترى لو عايشة لحد دلوقتي و سمعت اللي تفضل علينا بيه أحمد مكي في فيلم دبور و بيردده الشباب عادي هاتعمل ايه؟ :K15:

انا كنت لسه بقرأ لحضرتك السيرة الذاتية (سنة اولى وظيفة) وفجأة وقف الموضوع فى شهر 8 ومش عارف السبب ولا هو كده الموضوع خلص ؟

المهم خلينا فى الموضوع ده
انا عن نفسى مش فاكر مدرسين تركوا اثر فيا ولكن صدقينى حضرتك لما اقولك ان اكتر ناس تركوا فيا علامات وحددوا بشكل كبير ملامح شخصيتى هما دكاترتى فى كلية الهندسة قسم ميكانيكا قوى (للعلم فقط انا لسا متخرج من شهر ونص يعنى دفعة السنة دى ودلوقتى بخلص فى ورق الجيش وعندى كشف طبى يوم الاربعاء القادم وربنا يستر............ادعولى) لان هذا القسم يحوى عمالقة فى التخصصات النادرة وهم بحق الرجال الذين من دونهم لن تقوم صناعة حقيقية ولان الموضوع يتطلب تحديد شخص محدد بعينه أذكر لكم
الدكتور العلامة / محمد جمال واصل (من اصدقاء دكتور زويل) ..............لماذا ؟
أولا والحمد لله انا من المتفوقين وحصلت على تقدير عام جيد جدا مع مرتبة الشرف وتقدير امتياز فى مشروع التخرج
ولكن هذا الدكتور اعطانى تقدير مقبول فى مادته ايام ما كنت فى اولى ميكانيكا قوى وكنت لسه جديد ومش عارف ليه رغم انى كنت بلغتنا مقفل الامتحان ماعدا فسوة صغيرة ملهاش لازمة ويوم ما انقص فيها كبيرها برده بامر الله امتياز
ولكن الدكتور لما طلعتله وشرحتله الموقف فهمنى حاجة اول مرة اعرفها فى حياتى وهى fatal mistake بمعنى ان فى غلطة ممكن الواحد يعملها وتتسبب فى كوارث وان الغلطة اللى عملتها فى الامتحان وكانت تافهة فى وجهة نظرى هى كارثة لو غلطها فى الحياة العملية وان اللى بيغلط غلطة زى دى معاه بيشيله المادة مفيش كلام وانه حس من طريقة اجابتى انى من المتفوقين فصعبت عليه وقال يعدينى وخلاص
ولهذا السبب لا انسى ابدا دكتور محمد جمال واصل وسنة اولى ميكانيكا لانى لو كنت شيلت مادة فى سنة اولى بعد ما كان ترتيبى التاسع على دفعة اعدادى هندسة كان زمانى مش فارقة معايا ولا كان زمانى اتخرجت بمرتبة ولا حتة مخدة قطن
هذه هى قصتى انا والدكتور

المشاركة الأصلية كتبت بواسطة elbaz45

انا كنت لسه بقرأ لحضرتك السيرة الذاتية (سنة اولى وظيفة) وفجأة وقف الموضوع فى شهر 8 ومش عارف السبب ولا هو كده الموضوع خلص ؟

آه، هو فعلا كده خلص.. ماهو أول سنة وظيفة.. يعني شهر 8 ده كنت خلاص قربت على سنة و الأحداث اللي بعد كده متعلقة بوظيفتي الحالية يعني مافيش حاجة جامدة أوي تتقال :)

شكرا ليك على المتابعة :)

المشاركة الأصلية كتبت بواسطة OlaOsman

آه، هو فعلا كده خلص.. ماهو أول سنة وظيفة.. يعني شهر 8 ده كنت خلاص قربت على سنة و الأحداث اللي بعد كده متعلقة بوظيفتي الحالية يعني مافيش حاجة جامدة أوي تتقال :)

شكرا ليك على المتابعة :)

بامانة مجهود جامد جدا والله الواحد مش عارف يقول ايه الصراحة
وانا بقلب فى المنتدى الاجتماعى لقيت لحضرتك موضوع عن الزواج من اجنبيات وصل 33 صفحة يعنى ما شاء الله تجاوب من الجميع حقيقى منتدى فعال بس الموضوع ده بالذات سخن شوية مش عارف ليه انما الواحد برده استفاد منه رغم انى ليا وجهة نظرى الشخصية بس مش عارف اقولها ولا خلاص حضرتك اكتفيتى من الموضوع ده .........؟

المشاركة الأصلية كتبت بواسطة TaoTao

هي كانت من جمعية مناهضة كل ماهو ضد الذوق والأخلاق الحميدة .. كانت ضد حلاقة الشعر الغريبة .. ضد الصوت العالي .. ضد الكلمات الغير لائقة بنا -كتلامذة- يعني لما قلت "ماشي" قالتلي "ماتقللش ماشي دي أبداً ... انتو ولاد ناس" !!! يعني شايفة إن كلمة "ماشي" مايقولهاش ولاد الناس (وماقالتليش اقول ايه بدلها :)) وفضلت ثلاث سنوات لما آجي اقول الكلمة الوحشة دي ابلع لساني واسكت .. وبعدين اخترعت أو لقطت كلمة "تمام" وهي كلمة عسكرية تماماً. .. بجد جزاها الله كل خير

الكلمتين اللى انا علمتهم فى كلامك فكرونى بمدرسة المنصور الثانوية العسكرية لان كان عندنا المقدم شهبور والرائد مغربى وكانوا من الصاعقة ده طبعا بخلاف العساكر اللى معاهم وكانوا مشيبنا فلك ان تتخيل لو انا رحت المرسة متاخر مثلا ايه اللى هيحصلى يعنى ....؟
هاتعامل معاملة اسرى الحرب زحف على البطن والباقى مينفعش يتقال .....
ولو مثلا كان شعرى طويل ييجى شهبور بنفسه على المنصة ويحلق الشعر على الملأ
وطبعا لو فرض انى كنت ماشى ومش واخد بالى ان سيادة المقدم معدى وانا دايما بحب احط ايدى فى جيوبى (طبع فيا مش ذنب يعنى) يبعتلى عسكرى ويجيبنى على مكتبه علشان يقولى ان لو حصل منى نفس الفعل مرة تانية هتكون العقوبة .......
شوفت كلامك يعم قلب عليا المواجع ازاى...

يعنى حاجة افتكرتها قلت اقولها .......