الموضوع: تعبت من كثره البحث

عايش مستور ؟ صحتك تمام ؟ بتلاقي بيت يسترك ؟ لاقي تاكل وتشرب ؟
لو الاجابه أه . . . . مبروك انت ملك زمانك و وضعك الحالي دا أفضل من 50 مليون مصري أو أكتر
ربنا كاتبلك يا ابن الحلال معاد جوازك و امتي هتخلف و أسماء أولادك ايه قبل ما تتولد أصلا . . . بلاش إكتئاب وارضي باللي ربنا كاتبهولك
نصيبك هايجيلك غصب عنك
وربنا يرزقك بأجمل بنت ف مصر تحبك وتصونك وتجبلك عيال يطلعوا عينك

المشاركة الأصلية كتبت بواسطة engmody32

الموضوع يا جماعه باختصار هو اني شاب عمري 33 سنه شغال في وظيفه تعتبر من امنيات ناس كتير خريج كليه من كليات القمه

بدأت البحث عن عروسه و انا عندي 30 سنه هتقولولي متأخر ليه كده هقولكم علشان انا مكنش عندي حد يساعدني او يديني فلوس تساعدني في الجواز المهم علي سن الثلاثين شوفت ابو بنت و محصلش نصيب و خلال ال 3 سنين اللي بعد كده شوفت حوالي 12 واحده

في ال 12 واحده دول كان في 2 بس تقدر تقول متوسطين و الباقي مقبول الشكل كلهم كانوا دكاتره و صيادله و الكلام ده بس الشكل ضايع اقصد يالشكل الوجه تلالقيه كده صعب تتقبله و تعصر علي نفسك لمونع علشان تقبله

المهم في بعض البنات دول كنت عصرت علي نفسي اللمونه فعلا و قولت اتقدم لهم رغم ان شكلهم مش عاجبني بس تلاقيهم يطلعولك بحاجات زي شقتك بعيده

عايزين شقه قرب بيت ماما علشان كده متنفعناش و الكلام ده

في ال 12 مره اترفضت 6 مرات و رفضت مرات 6

اللي مزعل الواحد بجد انه اتأخر جدا في الجواز و كل زمايلي و صحابي دلوقت عندهم عيال في مدارس و انا لسه مقولتش يا هادي

و الواحد سنه كبر 33 ده مش سن صغير و كمان حتي العرايس اللي بتتعرض علي الواحد بقت اقل بكتير يعني اقعد بالشهور عقبال ما يقولولي في عروسه نروح نشوفها

للأسف انا مش اجتماعي و مش بخرج كتير و كمان الشغل عندي خالي من البنات يعني مينفعش الافي لنفسي عروسه

و من ا لمشاكل اللي لاحظتها ان البنات الحلوه عمرها ما بتيجي عن طريق جواز الصالونات دول بيتجوزوا و يتخطفوا بدري بدري

لكن البنات اللي شكلها مش اوي و مقبول بالعافيه تلاقيهم هما اللي بيجبهوملك في جواز الصالونات علشان دول اصلا فرص جوازهم العاديه ضعيفه جدا

صراحه الواحد حاسس انه عجز و عمره جري منه و حتي لو اتجوز هيجيب عياله و هو الفرق بينه و بينهم كبير عكس ما يخلفهم و هو صغير

و كمان اكيد اللي الواحد هيتجوزها في السن ده هتكون برضه مش هي اللي نفسه فيها لأن مبقاش في ميزه في الواحد الناس تحب تخليه يرتبط ببنتاهم بسببها

يعني من الاخر شقه عاديه و سن كبير و دخل متوسط ايه الميزه اللي في الواحد

انا جوايا كلام كتيرو قصص كتير بس معرفتش اطلع اللي جوايا

معلش صدعتكم بس انا اصلا مكتئب جدا و تعبان من الحوار ده لأني عايش مش لاقي حاجه اعملها و صحابي كلهم اتجوزوا و انشغلوا و الواحد بيقعد بعد الشغل من غيره اي حاجه تشغله او تسليه

١-الشكل ليس المعيار الرئيس لاختيار الزوجه الأهم من ذلك التوافق واقتراب الروءا والاهتمام بالمظهر احيانا يضفي علي الجمال وزواج الصالونات ليس من الضروري ان يكون للبنات الكسر إطلاقا غالبيه الأسر الملتزمة لا يزوجوا بناتهم الا بهذه ألطريقه.
٢-ليس كل من تراهم متزوجين فهم سعداء فالزواج كما له مميزات فله أيضاً صعوبات ومسؤوليات وصداع ووجع دماغ.
٣-اشغل وقتك باي شيء له نفع عليك او علي من حولك.
٤- ما تعبر عنه من ظروف تمر بك مر بها ولازال كل الشباب وهو لا يدعو أبدا للاكتئاب تذكر نعم الله عليك بالوظيفة وغيرها من النعم وعلي رأسها الصحه لو استحضرتك ذلك للحظات ستعلم انك تحيط بك نعم كثيره يفتقدها غيرك ولعل الله يدخر لك زوجه صالحه تقر بها عينك اذا انت أظهرت له رضاك عنه وعن قدره فيك
تحياتي

المشاركة الأصلية كتبت بواسطة engmody32

انا اكيد بشكر ربنا علي كل شئ بس انك تبقي عايش بلا هدف كده شئ متعب احساسك انك بتترفض من ناس اصلا وضعهم اقل منك و اي حد يبص للموضوع من بره يقولك ازاي تفكر ترتبط بالناس دول بيخيلك حاسس انك ملكش قيمه يعني نظام رضينا بالهم و الهم مش راضي بينا

مفيش حد بيعيش وهدفه الجواز وستوب الجواز هو وسيله لترابط المجتمع وسكن للرجل والمراه ولكن أهدافك انت تصنعها لنفسك
اسأل نفسك انت بت ترفض ليه آه سبب الرفض وحاول تحل المشكلة ديه وانت بتتقدم لوحده المره الجايه
حاول تاخد إنسانه من نفس المستوي الاجتماعي علشان لانت ولاهي تتعبوا بعدين

المشاركة الأصلية كتبت بواسطة engmody32

انا اكيد بشكر ربنا علي كل شئ بس انك تبقي عايش بلا هدف كده شئ متعب احساسك انك بتترفض من ناس اصلا وضعهم اقل منك و اي حد يبص للموضوع من بره يقولك ازاي تفكر ترتبط بالناس دول بيخيلك حاسس انك ملكش قيمه يعني نظام رضينا بالهم و الهم مش راضي بينا

هدفك فالحياه عباده المولي سبحانه وتعالي شغلك و نجاحك فالحياه
بالنسبه للي رفضوك هما خسرانين وانت الكسبان متزعلش نفسك
وبالنسبه للجمال انا كنت هخطب "ملكه جمال" وكنا مرتبطين جدا ببعض و هي دكتوره بس تصرفات اهلها معجبتنيش فركشت كل حاجه
اهم حاجه البنت وأهلها وتربيتها ودينها ووسطها الاجتماعي
ربنا يكرمك

المشاركة الأصلية كتبت بواسطة engmody32

و الله يا باشا انا مش بدور علي ملكه جمال صدقني انا بدور علي واحده اعرف ابص في وشها من غير ما احس اني عايز ادور وشي و الله ما عايز اكثر من كده
لكن كل اللي شوفته كان غير كده تلاقي واحده بتبرق علي طول و التانيه وشها متقدرش تبص فيه و و رغم ذلك اقول اظفر بذات الدين يا ابني و اقول احب اقابل والدك بس هما ميوافقوش
الكوميديا ان الدين بتاعهم ده انا مشفتهوش بعيني بس ده علي كلام اللي جايبينهم و مرشحنيهم يعني ممكن كمان ميكونش موجود
الواحد بيحس ساعات انه لو مكنش منشن علي حد من زمان من المعارف او القرايب مش هيعرف يلاقي حد يناسبه خالص

طب ادعي ربنا انك تلاقي ملكه جمال عشان مفيش حاجه كبيره عليه أبدااا