الموضوع: وها قد اصبحت ماروتاوى-تقييم الماروتى بعد اول يوم

سبحان الله العربية دي كله بيشكر فيها.
بس حكاية 3 سليندر دي مش قلق شويه ولا عادي وكمان ان مفيهاش اي كماليات.
سعرها الرسمي دلوقتي 38000 موديل 2009 زي مابيقولو.

الف مبروك ليك يا باشمهندس انت والمدام
ربنا يكفيك شرها يارب و يباركلك فيها

المشاركة الأصلية كتبت بواسطة sab3aawy

هو بصراحة لو اى حد غيرك سأل السؤال ده كنت هقول انه بيضرب اسفين بينى وبين المدام

بس بما انى عارف علا كويس فانا متأكد من حسن النية

ولذلك هشرحلك الحيثيات

1- احنا عاوزين عربية قطع غيارها رخيصة لأن لسة عندنا مشكلة فى التمكن التام من السيارة
2-عايزين عربية صغيرة
3-عاوزين عربية قطع غيارها برة التوكيل ، مش كل ما المدام تطلع بيها فوق رصيف ولا تحرق اسطوانة دبرياج اروح احجز قطعة غيار من التوكيل يجيبوهالى بعد 49 سنة ، او احجز معاد صيانة الألفية اللى جاية، الحاجات دى تناسب خبراءالسواقة اللى مش متوقع منهم مشاكل كتير مع العربية
3-عاوزين عربية اثبتت نفسها فى السوق ومافيهاش مغامرات، يعنى كل العربيات الصينى كانت خارج حساباتنا
4- الفروق بين الماروتى والألتو كانت من وجهة نظرنا فى صالح الماروتى، لأن العشرة آلاف جنيه الفرق بين الماروتى، والألتو الفاضية اللى مافيهاش تكييف مقابل الشكل الخارجى الأحدث بدون اى تطوير فعلى فى السيارة سوى انها بقت انجكشن بدلا من كاربراتير، احنا لقينا اننا اولى بالعشرة آلاف دى، اما التكييف فبأذن الله هنركبه على دخلة الصيف القادم،(مع ملاظة ان الألتو ام تكييف تزيد فوق العشرتلاف تلات تلاف كمان) والحسبة ببساطة ان طالما ان الألتو ام محرك 800 سى سى بيركب لها تكييف يبقى الماروتى ام 800 سى سى يركب لها تكييف ، كما انها آمنة من جهة تركيب تكييف لأن لا حساسات ولا يحزنون ، اما ميزة الماروتى عن الألتو ان قطع غيار الماروتى عند البقالين
5-الفرق بين الماروتى وسيارات نفس الحجم من الشركات الاخرى ذات الأسماء التى يوثق فيها مثل الهيونداى والكيا فرق يشترى عربية تانية فبرضه لقينا اننا اولى بالفرق ده، خصوصا وان تمن الماروتى كان آخرنا فى الكاش وبعد كدة هنقسط، وانا بصراحة بتخنق من التقسيط واجراءاته ووجع قلبه، لأ انا افضل اجيب عربية كاش على قد فلوسى ووقت ما يجيلى تانى اعليها ،

تمام ياباشا انا جبت واحده من 10 ايام فقط
ونفس التقييم مظبوط ماعدا انك راكب مكنسه العربية ممتازه وإن شاء الله إن شاء الله ححافظ عليها لغاية ماسلمها لحد من عيالي زي مكان بيتعمل مع 127 و 128 بس حكاية التكييف انا رأي بلاش لأني لما دورت وسألت وشفت ردود الناس هنا كله مبينصحش بيه لأنه حيأثر علي الماتور سحب وعمر افتراضي
ومتنساش ان الألتو آه 800cc بس حصان أكبر حوالي 42 الي 46 حصان ده بيفرق وكمان الموتور انجكشن
ولكن.....
انا نسيييييت اقولك مبروك عليك وعلينا الماروتي
الأختيار الموفق العقلاني في الوقت الحاضر ولغاي ما.... اسلمها لحد من عيالي...

السلام عليكم

مليون مبروك ليك و لزوجتك و ربنا يجعلها فى ميزان حسناتك لأنك بتفكر تريح زوجتك وده مهم لكل الناس المتزوجين .

أنا بس عايز أعرف منك تعقيباً على ما قولت أن الماروتى تصلح لمشاوير فى وسط البلد !!

طيب لو هروح بيها من أكتوبر لمدينة نصر يبقى كده مش تمام ؟؟؟؟؟؟