الموضوع: شارك ٢٠١٤ ولا كروز ٢٠١٤؟

المشاركة الأصلية كتبت بواسطة ashouhdy

بص يا وليد دة لو اسمك :)
الشارك عربية تحفة
بس لزمانها
يعني 2008 و 2009

العربية عجوزة تصميم قديم يعني ختقول ما انت راكب كروز تصميم من 2010 بس شكلها شبابي و راكب العصر

سيبك من الكروز خلينا في الشارك

العربية عجوزة فعلا. تصميم و موتور

حتي خامات ال 2014 من جوة واقعة و رخيصة و بلاستيك رخيص قوي

حطين في العربية كاسيت احمر سي دي من ام 500 جنية مش حتي built in ذي اخواتها

مفيش برمجة لكنترول العربية مثلا من الكاسيت.

العربية علوها قوي عن بلدها شكلها مش مبلوع

العربية دوشة. مش راكب عربية silent ذي غالبية ال 2014 النضيف

غير كل دة ... مش عائلية ... مفيش عربية عائلة من غير شنطة. ما الكروز الكنبة الخلفية ضيقة و اخرها اتنين. بس فيها شنطة بحر تشيل و تكفي و تفيض.


نرجع للسيراتو ... عربية بتاعت زمانها فرامل كويسة و ايرباج

شكل حديث لسة نازل وملفتة و تحسسك ان راكب 2014

فيها دلع وواسعة و توكيلها حلو واعادة بيعها حلو قوي تتباع وانت بتدوس enter علي كونتاكت كارز!

عزلها معقول وثباتها حلو و تقعد بيها 3 سنين او 4 تحس انك راكب لسة حاجة جديدة


لكن الشارك عربية بقالها 7 سنين ومن جوة مملة و عجوزة قوي.

حجبلك صور ال 3 عربيات من جوة و شوف انت

والله دة رأيي ... ولو انا مكانك ومش فارق معايا قوي حتة القاعدة ااسبورت و العزل الصامت و الثبات اللي فوق المعقول اللي مش حتحتاجة يبقي حدوس في السيراتو من غير تفكير.

Sent from my sm-c115 using forum runner

الاسم صح يا استاذ احمد ... انا مقتنع جداً بكلام حضرتك ان شكلها من جوه قديم ... لكن بالنسبة للموتور المايفيك ده طبيعته ان صوته عالي عشان يدي احساس رياضي و انا اعرف ان سحبه اكتر من رائع ... و الشكل من بره بيختلف فيه الرأي من شخص للتاني و انا شايفها لما نزلت كانت سابقة منافسنها بمراحل لكن دلوقتي بعد ٦ سنين الشكل منقدرش نقول قديم و ممل لكن هو مقبول و يمكن اكتر من السيراتو، الكروز هي اللي شكلها شاددني بصراحة :) ... في الحقيقة كان نفسي مالاقيش و انا بدور على مشاكل فيها بس في حالات استرا و كروز فيهم نفس المشكلة ( رجة لما تهدي و تدوس فرامل و نفس الرجة لما تنقل من n ل r و تبدأ تشيل رجلك من على الفرامل ) و الجدير بالذكر ان في ناس راحوا التوكيل يصلحوها رجعوا و الحالة أسوأ من الأول و المهندسين حتى مش عارفين يرجعوها زي ما كانت بالرجة البسيطة اللي كانت في الأول ... طيب بالنسبة للشنطة انا مباسفرش كتير قد ما بيركب معايا ناس ورى داخل المدينة ... و الشارك بعد الخصومات الجديدة و ان البومة مابقتش تنزل ب abs و وسائل الأمان السوق في اتجاه ان سعر اعادة البيع بتاعها يعلى شوية لأن انا شايفها عاملة انتشار كويس في الفترة الأخيرة ... المشكلة بقى اني صعب اجمع كل حاجة في عربية واحدة و ده اللي ادركته بعد فترة من التدوير لذلك انا هقول لحضرتك تقييمي للتلات عربيات بخبرتي البسيطة و انت تصححلي بردو.

الشارك: شكل قديم من جوة و مقبول لحد كبير من بره ... قطع غيارها غالية شوية بس بحكم انها ياباني فهي معمرة ... علوها من على الأرض ممكن يكون عيب بره مصر لكن في مصر الوضع يختلف مع المطبات اللي عندنا و بيتحول لميزة (ده لو مبيأثرش على الثبات و ده اللي اعرفه عنها) ... صوت الموتور انا مجربتهاش بس انا مليش في الشد قوي فهعتبره عيب ... و بسمع ان العقشة رياضية و اكثر من رائعة.

الكروز: تحس انها عربية بمعنى الكلمة خصوصاً بعد اضافة ال esp ثباتها عالي و شكلاً من جوه و بره مرضي بالنسبالي جداً ... طبعاً عزلها لا غبار عليه ... و عرفت ان الموتور الجديد سحبه أحسن من القديم بكتير ... و تبقى علامة استفهام على الفتيس بالنسبة للعطل اللي ظهر و سوء التعامل من التوكيل سواء مع الأسترا او الكروز ... كذلك ضيق الكنبة الخلفية انا بعتبره عيب بالنسبالي ... بالنسبة لموضوع اعادة البيع فهو اكيد هيتأثر بالسلب لو أصبحت مشكلة الفتيس مشكلة عامة و انا عن نفسي اتمنى تكون حالات فردية لأن انا فعلاً حابب العربية دي ... بالنسبة لقطع الغيار يازيت حضرتك تفيدني بأسعارها.

السيراتو: معنديش معلومات كافية عنها بس واضح ان موتورها قوي جداً ... و زي ما حضرتك بتقول غرقانة أوبشنز ... و بما انها كوري فغالباً قطع غيارها في المتناول بس مش شرط خالص تكون معمرة ... شكلها الخارجي مش مقبول بالنسبالي من اول ما شفتها على الرغم من انها من جوه شيك جداً ،،، و طبعاً الكوري في مصر هو اللي واكل السوق بعد الكورولا بالتحديد ... بس فكرة اني اشتري عربية خليجي و اكتشف لا قدر الله ان فيها عيب صناعة كان المفروض يتحمله توكيلها و اتحمله انا مش مقتنع بيها و لو الاحتمال ١٪ معلش المهندسين بيحسبوا للاحتمالات البعيدة كتير :) ... و عفشتها مظنش انها تستحمل اللي هيستحمله سواء الشارك او الكروز.

كده انا سردت كل المعلومات اللي عندي على الترابيزة و في انتظار استكمال المناقشة القيمة دي مع حضرتك و باقي الأعضاء الكرام.

كروز اكيد افضل

مع احترامى لكلام حضرتك ازاى الشارك مش عائلية هى الشارك اللى حضرتك كانت هاتشباك ؟ حجم الشنطه متوسط وده راجع لكبر حجم الصالون والموضوع ده قتل بحثا فى ناس تفضل كبر الصالون وشنطه متوسطه وفى العكس حسب الاحتياج ثانيا العربية مش اعلى من اللى بتنزل بره ممكن حضرتك تشوف معايير اى بلد هتلاقيها نفس الارتفاع ولو كان الشكل عجوز مكانتش الايفو اتباعت بره بأسعار خرافيه مع الاسف مبتنزلش هنا انا معاك فى نقطه واحده وهى ان التابلوه عادى جدا وديه برده وجهات نظر ناس بيهمها التابلوه اكتر حاجة وناس بتهتم بالعربية من ناحية موتور وعفشة وميكانيكا ولو حضرتك شايف ان الموتور المايفك تكنولوجيا قديمة ممكن حضرتك تقرا عن الموتور المايفك والفى تك وهنا فى مواضيع كتير عن الكلام ده واختلاف الرأى لا يفسد من الود وشكرا

المشاركة الأصلية كتبت بواسطة devil333

كروز اكيد افضل

تمام ايه اسباب حضرتك في الاختيار؟

المشاركة الأصلية كتبت بواسطة ashouhdy

لولا اختلاف للاذواق لبارت السلع :)

وبالنسبة للكروز انا مسمعتش عن اي مشاكل في العربية من ايام موديلات 2010
يعني من 4 سنين لا في مصر او برة مصر

انا مشترك في منتديات اجنبية مقرتش مشكلة واحدة عن فتيس غير ملاك 2010 بس.

مواضيع الرعشة دي عيب بنزين .


غير كدة صل استخارة وروح للي قلبك يستريحلة

اتمني لك اختيار سعيد

وان شاء الله نقول مبروك قريب.

ربنا يقدم اللي فيه الخير عامة انا هتابع اخبار الكروز لمدة ٣ أسابيع و بعدهم ان شاء الله اكون خدت القرار السليم ... شكراَ على تعاونك يا أستاذ أحمد و لو احتجت استشيرك في حاجة هبعتلك على الخاص خليك فاكرني بقى :)

المشاركة الأصلية كتبت بواسطة omar mahmoud

انا افضل الكروز علشان وجود tc,esp,abs,ebd في عربية بالسعر ده فيها كل ده؟؟؟
غير الموتور و الشاسيه و الفتيس
الشارك تقفيل ياباني %100 بس مش كويس عن تجربة و الخامات وحشة و دي حجات متفرقش معايا إنما الكروز كخامات و تقفيل بالنسبالي افضل
بالنسبة للفتيس انا اسمع إن موديل 2010 بس هو اللي فيه مشاكل

حضرتك امتلكت الشارك قد ايه و كانت زيرو ولا لأ؟ بشكل عام انا عجباني الكروز اكتر بس قلقان من الفتيس و التوكيل ... و ربنا يقدم اللي فيه الخير