طيب ممكن حد يتفضل علينا بشرح موضوع مقياس الزيت .. فين أوله من آخره
مع جزيل الشكر مقدماً
عرض للطباعة
طيب ممكن حد يتفضل علينا بشرح موضوع مقياس الزيت .. فين أوله من آخره
مع جزيل الشكر مقدماً
اللينك ده هيساعدك كتير ان شاء الله
http://www.nilemotors.net/Nile/43453...post3875698706
هشام بيه كل الموضوع انه المقياس على المانيوال مش زى ما احنا كنا معتقدين انه المنطقه المشرشره فقط . انا قلت قبل كده انه الكتالوج للاسف بيشرح الفلوينس 1 مش الفيس ليفت و ده اللى عامل بلبله . بعد الاعضاء ما عملوا تغيير زيت و انا منهم تم اكتشاف الاتى :
1- الموتور بياخد 4.3 لتر زيت بالفلتر مش 5 زى ما كنا معتقدين .
2- بعد وضع الكميه دى مظبوطه هاتلاقى المؤشر المانيوال للزيت معدى المنطقه المشرشره و مغطى حرف ال h بعدها و فوق الحرف بحاجه بسيطه زى صورة المهندس هانى ما هيه موضحه .
3- كلنا عربياتنا مستلمينها الزيت حتى العلامه القصوى للمنطقه المشرشره اللى احنا معتقدين انه هو ده مدى القياس الاقصى . يعنى الموتور نازل ناقص نص لتر زيت تقريبا .
4- العداد الديجيتال بتاع الزيت حساس جدا مش زى ما كنا فاكرين انه بيهيس . المنطقه اللى فوق المنطقه المشرشره و اللى فيها حرف h دى بكورتين على الديجيتال و المنطقه المشرشره بكورتين و منطقة ال l بكورتين . علشان كده فيه ناس كتيره و انا منهم يقولوا ازاى عندى الزيت فى المؤشر المانيوال على الحد الاقصى للمنطقه المشرشره و ناقص كورتين فى الديجيتال و قلنا ساعتها انه الديجيتال بيهبل و هو كان مظبوط و الناس اعتقدت انه الزيت بيقل و هو كان جاى ناقص اصلا من المصنع . و طبعا كل واحد كان ينقص عنده الكور فى الديجيتال يروح التوكيل و يقول له الزيت بينقص . التوكيل يسأله العربيه اسلمتهاالزيت كامل ؟ يقول له اه على اساس انه المنطقه المشرشره اللى احنا مستلمين العربيات الزيت عندها . يقولوا له طيب احنا زودنا نص كيلو زيت او 750 جم جرب 1000 كم و رد علينا و طبعا المالك حاطط ايده على قلبه العربيه لسه جديده وواكله اكتر من نص كيلو زيت و ما يعرفش انها جايه ناقصه كده من المصنع .
5 - الموتور موتور نيسان مش رينو علشان كده تعليمات الموتور و الزيت المفروض تكون تبع نيسان و شرح مقياس الزيت المانيوال فى الكتالوج مش ماشى مع الواقع .
6- زيت الفابريكه المفروض يتغير على 1000 مش 10000 كم . ما زال التوكيل بيتعامل مع العربيه على انها فلوينس 1 مع احترامى الكامل لاحترامهم فى معاملة العميل
شكرا
طيب يا ياسر بيه اليك الاتي في صيانه ال 20 الف
خدت الزيت بتاعي كاسترول ايدج 4 لتر و لتر لوحده بس كنت مقلق من اللتر اللي لوحده ده كان قديم شويه
المهم ف التوكيل قولتلهم مش معايا غير 4 لتر زيت حطوهم وانا هبقي ازود مع نفسي قالوللي اوك
المهم خدت العربيه وروحت لقيت المستوي فوق نهايه المنطقه المشرشره ب 2 مللم والديجتال 6 كور مللم
(حطولي 4.3 لتر في صيانه ال 10 الاف واضطريت اسحب الزياده ف الجراج )
حاليا انا عملت بالعربيه 2000 كم والزيت مانقصش سواء عادي او ديجيتال
الاستنتاج :
العربيه دي بتاخد 4 لتر بالفلتر و 4 الا ربع لتر من غير الفلتر (زي المانيوال بتاع العربيه بالظبط ) وانا اتأكدت من ده بنفسي ف عربيه تانيه بتعمل صيانتها عند ميكانيكي عادي قست الزيت فيها وكان مظبوط
السؤال هنا بقا ليه التوكيل مصمم يدفعنا تمن اللتر الزياده اللي مالوش لازمه اساسا غير انك بتدفع تمنه + ممكن يسبب ضرر للموتور
يا باشا الموتور موتور نيسان قشقاى و بياخد 4.3 لتر بالظبط بالفلتر و 4 لتر من غير الفلتر . انا سألت بنفسي فى توكيل نيسان و افتح اى موقع شركة زيوت عالميه و حط نوع العربيه نيسان قشقاى 1600 بنزين او جوك و هاتشوف انه الكميه فعلا اللى بياخدها الموتور 4.3 مكتوبه على المواقع دى .
حضرتك قلت ال 4 لتر وصلوا فوق المنطقه المشرشره ب 2 ملل يعنى لو كملت ال 300 مللى هايغطى فعلا حرف h فى الؤشر المانيوال .
حضرتك سحبت ليه ال 300 مللى ؟ كانت فعلا الكميه مظبوطه بهم 4.3 .
انا غيرت فى مركز صيانه و الكميه برضه اللى اتحطت 4.3 و المؤشر المانيوال كان زى صورة المهندس هانى.
فعلا لو الزيت على اقصى حد فى المنطقه المشرشره بيكون 6 كور ديجيتال لو نزل عن الحد ده مللى هاينقص عندك كورتين على طول .
الغريب بقى انه انا عندى فى المؤشر المانيوال بتاعى علامة حز بعد حرف ال h . المشكله انه مش عارف ارفع الصور
سؤال ياباشمهندس هاني
ما هي وردة مسمار تصفية الزيت ؟
بتبقى تحت المسمار على طول؟ بمعنى انك لو فكيت المسمار او غيرت الزيت بره التوكيل تقع؟؟ ولا محكمة ؟؟
انت عارف الناس اللي بتغير بره ! هاتلاقي فيهم الكويس والوحش!! ممكن تكون وقعت منهم وعادي عندهم!!
أحمد بيه
وردة مسمار تصفية الزيت عبارة عن وردة نحاس .... شكل مقطعها دائرى
يعنى عامله زى الجوان و لكن من النحاس
لما بنربط مسمار تصفية الزيت ...رأس المسمار بتقوم بالزنق على هذه الوردة و مطبقاها فى مكانها ( بتعملها برشام)
فايدتها طبعاً احكام الرباط بتاع المسمار و ضمان عدم تسريب الزيت
المفروض تتغير الوردة دى مع كل غيار زيت علشان المسمار يبرشم عليها صح
طبعاً وارد جداً ان الصنايعى اللى بيغير زيت بره يرميها و ميحطهاش تانى و لو حطها وارد انها تكون فقدت وظيفتها لانها لازم تتغير كل مرة نفك فيها المسمار ( كل ١٠٠٠٠ كم) علشان تطبع مظبوط على راس المسمار
تحياتى