عداد ال rpm عالي

**a7med.7assan** · 30-10-2014 01:59 PM

المشاركة الأصلية كتبت بواسطة viper911

الموضوع بكل بساطه .. أنا فكرت في الموضوع و ايه اللى بيخلي ال rpm يعلى و خصوصا بعد ما العربية بتسخن عادي و كمان على السرعات و قريت في الموضوع لقيت اللى بيتحكم في الموضوع ده الكمبيوتر الخاص بالموتور ده مش عيب فيها و لكن برده هقول ان البرمجه الخاصه بيه و خصوصا في الشيفورليه لانوس مش تمام ...
المهم بقى ايه اللى بيتحكم في السلانسيه بتاع الموتور اللى بيوصله الاشاره من الكمبيوتر ... هو حساس الايدل idle control valve ... الفكره في الصمام ده انه يغير من معدل السلانسيه حسب بروده و كذلك الأحمال الكهربائية على الموتور ... يعني العربية لما بتكون بارده في الصبح بيرفع ال rpm شوية عشان تسخن أسرع .... و كمان لما التكييف و الأنوار كلها بتشتغل بيرفع السرعة شوية عشان يعوض الحمل على الموتور ...
كله ده طبيعي و المفروض يحصل في كل العربيات ...
لكن الحاجه الغلط هو لما العربية ميكنش عليها حمل خالص و ماشية على المور و يكون ال rpm عالي فده بيكون عشان تقليل الانبعاثات و كمان عشان لما تنقل من ترس لترس أو ترجع من وضع المور الى ترس تكون سرعة الموتور قريبه من سرعه الفتيس و ده بيكون مع سرعة العربية و بالتالي في اعتقادهم ان رفع سرعة الموتور بيفيد في الحالات ديه كلها ...لكن بالعكس أنا شايفه بيضر و كمان العربية بحس انها بتجري دايما لوحدها من غير ما أكون دايس بنزين ...
حد هيقولي بطل ترغي و خش في المفيد ..... حاضر حاضر معلش طولت بس لازم أشرح الأول عشان أوصل للنتيجه
اللى أنا بقى عملته اني بكل بساطه دورت العربية و خليت العربية توصل لدرجه حرارة التشغيل و شغلت الأنوار كلها و الكاسيت و لمبه الفرامل و .............. فصلت فيشه حساس الايدل >>
بس كده و بكده لغيت وظيفة الصمام و كمان ثبت وضعه على الحمل و على درجه حراره تشغيل الموتور المثالية
و طلعت أجرب يا معلم .......... انسى احساس تاني تماما على كل السرعات و النقل و كمان طلعت على السريع و جبت 120 و مورت العداد نزل لحد 1100 rpm وفضل عليه بدون أي رجه و لا أي مشكله نهائي و كمان لمبه check engine مش منوره و لا كأن فيه أي حاجه حصلت و ركنت و بطلت و دورت عادي خالص و الدنيا تمام التمام ... :]
حد هيقلولي اللى أنا عملته غلط و هيبوظ و هيعمل ... هقوله أنا قولت أجرب و التجربه نجحت و كمان الحساس ملهوش أي وظيفه غير في التحكم في السلانسيه يعنى لا هيأثر على نسب الخلط و لا على توقيت الشرارة و لا على حاجه نهائي ....
طبعا ليها الحركه ديه سلبيات بيسطه أنا مش انها مشكاه في مقابل الراحه اللى حصلت عليها و كأني سايق عربية تانيه خالص ... و هي ان العربية الصبح محتاجه سنه بنزين عشان أعلى ال rpm شوية لغاية ما تسخن بيسط و بعد كده عادي خالص
و تاني حاجه أنا لسه مجربتهاش مع التكييف لكن أنا حاليا مش بستخدمه و احنا دخلين على الشتا فا لو عمل مشكله مع التكييف يبقى هوصله تاني عادي ....
كل حاجه فيها ميزه و عيب و أنا بالنسبالى التكييف ولا يفرق معايا و كل واحد و راحته

معلش طولت عليكم و اللى يجرب الحركه ديه يكتب النتيجه و يدعيلي ...

طب ده كلام زى الفل .... بس مش ده معناه ان الايديال بايظ ؟ بحكم ان فصله حل المشكله بشكل كبير؟

وعيزين نعرف مع التكيف ياترى ايه الدنيا وخصوصا فى الصيف

ياباشا تسلم ايدك جارى التجربه بامر الله وهقولك ايه اللى جصل

**Viper911** · 31-10-2014 01:06 AM

المشاركة الأصلية كتبت بواسطة a7med.7assan

طب ده كلام زى الفل .... بس مش ده معناه ان الايديال بايظ ؟ بحكم ان فصله حل المشكله بشكل كبير؟

وعيزين نعرف مع التكيف ياترى ايه الدنيا وخصوصا فى الصيف

ياباشا تسلم ايدك جارى التجربه بامر الله وهقولك ايه اللى جصل

مش بايظ و لا حاجة يا باشا كل الموضوع انه مبرمج على السلوك ده
مستني أعرف ايه الأخبار :)

**Viper911** · 01-11-2014 11:52 AM

ايه يا جماعة محدش جرب و قال حاجه ليه ..... أنا عن نفسي الحمد لله الحمد لله العربية بقت تماام و مبسوط جدا بالتعديل الغريب ده ( يحرق منصور زفت و سنينه على غباؤه )

**a7med.7assan** · 01-11-2014 01:23 PM

المشاركة الأصلية كتبت بواسطة viper911

ايه يا جماعة محدش جرب و قال حاجه ليه ..... أنا عن نفسي الحمد لله الحمد لله العربية بقت تماام و مبسوط جدا بالتعديل الغريب ده ( يحرق منصور زفت و سنينه على غباؤه )

يا فايبر باشا انا اتشغلت فى قصه كده وراكن العربيه بقالى يومين ... لكن هجرب يا كبير وكمان انا هعمل زى ما استاذ طارق منسق قسم دايو قال هنظف الايديال وحط ع الاكس باتعه نقظه زيت وركبه وجرب مكنش ... هجرب حل معاليك ... وهقولك ع النتيجه فى الحاله دى والحاله دى ... بس طمنى الدنيا عندك لسه مظبوطه من غير الايديال ؟؟ يا باشا شاكرين مجهودك معانا

**Hossam Elhawy** · 01-11-2014 02:45 PM

حبيبي يا استاذ أحمد كتر خيرك ياباشا علي البحث الرائع ده وجاري التجربه ووليك الحلاوة لو نفعت أن شاء الله

**a7med.7assan** · 01-11-2014 03:09 PM

المشاركة الأصلية كتبت بواسطة hossam elhawy

حبيبي يا استاذ أحمد كتر خيرك ياباشا علي البحث الرائع ده وجاري التجربه ووليك الحلاوة لو نفعت أن شاء الله

ربنا يخليك يا استاذ حسام كلك زوق والله ... ادينا بنحاول نجتهد سوى ونتعلم من باقى الزملاء هنا على وعسى نلاقى ضالتنا ... انا حاولت ع قد مقدرت احلها وسمعت حلول من الاعضاء المحترمين المشكروين جدا بصراحه ... واخيرا هجرب الحلين بتوع استاذ فايبر واستاذ طارق وربنا كريم يا باشا ولو وصلت لحاجه ياريت تبلغنى

تحياتى ليك

**Viper911** · 01-11-2014 05:38 PM

المشاركة الأصلية كتبت بواسطة a7med.7assan

يا فايبر باشا انا اتشغلت فى قصه كده وراكن العربيه بقالى يومين ... لكن هجرب يا كبير وكمان انا هعمل زى ما استاذ طارق منسق قسم دايو قال هنظف الايديال وحط ع الاكس باتعه نقظه زيت وركبه وجرب مكنش ... هجرب حل معاليك ... وهقولك ع النتيجه فى الحاله دى والحاله دى ... بس طمنى الدنيا عندك لسه مظبوطه من غير الايديال ؟؟ يا باشا شاكرين مجهودك معانا

على فكره اسمي محمود :)
نصيحه بلاش موضوع الزيت تماما على الايدل فالف .... الصمام ده بيعدى هواء .. و الهواء ممكن يكون محمل بأتربه .... و كده الزيت هيبقى زي مصيده للتراب و مع الوقت هيتسد و العربية هتبرجل ..
حضرتك جرب الحل انك نفصله الأول و ده الأسهل بس المهم بعد ما العربية تكون سخنت و مشغل كل الكهربه بتاعت العربية ماعدا التكييف

و أنا لغايت دلوقتي أنا شايف ان الأحسن لو أن العربية نزلت من غيرو بجد ... حاجه تانيه خالص بدون الحمدلله أي مشاكل نهائيا

**Viper911** · 04-11-2014 03:20 PM

يعني محدش جرب .... الموضوع اتقفل كده طيب تمام

**a7med.7assan** · 07-11-2014 12:33 AM

استاذ محمود مساء الفل يا باشا
اولا سورى ع التاخير فى الرد بعد التجربه

شوف يا سيدى

انا عملت اللى حضرتك قولت عليه ... وفعلا خليت العربيه سخنت كويس جدا وشغلت كل الاحمال تقريبا من غير التكيف وشيلت فيشة الايديال ... يا باشا النتيجه بالنسبه لل ار بى ام زى الكتاب مقال ... يعنى بقى بينزل بسرعه واستجابه لدواسه البنزين زى الفل وبينزل ونا ممور العربيه فعلا تحت ال 1 وده شىء عجبنى جدا ... ولكن !!!

العربيه اكتر من مره كانت هتبطل منى وكنت لازم الحقها بسنده بنزين عشان الحقها لان المكنه بتبقى خلاص هتموت ولاقى ال ار بى ام نزل وقرب اصلا من الصفر وانا ماشى سلنسيه وتحسها مبرجله ومخنوقه بشكل ما ... وبين النقلات تحس نتشه بسيطه كده .... يعنى حلينا فعلا مشكله علو ال ار بى ام ع حساب حاجات تانيه .. وده من غير تكيف فمبالك بالتكيف ...

المهم بقى ياباشا مخبيش عليك حصلى موقف بقه كنت هعيط لما قررت ارجع الفيشه تانى ...

ركبت الفيشه فعلا وبطلت العربيه .. جيت ادول تانى ... القيلك ال اى بى ام عمال يزيد والمكنه تعلى وكانه دايس الدواسه بتاعت البنزين للارض وال ار بى ام عمال يزيد لحد ملقيته داخل ع 5ونص ... رحت مبطل العربيه واتخضيت ... قولت اجرب ادور تانى ... طبق الاصل العلقه اللى فاتت ... والعربيه تزعق وكانى طاير بيها وال ار بى ام عمال يعد ويزيد اول ملقيه داخل ع بعد ال 5 اروح مبطل العربيه .. قولت طب اعملها ايديل ليرن .... ولا الدموع يا معلم

قولت طيب اشيل الفيشه تانى وشوف حيحصل ايه ... اشيها ودور .... نفس العلقه ... قولت اعمل ايه فى الورطه دى ... اكلم الكهربائى بقه ولا اعمل ايه ... المهم خطر فى بالى ان افصل البطاريه ورجها تانى .. وفعلا فصلتها وستنيت نص ساعه بحالها ودورت الحمد لله لقيتها ظبتت روحت عامل ايديل ليرن وتحركت والحمدلله ظبتت بس برده ال ار بى ام بعد ما رجعت الفيشه وعملت الايديال ليرن بيعلى تانى زى الاول ....

مش عارف بقه اعمل ايه

تحياتى يا باشا

**a7med.7assan** · 07-11-2014 02:56 PM

ياباشا انا نسيت كمان اقولك انى جربت الفكره بتاعت استاذ طارق ونضفت الايديال وحطيت زيت ع الاكس لكنى معرفتش ازيت الاكس كويس ... لكن برده مفيش جديد نفس الحال .... العداد مبينزلش تحت ال 1 غير والعجل واقف تماما

انا شايف ان الحل انى ابيع العربيه واجيب حاجه تانيه غير اللانوس :)