هوندا سيفيك 2015 مقارنة بباقى فئتها من السيارات..أين هى؟

**hany63** · 03-11-2014 05:27 PM

ما تنساش ان الشكل القديم كان مكسر الدنيا
المشكله لما نزل الشكل الجديد مش بالمستوى بتاع القديم مع فقر خامات الصالون بالاضافه للمقوله السائده باءن قطع غيارها نار فالناس اتجهت لعربيات تانيه في نفس الفئه
مع العلم ان تم تدارك جميع عيوب الشكل السابق من ارتفاع و رعشة الموتور عند تشغيل التكييف و قوة الفرامل
و على مستوى الاداء العربيه سواقتها امتع من الشكل السابق تحسها رشيقه اكتر
من الاخر عربيه تستحق الاقتناء و ممكن تركبها سنين طويله من الزيرو و كل اللي يتصرف عليها كصيانه ١٥٠٠ جنيه خلاف الزيت و الفلتر

**ENG.MaRk** · 04-11-2014 01:49 AM

بص يا باشا طبعا كلنا متفقين إن الشعب المصري كله بلا استثناء حافظ مش فاهم و كمان مش بيحاول يفهم ... السبب الرئيسي لعدم انتشار السيفيك بالرغم من مميزاتها هي ثقافة الشعب اللي حتي الأن لسة متأثرة بمشكلة الخلوص (الارتفاع) اللي في الجيل الأقدم من الحالي و لكن أنا أشهد إني لما سوقتها (2013) و كنا راكبين فيها 4 و عدينا علي مطبات عالية اندهشت من أدائها و بصراحة ماكنتش مصدق إني راكب سيفيك لأني كان عندي نفس عقدة الشعب ... أنا لو حاليا حبيت أغير هجيب سيفيك وش !!!

**a.said.awaada** · 04-11-2014 03:04 AM

بص يا باشا انا معايا هوندا 2004 سيفيك ....الهوندا عربية ممتازة جداا كموتور و عفشة و تحمل و اداء ززالشكل الحديد مكنش اد كدا....ثانيا زي ما حد كتب قطع الغيار غالية اوي ...يعني الطنبورة الواحدة ب 1250 يعني الطقم ب 5000 جنيه....طقم السيور كامل باور و كاتينة و دينمو في حدود 800 جنيه....قلتر هواء ب 220 و فلتر بنزين ب 360 .....طبعا هو ده السبب الرئيسي و كمان العربية 2014 فقيرة جدا في الامكانيات مقارنة بالسوق.....لكن لو بتدور علي عربية موتور و اداء و ثبااااااااااااااااااااااا اات يبقي الهوندا بعد الالماني

**melouk1** · 04-11-2014 03:21 AM

الهوندا وصلت القمة و المجد مع موديل الجيل الثامين من السيفيك
كانت طيارة وقتها شيء خيالي بكل شكلها بره وجوه مع عيوب عبيطه لا تذكر
طبعا كل الناس تخيلت ان الموديل اللي جاي هيكون f16 في العربيات
اتصدمنا بشكل العربيه ، فيه فرق بين الابداع و اني بعمل حاجة جديده و خلاص
وكان تعليق المجلات العالمية المتخصصه ان هوندا رجعت بالزمن !!
طيب العربية فيها ايه يشدك عشان تشتريها ، طبعا فيها كل الاعتماديه
طيب ده جميل ، لكن اديني حاجات من هوندا في ٢٠١٥ تقنعني اشتري
فين الموتور الجديد ؟؟؟؟ ليه هوندا حاطه موتور و فتيس ٢٠٠٧ !!!!؟
ليه العربيه من جوه رغم تصميمها الجميل ليه بلاستك ؟ متقوليش نوعه حلو و جميل
و مش بيعمل ريحة و مش بيزيق ولا كل الكلام ده يفرق معايا لاني ركبت عربيات في التسعينات
تابلوه طري بملمس الجلد و السيفيك معودانا على الابداع و للاسف خسرت الابداع في العربيه اخر جيل
كل اللي قدمته زرار اخضر بتاع eco ، حتى الفوانيس مفيش ليد العربيه ناقصها اوبشن بالهبل !!
طيب موضوع. قطع الغيار اصلا كله زي بعضه الكوري اغلى والله في حاجات
لكن. فين. سيفيك. الاسطورة. ؟ الاجابه استنى الجيل اللي جاي و كل سنه وانت طيب

**Ahmed Anwer** · 04-11-2014 03:21 AM

أولا أنا رافض تماما فكرة إن الزبون المصري حافظ مش فاهم

و بيقلد و خلاص ،،

و أكبر دليل علي كده الفلوينس و نجاحها ،

قدمت عربية كويسة بسعر مناسب و خدمة ما بعد بيع مناسبة و اثبت كفائتها

هتبيع و تنجح

يعني مش قصة ماركات و ماركات ،،

و يعني الهوندا ماركة ليها تاريخ في مصر مش تاريخ سئ زي الرينو مثلا

السيفيك السبب الواضح للجميع الشكل الغير عاطفي

ممكن يكون فيه حاجة في السوق خفية تانية

أنا سألت عليها في معرض عربيات قالي مفيش منها موديلات ٢٠١٥

و فيه موديلات ٢٠١٣ !!!

لأنها ما بتبيعش ، مش فاهم هل التجار بيموتوها

لأسباب خفية ، غباء من التوكيل مثلا

و لا فيه ايه ،،

**ENG.MaRk** · 04-11-2014 05:36 PM

بص يا باشا أنا لما باجي أشتري عربية الشكل بالنسبة لي عامل من العوامل مش السبب الرئيسي اللي هيخليني ماركبش عربية روعة زي ديه !!!
الفلوانس طبعا سوقها ماشي عنب عشان هي عربية محترمة فعلا و أوبشنز روعة من أول الفئة التانية ... بصراحة الفلوانس is a car to buy عشان هي the best value for money ...أنا شايف إنها ناقصها موتور أقوي ... لو ركبوله تربو و عرفوا يوصلوه ل 140-150 حصان مثلا و زودولها esp هتبقي أحسن عربية في فئتها و تحدي ... بالنسبة بقي لثقافة الشعب اللي حضرتك معترض عليها نتكلم بقي شوية في الموضوع ده ... أولا انت في شهر واحد تقدر تقلل مبيعات عربية معينة للنص لو افتيت و قولت إنها مليانة مشاكل زي مثلا نقص الزيت في الفلوانس و الذي منه ... الفكرة يا باشا إن المبالغ اللي بتتدفع في العربيات عندنا مش قليلة خالص ف الواحد بيفكر في أحسن حاجة يجيبها بالمتاح و عشان كدة بمجرد ما يسمع إن في عربية اتنين مختلفين عليها بيبعد عنها ... يعني باختصار محدش بيحب يغامر !!!
بصراحة العربيات أرزاق (اه أرزاق) ... الفلوانس معايا (2011) ما عطلتش ولا مرة و لا حصل فيها أي مشكلة (الحمد لله فضل و نعمة من عند ربنا) و مع ذلك واحد صاحبي كان مشتري عربيته (فلوانس) معايا في نفس اليوم و من نفس المعرض و فضلت مغلباه أربع شهور و باعها في الاخر بخسارة و جاب سيفيك 2010 !!!
اللي أقصده يعني إن العربيات مظلومة جامد في مصر و مستقبلها مش باينله ملامح خالص و تحب أقولك حاجة كمان ... بعد خمس سنين العربيات الصيني مش هتخرج برة المقارنات تاني و سعرها هيلعب في السماء و لو حابب تشوف دليل بنفسك ممكن تتفرج علي (توب جير) ... كانوا عاملين مقارنة بين العربيات الصيني من خمس سنين و دلوقتي !!!

**riko8888** · 04-11-2014 08:58 PM

اعتقد والله اعلم ان هوندا سيفيك 2014 تركى مش يابانى والفئه الاولى فاضيه و ب 195000 اشتريها ليه والاوكتافيا 2015 الفئه الاولى الفاضيه ب 190000

**M.Elwan** · 04-11-2014 10:16 PM

يا جماعة العربية بتبيع في الخليج كويس ده من واقع مشاهدتي في الإمارات والسعودية بس شكلها مختلف من الخلف ومحرك ١.٨ ivtecc

بالمناسبة اللي ما شافش الفيديو بتاع Honda the other side ماشافش اعلانات قبل كده
The Other Side of Honda