اقتباس المشاركة الأصلية كتبت بواسطة باسم يوسف مشاهدة المشاركة

يا استاذ محمد

لو كنت قريت العنوان كويس كنت هتشوف كلمه معظم

انا لا اسب احد

و لكن انا بتكلم عن صفات عقيمه متأصله في معظم الشعب المصري

انا لا لمونه و لا زتونه

و حاول تتكلم في صلب الموضوع افضل

يمكن تلاقي رأيي صح

تحياتي لحضرتك
ماهو ده صلب الموضوع يا أستاذ باسم ... كلنا عارفين ان بلدنا حالها مايسرش وشعبنا عنده عيوب ...بس مش لازم كلنا نشتم الشعب ونوصفه بقلة الأدب والجهل والسطحية...الخ من اللى انت كاتبه وكنت كاتبه فى العنوان قبل تصحيح الادارة.... كل موضوعاتك سلبية للغاية ... موضوع تهاجم فيه كبار السن لأنهم بيعطلوا حضرتك فى السواقة وبيمشوا بالراحة بشنط الخضار ولازم ينضربوا بالنار عشان بيمسكوا موبايلات تاتش وهما مالهمش فيها..... وموضوع تشتم فيه البلد واللى فيها عشان مجرد جمعية نسائية هايفة بتقترح اقتراح واتعاملت مع الخبر انه حقيقة مسلم بيها ... وموضوع مش عاجبك التجنيد والمجندين وعايز التجنيد اختيارى مش اجبارى طبعا مع كوكتيل من السياسة

كل ده وطبعا انت اللى من الفئة المختارة اللى مافيهاش كل العيوب دى ... وانت وعائلتك ومن تعرفهم ليسوا جزء من هذا الفشل المتتالى لأنكم لستم جزء من المعظم ... انت واعى وواخد بالك من كل السلبيات لكن كل الشعب (أو معظمه اللى هو طبعا بعيد عنك وعن عائلتك وأصحابك وأحبابك) كلهم وحشين وولاد كذا فى كذا

انت حر تكتب اللى انت عايزه ...بس كفاية طاقة سلبية ياراجل ...خلليها حتى موضوع وموضوع ...بلاش كمية النرفزة الأوفر اللى بتوصف بيها أهلك وأهلى وأهلنا كلهم فى مصر

ولو كنت بتحاول بالمواضيع دى تبرر لنفسك صحة قرارك بالهجرة من البلد فصدقنى انت مش محتاج ده.... انت صح... هاجر منها وسيبها للناس اللى زينا ووللمجندين اجباريا وللعواجيز اللى بيمسكوا موبايلات تاتش مش زراير وبيمشوا بالراحة وبيسوقوا بالراحة.... سيبها لنا تولع فينا وبينا ...أو ربنا يكرمنا ويتصلح حالها بينا برضه...... بس لو ربنا أراد واتصلح حالها ماتفكرش ترجعلها تانى
عشان ده شعب مايستاهلكش.