الموضوع: جربت تحب عربيتك؟؟

زى المثل ما بيقول المعاملة بالمثل
فالعربية حتى لو كانت جماد بس لو معرتهاش مش هترعيك
فعلا انا بحب عربيتى جدا و ليها مكان فى قلبى و هيفضل طول العمر حتى لو ركبت ميت عربية بعد كده

موضوع جميل :) . فعلا فيه علاقه نفسيه و غير مرئيه بين الانسان و الجماد . دى حقيقه .

فعلا لازم الواحد يكون عنده احساس بعربيته وكل ما تحس بيها اكتر وتحبها اكتر هاتعيش معاك اكتر
تمممممممام

فيه مواقف بتخلينى احب العربيه و فيه مواقفه تانيه بتزعلنى منها و نفس الكلام بالنسبه للعربيه اكيد بتزعل منى فأوقات و كتير فعلا بحس ان العربيه مبسوطه و فرحانه خصوصا بعد الصيانه او التنظيف و الغسيل
فيه ذكرايات مع العربيه لا تنسى ابدا و بتفضل فالذاكره حتى بعد بيع العربيه و اصعب قرار هو قرار البيع و انا مش هنسى ابدا اليوم اللى قررت فيه بيع العربيه القديمه لانها كانت عزيزه عليا جدا جدا جدا و شوفت معاها اسعد يوم فحياتى و اتحقق فاليوم ده اجمل امنيه اتمنتها بس للأسف قرار البيع كان من اهم اسبابه هو اليوم ده المهم كنت عارض العربيه للبيع و لما حد يكلمنى علشان يشوفها كنت بتمنى ان البيع ميكملش بس الحمد لله اتباعت بس لسه كل الذكريات محفوره فالذاكره خصوصا اليوم ده

كلام جميل وواقعى جدا
انا بحس انها بيتى التانى
بحبه ،باستريح له ،باهتم بيه
وازعل واحس انى ناقصنى
حاجه لو بعيده عنى

اييييية يا رجالة كله اتحول لسومة العاشق كدة لييية

على فكرة انا بردو كدة مثلا العربية لو فيها مشكلة بكون مضايق عشانها جدا زى ما يكون حد من اولادى عيان

المشاركة الأصلية كتبت بواسطة rotanamasoud

ده انا بموت فى عربيتى وبعتبرها المدام وبزعل جدا وانا ببيعها عند البيع وعلى فكره بحس انه شعور متبادل ووصلت مره انى كنت بعد معاها فى الجراج بالسعات والحاج ندالى وقالى حامل وله لسه

ههههههههههههه اللي جابلك يخليلك
انا خطيبي بقى بيغير منها بجد و يا سلام على كمية "انتي مجنونه يا بنتي؟؟" اللي بسمعها لما بقعد اكلم العربيه بجد بحبهاااا

المشاركة الأصلية كتبت بواسطة خالد دياب

انا مبسوط اني بسمع الكلام ده من حد يمكن كلام جديد علينا بس كلام يتحس

اهم حاجه انه وصلكوا انا عايزه اقول ايه.. عشان بجد يمكن الناس تفتكره كلام اهبل بس بيفرق فعلا لما تشوف واحد وعربيته كإنهم حته واحده و الواحد مهما ركب عربيات حديثه و ينبهر بيها بس مفيش احساس بالأمان تحسه زي عربيتك اللي تحسها فاهماك كإنها حته منك..

المشاركة الأصلية كتبت بواسطة ARKOON

حب حياتي النيسان التيما بمحكرها الستة سلندر l 2.4 وصوتها اول ما اصحيها من النوم ذكريات لا تنسى : )

ااااااه صوت عربيتك دايما تحس انه انه مزيكا و السته سلندر دول حاجه كده تصحى عليها من النوم مبتسم و متفاءل كده
انا كنت حاطه صوت ماتور العربيه منبه

المشاركة الأصلية كتبت بواسطة J A G U A R

موضوع جميل

بالنسبه ليا طالما العربيه مريحانى اكيد هاحبها وعمرى مش هابخل عليها بحاجه وهادلعها كمان
ده انا لسه متعارك النهارده مع سواق مشروع علشانها :)
بس لازم برضه منساش التانيه :)

متعارك و مشروع.. أهلا بأهل اسكندريه.. اسمع ان عندكوا مازاراتي وفيراري و جاغ و حاجات مش كويسه كتير
ربنا يخليهوملك تحس ان العربيه دي الحته الشمال كده
انا كل يوم و التاني خناقه مع سواقين ميكروباصات بردو
انا في واحد كسر عليا في مره روحت معدياه و كاسره عليه و فضلت واقفه قدامه لحد ما كان هيتشل عشان لما كسر عليا قفلي المرايه و عمل فيها خدش كده ييجي 2 سم بحالهم
ده كإنه ضرب ابني اتخيل بقى !! الناس في الميكروباص بقوا يتحايلوا عليا اسيبه يمشي اقولهم ده كسر عليا و شتمني مش همشي الا لما يعتذر :D
ومشيت بعد ما اعتذر

المشاركة الأصلية كتبت بواسطة kokowasfy

العربية وسيلة مواصلات مهمتها تروح المشوار و ترجع موضوع الحب و الغرام فى العربية دى غيبة دى جماد هتقمرو يخش يمين هيدخل هتقمرى شمال بردو هيدخل هتمرى يخش فى حيطة بردو هيدخل لولا العنصر البشرى الى سايق العربية مكنش العربية اتحركت من مكانها اصلا لولا انتى بدوسي على الفرامل كانت لبست فى اى حاجة دا جماد لا يحس ولا يشعر صحيح كل واحد ممكن بيحب و سيلة مواصلاتة لكن مش غرام يعنى و اية الى يفرق العربية دى عن دى الصيانة و موعيدها و الصيانة و الكشف الدورى على العربية يعنى مقولش دى عربية اصيلة و انفض للصيانة هيجى يوم و هتعطل عادى جدا دا حديد

انا استحاله اتفق معاك لإن انت زي ما بتقول العربيات تؤمرها تمشي هتمشي صح؟؟ طب لما تكون في موقف وعارف ان عربيتك مقدرتها متجبش مثلا الغرزه دي او فراملها مش قويه انها تسعفك اصلا و فجأه تلاقيها عملت اللي أنقذك من الموقف ده و عملت فوق طاقتها و قدراتها بمراحل ده يبقى ايه؟؟
وانا زي ما قلتلك هيا اعتقادات يعني انا مؤمنه ان الجماد react مع البني آدمين ممكن افهمهالك بطريقه علميه شويه
الجماد ده ذرات صح؟؟ مش الذرات بتتأثر بالمجال الكهرومغناطيسي؟؟ كل بني آدم بتبقى حواليه هاله او شحنه كهربيه بتعبر عن اللي حاسس بيه
يعني تبقى موجبه عند الاحساس السلبي و سالبه عند الإحساس الإيجابي
يعني بالموجات اللي جسمنا بيطلعها دي او الشحنات الكهربيه دي ممكن تأثر على ذرات الجماد ده بطريقه او تانيه صح؟؟ ليه بقى احساسك ناحية عربيتك مبيأثرش عليها؟؟