الموضوع: برجاء المساعدة :مشاكل ما بعد الصيانة واكواد بعد الاعطال الغير مفسرة

المشاركة الأصلية كتبت بواسطة ayman hamdy

بعد اذن طبعا الباشمهندس / احمد عبد الفتاح
سبب استهلاك البنزين الاساسى هو من الكولانت سينسور لانه المسؤول الرئيسى لارسال اشارته مباشرة لكمبيوتر الموتور عن درجة حرارة ماء تبريد الموتور يعنى بالبلدى كدة يقول لكمبيوتر الموتور ان الموتور سخن ولا لسة محتاج يسخن شوية ليصل الى درجة حرارة التشغيل الطبيعىية وبالتالى كمبيوتر الموتور بياخد الاشارة غلط من الحساس دة علشان بايظ او مفصول فيشته مثلا ويقوم كمبيوتر الموتور مباشرة معطى امر للرشاشات بزيادة ضخ كمية البنزين فيها كتصرف تلقائ او احترازى على اساس ان الموتور لسة بارد ومحتاج يسخن ليصل الى درجة حرارة التشغيل الطبيعية وبالتالى هتظل الرشاشات ترش بنزين كتير على طول على هذا الاعتقاد وتركب ورا حضرتك شاحنة نقل بترول علشان تكفى هههههههههه
وبالتالى هتلاقى برجلة فى دوران الموتور ودخنة سوداء نتيجة عدم الحرق الجيد( بنزين زيادة والموتور اصلا سخن يعنى المفروض يقل مش يزيد مع كمية الهواء اللى داخلة مع شحنة البنزين )
شوف فيشة الحساس دا الاول او غيره لو بايظ وكل حاجة هتظبط
تحياتى

الله يباركلك يا استاذ ايمن

هو شكله موصلهاش او مركبهاش كويس اكيد لان قبل الصيانة العربية كانت تمام ميكانيكة وكهربة

بس الحساس ده فين واوصله ازاي؟

المشاركة الأصلية كتبت بواسطة م/أحمد عبد الفتاح

ببساطة ال حساس بتاع ميه التبريد إللى هو أول عطل ده مصيبة فى البنزين علشان المفروض والعربية باردة وتيجى تدورها بيبعت إشارة للكمبيوتر بإنه يفتح البنزين كتير علشان العربية تدور وكل العربية ماتسخن الإشارة إللى رايحة من سنسور التبريد للكمبيوتر بتخلى الكمبيوتر يقلل البنزين شوية بشوية - طبعاً لما يكون السينسور بايظ حايعمل نفسه من بنها ولا حيقول للكمبيوتر إن العربية سخنت ولا أى حاجه وحايفضل الكمبيوتر عايش فى سعادة زى الأهبل ومش حاسس إن العربية سخنت ويفضل يدى فى بنزين وإنت تدفع :)
بالنسبة للأخت التانية الإير بمب دى بتسبب إن عدد لفات الموتور يعلى ويقل وكمان بتعمل صوت عالى شوية وعادم كتير ودى وظيفتها إنها تدخل شوية هوا بالأكسجين على العادم فى المانيفولد بتاع العادم علشان تحرق البنزين إللى متحرقش فى الموتور قبل مايطلع من الجاكمان تقوم تقلل التلوث علشان البيئة وكمان فى بداية التشغيل بتخلى الكتاليست ( علبة البيئة فى الجاكمان) تسخن بسرعه علشان المواد اللى فيها تتنشط وتنقى العادم ومياثرش على البيئة وطبعاً لما مابتقومش بدورها والعادم يطلع فيه شوية بنزين يقوم حساس الأكسجين يدى إشارة للكمبيوتر بإن البنزين كتير ولازم تقلل البنزين يامعلم :) بس على مين :) الأخ بتاع بنها الأولانى (حساس حرارة التبريد) ده هو الكبير بتاع القعدة :) وإشارته هى رقم (١) فى التنفيذ فالكمبيوتر يروح مزود البنزين لأنه حاسس إن العربية باردة وبالخناق ده العربية بتلعب معاك ار بى ام
ده الموضوع ببساطة لأنه معقد شوية بس أتعشم تكون هرشت القصة وربنا يوفقك

اللهم صل على النبي

ايه الحلاوة دي يا بشمهندس شرح وافي وكافي وفعلا السهل الممتنع

جزاك الله كل خير انت وكل اهل المنتدي ع العلم اللي بتزودونا بيه

المشاركة الأصلية كتبت بواسطة م/أحمد عبد الفتاح

أعتقد بيبقى فى كوعة الترموستات

هبص عليه الصبح واحاول اوصله ان شاء الله

معلش تعبتك معايا يا بشمهندس