الموضوع: مشكله مع الموتور الجديد

المشاركة الأصلية كتبت بواسطة ehab mobarak

العربيه ما بتسحبش عشان الاسبراتير عايز يتظبط الكهربا ماخره شويه وعايزة تتزود اما التنتيش ممكن يكون من البوجيهات او من بكات الكربراتير تكون العربيه مخنوقة شويه حاول تكبر بك المرحلة الاولي خليه ازيدمن 92.5 شويه وغير كاتينة التقسيمة عشان رجة الوقفة دي تروح وحط صفيحة 92 مع ال80 وجرب

طب ينفع اخود الكاتينه ديه من الموتور القديم
والكاتينه ممكن تنتش العربيه وانا ماشي ولا اخرها الرجه اللي بتحصل مع التبطيل

الكاتينة ممكن تعمل الرجة لكن مش التنتيش لكن الكهربا هي المسئولة عن التنتبش سواء الموبينة او ملف الاسبراتير او البوجيهات او سلك البوجيهات بس البوجيهات في الأول وبعد كده الكربراتير وممكن تفك الكاتينة من الموتور القديم وتركبها في الجديد لو انت ضامن حالتها كويس ومتنساش عشان مشكلة السحب اللي عندك انك تزود الكهربا سنه وتجربها
جرب حاجة حاجة البوجيهات والسلك واللي بعده
احب اقولك علي طريقة ترجع البوجيهات زي الجديدة احرقها .... تحل البوجيها وتسخنها علي النار (علي البوتاجاز) لحد ما تحمر وانت ماسكها بالبنزة السن والسراميك وتسيبها لما تبرد وبعد كده بفرشة سلك وتنضفها وتظبط الخلوص بتاعها علي 0.8 مللي وسنفرها وركبها بعد كده بدل ما تشتري جديد وجرب انا باعمل كده في اغلب الأحيان
لو معاك مفتاح 10 عادة علي مشرشر ممكن تستخدمه لظبط الكهربا .. حاتهوي علي مسمار 10 اللي في الأسبراتير وتحرك راس الأسبراتير عكس عقارب الساعة سنه بسيطة وتطلع تجرب لو لسه وحاسس ان العربيه مش بتسحب هويه واعمل كده تاني لحد ما تلاقي ان العربيه بقت كويسه صوت الموتور حايعلي معاك شوية وكمان ال rpm سيبه لحد ما توصل للظبطة الصح وبعد كده وطيه لحد 8 او 8.5
ومتابع معاك وارجو اني اكون افتدك

متشكر لحضرتكوا جميعا لحل مشكلتي

انا جربتها النهارده كانت مشيه بس مفيش سحب لاقيت ميكانيكي متخصص في اسكودا بس
شرحتله القصة قلي العربيه مش مظبوطه كهربه ولا هوا ظبطهالي وقلي جرب جربت والحمد لله تمام جدا لحد دلوقتي المشكله الاساسيه طلعت من ملف الاسبراتير هو ده اللى كان مجنني والحمد لله لحد دلوقتي تمام

وبحب اشكركم جدا جدا لمساعدكم ليا.

الحمد لله وابقي طمنا علي حالة العربيه وربنا يوفقك