الموضوع: يا اصحاب الياباني والكوري

اه في حاجة كمان انا بعد الاقساط بتاعت العربية اللي هيتبقى معايا ماينفعش اصرفه كله على البنزين وقطع الغيار
يعني لو حاجة موفرة في البنزين وقطع غيارها معقولة يبقى شاكرين مهللين

الكيا بيكانتو عربيه جميله أنصحك تشترى ال full option ب 64 الف عربيه موفره جدا في البنزين

الصديق العزيز،

أولاً، في رأيي، خليك في الجديد، وده عن تجربة، لأن أي عربية مستعملة لازم هتحتاج حاجات تشتريهالها، وطبعاً إنت زي ما بتقول، مش هيبقى معاك فلوس كافية بعد الأقساط علشان تدفع لده وده، كمان إنت مش عارف عربيتك المستعملة ده كويسة ولا لأ، حتى لو جبت خبير، هيكون فيه برده نسبة ولو صغيرة لإنك تتخم، والشعب المصري زي ما إنت عارف زي ما فيه الكويس فيه المش كويس وإللي بيحب ينصب..

ثانياً: لو عايز تجيب حاجة موفّرة في البنزين خليك في الـ 1000 سي سي و 1300 سي سي، يعني أنا معايا فيرنا وهي عربية كويسة وكل حاجة بس 1600 سي سي وبتستهلك بنزين كتير.. لذا حاول على قد متقدر تشتري عربية سعتها اللترية صغيرة..

ثالثا: لو قررت شراء عربية ما، حاول تنزل في الأسواق حتى تسأل عن سعر قطع غيارها، ولو هي متوفرة أم لا، وروح التوكيل مع أي واحد صاحبك معاه العربية ده، علشان تشوف المعاملة هناك والأسعار إزاي..

رابعاً، لا تلقي بالاً لكل الناس إللي بيفتوا في مصر، لإن إحنا شعب بيموت في الفتي، فتارة يقولك حد خليك مع العربية الفلاني (لاحظ هتلاقيها بتاعتوا)، وبلاش العربية العلاني ويطلعلك القطط الفطسانة فيها، لمجرد إنه يمتلك العربية الفلاني ده.. وواحد تاني يثنيك عن عزمك في شراء طراز ما لمجرد إنه يمتلك سيارة أقل منها في المستوى وهكذا..

أخيراً، أعرف أولوياتك، وإنت عايز إيه من العربية إللي هتشتريها، وتكاليف تشغيلها وقطع غيارها والوكيل بتاعها، وأركبها بنفسك قبل الشراء وهكذا..

الف مبروك مقدما على العربية
انا من رأى انك طالما عايز حاجة ماتصرفش عليها يبقى اكيد تكون عربية زيرو
ونصيحة الزيرو دايما ارخص واوفر من المستعمل نظرا لمصاريف العربيات المستعملة من صيانة وقطع غيار متهالكة ... الخ
علشان كده انا شايف انك تشترى زيرو فى حدود نفس المبلغ اللى معاك وطبعا ياريت تكون عربية شائعة علشان بالتأكيد هاتكون قطع غيارها متوفرة وفى الغالب رخيصة
يعنى فكر فى اللانوس زيرو او فيرنا زيرو وبص برضه على البيكانتو
اعتقد ان كل دول فى حدود نفس المبلغ
وقبل كل شىء اعمل استخارة وربنا يوفقك