ايه رأيكم في الزيت دا: Bizol Pacific LF 5w-30 ويعني ايه hydro-cracked

**borio1704** · 28-03-2015 12:38 PM

المشاركة الأصلية كتبت بواسطة فتح الباب

وانا كمان مع احترامى لك انت باين عليك فاهم لما تقول ان ١٤٠ الف كيلو متر ولا حاجه فعلا عندك يعنى بقالها سنتين او اكتر تقريبا يعنى مش كتير كلامك علمى اكيد حضرتك مهندس ميكانيكى او على الاقل قريت عن الميكانيكا كتير بس كان ليا سوؤال عند حضرتك يعنى ايه كله عند العرب صابون وبلاش تكلمنى عن الزيت لانى مش هفهم زى حضرتك وهاتعبك وفى الاخر مش هفهم ٠ احترامى لك مره تانيه

أنا بتكلم على فكرة التعامل مع الزيوت في السوق...

فعلا.. الناس بتحط الزيوت على السمع.. وناس تقول الماركة الفلانية أحسن من الماركة التانية بدون أي مرجع علمي... مع إن الزيوت بالذات فيها من التفاصيل اللي يخليك لازم تفتح عينك وتفهم انت بتحط إيه في العربية.

وعلشان كده .. التجارب الشخصية ما تنفعش في الزيوت إلا في حالة واحدة بس:

إنك تجرب كذا زيت من كذا ماركة ويكون ليهم نفس المواصفات ... وكل ده في نفس العربية.

غير كده... التجارب مع الزيوت مالهاش قيمة

فرجائي لحضرتك ولينا كلنا ...
ياريت كلنا نتحرى الدقة في المعلومات اللي بنقولها علشان فيه ناس تانية ممكن تعتمد على الكلام ده ويحصلها تداعيات سلبية... ونبقى إحنا السبب فيها ونشيل وزرها يوم القيامة.

وصدقني أنا مش مكبر الموضوع... لإن هي دي الحقيقة اللي ناس كتير مش واخدين بالهم منها.

**borio1704** · 28-03-2015 06:28 PM

المشاركة الأصلية كتبت بواسطة tasaka

العضو الكريم borio , اشكرك على كل هذه المعلومات و لى سؤالين لو اتسع صدرك للاجابه

1- اشتريت سبرانزا 620 ماشيه 12 الف حتى الان .. ما هو انسب زيت لها تنصح به ( هل شل الترا او فالفولين او اى نوع آخر ؟؟ ) .. اعتقد ان اللزوجه الموصى بها 5W-40

2- السياره عند الشراء كان يوجد بها زيت موتور عادى و ليس سينستك ( قمت بتغييره بزيت موبيل XHP 1000 عادى 20w للغسيل لفتره بسيطه قبل وضع الزيت السينستك ).. فهل هذا اتلف شيئ فى الموتور و الخلوص ؟؟ .. هل قبل تغييره بزيت سنستك تنصح بوضع عبوه تنظيف Flush ام انها مضره ؟؟

3- استعمالى لا يزيد عن 5 الى 10 الاف فى السنه .. فهل يجب تغيير الزيت السينستك سنويا .. ام بعد اتمام 15 الف مثلا

و تفضل بقبول وافر الشكر و التحيه

بالنسبة للسؤال الأول:
أي زيت يمشي مع مواصفات الكتالوج أو أحسن منه هيكون ممتاز للموتور بدون شك...

بس عندي ملحوظة جوهرية... المواصفات ما هياش لزوجة وبس... يعني مش مجرد إنك جبت اللزوجة بتاعت الكتالوج يبقى كده تمام... فيه حاجة إسمها "مستوى الخدمة" ودي بتحدد مستوى الجودة المطلوب.

أرجو إن حضرتك ترجع للموضوع ده وهتلاقي تفاصيل عنه.
http://www.nilemotors.net/Nile/341680-a.html

وغالبا.. بعد ما تقرا الكتالوج وتعرف إيه المطلوب هتلاقي إن فيه أكتر من ماركة زيت تنفع.. في الحالة دي حط أي زيت تستريح له.. سواء من الناحية المادية أو من ناحية الجودة..

وأنا شخصيا ممكن جدا أحط زيت التعاون لو هو بيوفي متطلبات الكتالوج.. وعلى فكرة عندهم زيوت بمستوى جودة عالي.. بس المشكلة في اللزوجة عندهم مفيش منها غير 20w-50.

ولو حضرتك لسه متلخبط.. صورلنا صفحة الزيت في الكتالوج.. وقولنا أسماء الزيوت اللي حضرتك بتفكر فيها "بالتفصيل"... وإن شاء الله أقدر أساعدك تختار أنهي واحد فيهم.

بالنسبة للسؤال التاني:
معتقدش فيه مشكلة ، خصوصا لو المدة بسيطة، والفلش حضرتك مش محتاجه .. خصوصا إن العربية ما تعتبرش مشيت أصلا (12 ألف ما تعتبرش مسافة في عرف السيارات).

وأنا ما أنصحش بيها إلا لو كان الزيت معدني وبيقعد في الموتور مسافات طويلة.. وكمان تكون العربية تكون ماشية مسافة طويلة (200 ألف كم على الأقل).. والموضوع ده له احتياطات خاصة وغالبا الموتور بيبقى محتاج تغيير جوانات في الوقت ده.

بالنسبة للسؤال التالت:
لو حضرتك بتمشي بالعربية مسافات قصيرة كده.. فالأفضل تغيير الزيت بعد سنة (بدون الالتزام بعدد الكيلومترات) أو 6 شهور بالنسبة للزيوت المعدنية.

...