ربنا معاك ويرجعلك حقك
عرض للطباعة
ربنا معاك ويرجعلك حقك
انا لفيت فى النت لقيت اكبر شكاوى من العربية دى من الجير بوكس و نقل الاتوماتك على السرعات البطيئة منهم شكوى من مصر و اخرى من الامارات و فى الحالتين التوكيل كان بيقول كل حاجة تمام
ملقيتش شكوى من الفرامل
I have Peugeot 301 and it is brand new 3000 km only but some times lately the clutch stuck on(P) and I can not move it to the (R) or (D) so I stop the car and start the engine one more time and it moves , I sent it to the maintenance here in Egypt but they told me every thing is ok , please I need an answer .
Thanks
Dina
------------------------------------------------
I bought this car in 2013, but the year model is 2014.
The gear shifting problem from gear 1 to gear 2 is very very high.
Everytime the gear shifts the vehicle makes heavy vibration, it makes a fear that some earthquake came only for my car.
This vehicle sent to authorized work shop in Sharjah, UAE for 6 times for the same problem. It looks manufacturer and service team knows this problem, but not accepting.
FED UP WITH THIS PROBLEM.
If any of you suggest how to resolve this problem,
Thanks
----------------------------------------------------
ربنا يرجعلك حقك ان كنت على حق لأن الاحساس بالظلم مر
بس الحمد لله على سلامتك و سلامة الاسرة
ربنا يبارك فى دعواتك, بس مش كل الناس بتكتب المشاكل اللى بتقابلها على النت, لكن بناءً على كلام لجنة حماية المستهلك فى حضور ممثل شركة بيجو إن فيه 5 شكاوى - و انا من ضمنهم - مقدمة للجهاز بخصوص مشاكل فى فرامل البيجو 301 , و لما كنت فى كلية الهندسة كان معايا بيجو 301 سودا عامله حادثة و هاتتفحص وحدة فراملها. و ده شئ متوقع لما التوكيل يستخدم تيل مصنع من مواد مخالفة للمواصفات القياسية, و تقدر حضرتك تبحث فى المنتدى هنا عن مشاكل ملاك البيجو 301 و التيل اللى بيبوظ الطنابير, و ذكرت فى الردود السابقة شهادة أحد مالكى العربية مرفق معاها الفاتورة بإن التيل تالف / حامى و بيبوظ الطنابير و تم تغييرهم قبل 10000 كيلو (و احيانا بيتم تغييرهم مجاناً للناس المهمة عند التوكيل).
فبعد كدا لما الفرامل تهرب ده بيكون شئ متوقع, وتقدر حضرتك تبحث على النت بخصوص إزاى الفرامل بتهرب لو التيل مصنع من مواد غير مطابقة للمواصفات. بالنسبة عندى كانت مشكلة تيل تالف و بلغت التوكيل و قدمت شكوى كتابية و صوتية على 19207 ده غير شكوتى من طريقة عمل وحدة الإيه بى إس و التوكيل أهمل فى شكوتى بخصوصهم, يمكن لإنى كنت من الناس اللى قدموا شكوى جماعية للتوكيل بخصوص مشاكل التيل و الطنابير و غيرها من المشاكل, و فى الصفحة الأولى هاتلاقى لينك قبل الحادثة بسأل الأعضاء عن مشكلة عندى فى وحدة الإيه بى إس.
و ده لينك على الفيسبوك لمجموعة من ملاك البيجو 301 و اللى إتعرضوا لحادث بسبب عدم عمل الفرامل:
https://www.facebook.com/permalink.p...04661146289025
طبعاً من حقك تقول إن كل ما حد يعمل حادثة يرميها على الفرامل, هاقولك لما التوكيل يركب تيل تالف فى العربية يبقى من باب أولى تشك فى العربية مش فى العميل, و تبدأ تشك فى جودة باقى أجزاء الفرامل زى وحدة الإيه بى إس, و خصوصاً إن منهم اللى عاملين تأمين, يعنى مش هايدفعوا حاجه تذكر فى التصليح, و أنا عربيتى تصليحها برا مش هايكلف حاجة تستحق إنى أفضل من غير العربية 3 شهور و أصرف ونشات رايحة جاية و فحص بكلية هندسة على حسابى, لكن لما تبقى مشكلة فرامل يبقى التصليح مش هوا المشكلة, لان لو خرجت من الحادثة على رجلى, فمش هاستبيع و اركبها تانى بعيبها. و انا مش جايبها و حاطط فى دماغى سعر اعادة بيعها عشان اعمل حساب انها هاتبقى عربية عامله حادثة و سعرها هاينزل فهاتجنى على التوكيل.
حاجة أخيرة, لو أنا بعد الحادثة و بناءً على اللى حصل قبل الحادثة و ملابسات الحادثة متأكد بنسبة 99% إنها بسبب مشكلة فى الفرامل, فتصرفات مهندسين التوكيل بعد الحادث خلتنى متأكد 100% إن الحادثة حصلت بسبب مشكلة فى الفرامل. و تقدر حضرتك تقرأ فى الردود عبر 14 صفحة تصرفات التوكيل بعد الحادثة. و ربنا يوفق للى فيه الخير.
انا لا اشكك فى كلامك و مش عايز كلامى يقلل من عزيمتك
انا عارف ان لكل انسان طاقة و ممكن وجودك مع قلة فى وجه توكيل و ناس يمكن واصلة يسببلك احباط
مدام لك حق حاول و لا تيأس و يكفيك شرف المحاولة
موضوعك اصبح مشهور على النت و الناس بتحذر بعضها من العربية دى حتى على المنتديات العربية
انا كاره العربية اساسا من ساعة ما شفت اختبار التصادم بتاعها
إيه الأخبار يا باشا؟؟؟
مفيش جديد؟؟؟؟
ربنا يجازيك كل خير على كلامك الطيب و إن شاء الله أنا مستمر فى معركتى للدفاع عن حقى و بإذن الله ثم بتضامنكم حقى هايرجع ... حقنا كلنا هايرجع من التوكيلات اللى كل همها تحقيق مكسب زيادة حتى لو على حساب التلاعب فى مواصفات العربية و مواصفات فرامل العربية و تعريض حياتنا و حياة أسرنا للخطر.
أنا قريت ال15 صفحة كلهم. ربنا يكون في عونك ولا تستسلم وحقك هيرجعلك. للأسف التوكيلات مش بيهمها غير الفلوس ومش بيفكروا في حياة الناس. في انتظار نتيجة الجلسة.
اذا نتيجة الجلسة معجبتكش اطلب تشكيل تاني جديدة وابدأ اجرائات قضية في المحكمة
أخر التطورات فى الشكوى المقدمة فى توكيل بيجو بجهاز حماية المستهلك بتاريخ 13 مايو 2015
تقرير اللجنة الهندسية كما كان متوقع فى صالح توكيل بيجو, و بصورة مختصر, ذكرت اللجنة الهندسية - كلية هندسة المطرية - إن سبب الحادث ضغط الكاوتش المرتفع للإطارات الخلفية و الذى يبلغ 40 و من المفترض أن يكون 30 ,و حيث أن السيارة كانت على أرض رملية فأدى ذلك لعدم توقف السيارة فى المسافة المفترض أن تقف بها, و تبين لهم بالفحص (اللى كان بالعين المجردة و بدون تفريغ لبيانات كمبيوتر العربية) عدم وجود خلل بوحدة الإيه بى إس.
أولاً: لم يتم قياس ضغط الكاوتش رغم تواجدى الدائم مع المهندسين
ثانياً: ضغط كاوتشات عربيتى بظبطه دائماً على 32 و هوا الموصى به من قبل الشركة (مش 30) على قائم السيارة لإن عربيتى هاى لاين بكاوتشات ميشلان 16, و لما تعرف إن العربية من بعد الحادثة مباشرة يوم 10 فبراير راحت التوكيل و بعد كدا ركنتها عندى, يعنى على كلام اللجنة الهندسية خلال ما يقرب من 3 شهور ضغط الكاوتشات زاد / طلع من 32 لـ 40 و العربية مركونة, فى الوقت اللى الكاوتشات الأمامية نامت على الأرض من كتر الركنة.
ثالثاً: أنا كنت ماشى على أسفلت مش على رمله عشان العربية تاخد حوالى 4 متر عشان تقف على سرعة أقل من 50 كيلو فى الساعة, إلا إذا كان معدل نبضات وحدة الإيه بى إس فى البيجو 301 قليل أو لإن فعلاً فيه مشكلة فى وحدة إيه بى إس عربيتى اللى إشتكيت منها مراراً قبل الحادث و اللينك فى الصفحة الأولى لشكوتى هنا على نايل موتورز بخصوصها قبل الحادث بشهر فى الوقت اللى التوكيل بإهمال و تقصير متعمد من جانب موظفينهم أكدوا إن كل شئ طبيعى رغم إثبات المشكلة بالتجربة أمامهم.
رابعاً: فين اسباب حدفة العربية شمال لما جيت أدوس فرامل من التقرير الفنى و ده كان سبب بداية الحادثة؟ و خصوصاً إن اللجنة أقرت بإن الكاوتش إنقطع نتيجة إصطدام برصيف (أو صخور فى حالتى) و لم ينفجر زى ما محمد عطية كبير مهندسى توكيل بيجو اصر على مدار ساعات و فضل يقولى إحنا أربع مهندسين و بنقول إنك كنت ماشى على سرعة فوق الـ 90 و لما جيت تدوس فرامل الكاوتش إنفجر و ده سبب حدفة العربية شمال.
خامساً: فين الفحص اللى تم على التيل و الطنابير التالفين المخالفين للمواصفات (رغم إنى قدمت أوراق شكوتى بخصوص التيل للجنة الفحص الهندسى) و اللى إشتكيت منهم فى شهر اكتوبر 2014 فى مركز أبو رواش و مركز غمرة و تم رفض كتابة شكوتى منهم و قدمت شكوى كتابية و صوتيه فيهم للشركة بسبب المشكلة دى؟!
سادساً: فين تفريغ بيانات العربية من التقرير؟ لحظة واحدة ... المتابعين لمشكلتى عارفين إن كلية هندسة المطرية طلبت بيانات العربية من محمد عطية (ممثل توكيل بيجو و الخصم) رغم إخبارى للجنة الفحص الهندسى بإنه قام بقراءة بيانات العربية سابقاً و التى تؤكد صحة كلامى ثم تراجع عن كلامه مرة أخرى أمام الأستاذ حسين مسؤل بلف العملاء, و رغم إخبارى لهم بأن المهندس محمد مجدى أخبرنى حينما أصريت على سحب سيارتى من التوكيل بإن إحتمال بيانات العربية تكون إتمسحت.
سابعاً: أفاد التقرير بأن سبب إنقطاع أحد أسلاك بيانات وحدة الإيه بى إس ( من وسط رزمة أسلاك) هوا الإصطدام بالصخور, رغم إن السلك واضح إنه مقطوع بفعل فاعل و دليل على كدا إن باقى الأسلاك كلها سليمة و السلك مقطوع بصورة مشطوفة. و ده بقى عشان يبقى اللجنة الهندسية عندها عذر إنها تعتمد على تقرير الخصم وهوا توكيل بيجو.
نتيجة الجلسة:
قمت برفض تقرير اللجنة الهندسية جملة و تفصيلاً لعدم صحتة و قمت بتقديم طلب لتحويل قضيتى للنيابة العامة, و قمت بإرفاق كل الأوراق و الفواتير التى تفيد بوجود مشاكل فى أجزاء فرامل سيارتى مثل التيل و الطنابير و وحدة الإيه بى إس و شكوتى منهم سابقاً و تعليل رفض قرار اللجنة الهندسية و عدم الإعتراف بصحة ما جاء فيه لإستناده على معطيات خاطئة مقدمة من قبل الخصم فى القضية و لعدم إستيفاء الكشف الفنى للقواعد المتبعة وفقاً لطبيعة مشكلتى و ما أبلغتهم به من محاولات تحايل التوكيل و إحتمالية حذفة لبيانات العربية.
أتمنى على الله إنى ألاقى منكم مساندة لقضيتى و اللى حضراتكم متابعينها على مدار الثلاث شهور الماضية, للوقوف فى وجه الظلم و الإستهتار و التلاعب بحياة الناس, دى معدتش قضيتى لوحدى, دى قضيتنا كلنا و حياتنا كلنا اللى بتكون فى خطر طول ما الكيانات التجارية بتتلاعب فى مواصفات أمان العربيات و تهمل شكوى عملائها و تعرض حياتهم و حياة أسرهم للخطر و تفلت من العقاب إستناداً لنفوذها و علاقاتها و إمكانياتها المادية.