واضح يااستاذ اوى من كلامك ................غير قابل لاى نقاش اصلا وبترفض مجرد حتى ان الغلط عندك وده طبعا احتمال انا مش بجزم بيه بس فوق ٩٩٪ من الحوادث بتكون كده.....وفي نهاية مداخلتى هنا بدعيلك من قلبى ربنا يحللك مشاكلك
يرجى انتقاء الكلمات
م ع 9
عرض للطباعة
واضح يااستاذ اوى من كلامك ................غير قابل لاى نقاش اصلا وبترفض مجرد حتى ان الغلط عندك وده طبعا احتمال انا مش بجزم بيه بس فوق ٩٩٪ من الحوادث بتكون كده.....وفي نهاية مداخلتى هنا بدعيلك من قلبى ربنا يحللك مشاكلك
يرجى انتقاء الكلمات
م ع 9
النهاردة كانت لجنتى فى حماية المستهلك ضد توكيل بيجو بسبب خلل فى فرامل عربيتى البيجو 301 و اللى التوكيل انكره, و اللجنة اخبرتنى امام ممثل الشركة إنى مش الوحيد اللى بشتكى من مشكلة فى الفرامل فى البيجو 301 و إن فيه 5 تانين معايا هايتم فحص فرامل عربيتهم.
للإسف اللجنة موفرتش ليا فرصة اشرح اى حاجه لا من إهمال التوكيل و تقصيرة فى فحص الفرامل قبل الحادثة و رفضهم كتابة شكوتى فى اوردر الشغل و لا كلامهم بإن بيانات كمبيوتر عربيتى ممكن تكون إتمسحت, حتى لما طلبت شهادة بخصوص مطابقة تيل عربيتى للمواصفات قامت اللجنة - مش ممثل شركة بيجو - بذكر جملة "إذا إستلزم الأمر".
اللجنة بدأت و خلصت بدون ما ممثل شركة بيجو يتكلم بكلمة واحدة, وبناءً على اللى أنا ذكرته فوق, من الطبيعى إن مايكنش فيه داعى إنه يتكلم, و لا إنتم إيه رأيكم؟!!
الموضوع شكله كدا هايطول 6 شهور كمان, شئ مؤسف, لكن زى ما فيه صبر على الدفاع عن الباطل, لازم يكون فيه صبر على الدفاع عن الحق, و لا إنتم إيه رأيكم؟
ربنا معاك
الخلا صه انت في مصر
طالما مش مسنود قوي
للاسف مش هاتعرف تاخد حق ولا باطل مع شويه النصابين وكلاء بيجو ومن يساندهم
جهاز نهب المستهلك حكم بسرعه في قضايا تعويض لعملاء
بس مين لازم يكون مستشار او صحفي كبير او لواء تقيل
لكن لو مواطن عادي مش هايخلص معاهم
أنا نازل بكرا حماية المستهلك و مش هامشى من هناك إلا لما أشوف إيه حكاية "إذا إستلزم الأمر" اللى اللجنة ضافتها بخصوص طلبى لشهادة مطابقة التيل و الطنابير, فى الوقت اللى توكيل بيجو ممشينى بيهم و هما بايظين فى الوقت اللى بيغيروهم لناس تانية تبع الضمان, و غالباً هاطلب إعادة الجلسة و إلا كل ده يبقى كلام فاضى و ضحك على الدقون, يعنى انا افضل مستنى شهور عشان فى الأخر كل اللى يتعمل هوا الفحص الفنى و تجاهل كل المخالفات اللى التوكيل عملها على مدار شهور, دى اللجنة حتى مش عايز تشوف أى ورق أو تسمع أى شكوى منى, و أدى قدامكم واحد من ملاك البيجو 301 اللى التوكيل غيرله التيل و الطنابير مجانى تبع الضمان فى نفس المركز اللى رفضوا حتى يكتبوا شكوتى من التيل الزبالة اللى مركبينه, و مش كدا و بس, ده قبلى بيومين و فى نفس المركز.
ده حتى اللجنة ماكلفتش خاطرها تسأل المهندس عماد ممثل بيجو إذا كان هايقدم الشهادة و لا لأ, و بالنيابة عنه كتبوا "إذا إستلزم الأمر", عشان يبقى توكيل بيجو فى السليم قدام شركة بيجو فرنسا, و يبقى جهاز حماية المستهلك اللى وظيفته يدافع عن حقنا هوا الملام قدام بيجو فرنسا, اللى هيا كمان بتقلى هانراقب الموقف عن كثب. إحنا هانلاقيها من التوكيل و لا الشركة و لا الجهاز و لا من السلبية و لا من عدماء الضمير؟
و لو أنا أسأت الظن فى اللجنة, يبقى معايا عذرى, و يقدروا الضغط اللى أنا فيه من إهمال التوكيل و تعريض حياتى للخطر و المماطلة و التسويف, لإن إيه اللى يخلى اللجنة تضيف جملة زى دى حتى من غير سؤال المهندس عماد عن الشهادة إذا كان مستعد يقدمها و لا لأ, هما موجودين للدفاع عننا و لا عنهم؟
http://nileup.com/up/uploads/nilemotors_14290492121.jpg
http://nileup.com/up/uploads/nilemotors_14290492122.jpg
لو ماوصلتش معاهم بكرا لحاجة بخصوص الشهادة يبقى مافيش داعى للفحص الفنى, ده المهندسين فى مركز غمرة و انا باخد العربية قالولى "إحتمال البيانات على كمبيوتر العربية تبقى إتمسحت". و بلاها قلة قيمة و مشورة على الفاضى و افضل أأجل شغلى عشان افضالهم, يبقى نخلى مصر كلها تعرف باللى حصل معايا و انا فى مكانى اكرم ليا.
عزيزى صاحب المشكله
رقم واحد متيأسش وخليك معاهم وطالب بحقك ومتسكتش كل المصايب اللى فى البلد دى بسبب ان الناس بتسكت عن حقها والا مكناش كشعب وصل للدرجه دى فخليك معاهم لحد الاخر هم برده لو كل يوم عميل عملهم مشكله وجرجرهم على حمايه المستهللك وبعت شوى لبيجو اكيد حيلمو نفسهم
تانى حاجه ارجو انا شايفها ان الناس متشتريش عربيات بيجو اصلا نعمل حمله لمقاطعه العربيات دى محدش يشترى عربيه جديده من بيجو حتى لو العربيه كويسه للان اللى حصل معاااك ممكن يحصل مع اى حد وده اللى انا عملته مع بيجو 2008
احنا ممكن نشترك ونعمل صفحه على facebook وكل واحد عنده مشكله يدخل يكتبها ونبعت الصفحه دى لبيجو فرنسا او بنعتها حتى لمبيعات بيجو مصر ايه رأيكم؟
ربنا يبارك فيك على كلامك الطيب و نصيحتك, بكل أمانة كنت محتاج أسمع كلام زى ده بعد كل المدة دى من الصدام و الصراع المستمر, و خلينا واقعيين, توكيل بيجو مش توكيل بسيط و يمتلك إمكانيات حربية عديدة و أسلحة متعددة, و أهمها أساليب علم النفس فى محاولة إحباطى و هزيمتى نفسياً بإقناعى فى كل مكان و زمان بإن حماية المستهلك مش هاتجيبلى حقى و إن حماية المستهلك متواطئة معاه, على سبيل المثال رسائلة المتوارية على الفيسبوك زى:
- واحد يقولى عندى مشكلة مع توكيل بيجو, أقوله قدم شكوى فى حماية المستهلك عشان تبقى قضية جماعية, يقولى "ده جهاز حماية بيجو و مش هايجبلى حقى".
- واحد تانى يبعتلى رسالة يقولى "سلملى على البيانات", اللى هيا بيانات فرامل العربية و الكمبيوتر اللى بتأكد كلامى و اللى إتقالى فى التوكيل إنها ممكن تكون إتمسحت بعد إصرارى على اللجوء لجهاز حماية المستهلك.
- واحد تانى يبعت تلميح و يقولى "كنت من الأوائل ودخلت هندسة المطرية وعملوا معي الواجب"
و غيره و غيره و غيره من أساليب الحرب النفسية و الحصار لمحاولة إقناعى بالتخلى فى الدفاع عن حقى, على سبيل المثال:
- إستخدام شركة بيجو لكلام يحمل معنى إنى برمى بلايا عليهم عشان مش مأمن.
"رضاء عملاءنا من أهم أولوياتنا و خصوصا لضخامة الحادث و التكاليف المتكبدة لتصليح السيارة بسبب عدم وجود تأمين".
- فى نفس اليوم لما رديت علي إتهامهم الباطل عملولى بلوك من على صفحتهم.
- صفحة بيجو الشرق الأوسط رغم إنى مكتبتش أى شكوى على صفحتهم عملولى بلوك.
- تهجم البعض عليا على الجروبات (و على الجروبات نفسها) لو كتبت أى كلام بخصوص مشكلتى.
- محاولة مستمرة من الموالين لبيجو لشخصنة قضيتى و إبرازها كقضية فردية.
- محاولة مستمرة من الموالين لبيجو لإظهار شكوتى إنها بهدف إضعاف عربية بيجو قصاد المنافسين لها زى النيسان و الشارك و غيرهم.
- قيام الموالين لبيجو بتوجيه إهانات لشخصى فى كل مكان.
لكن بإذن الله مش هاتراجع عن الدفاع عن حقى, لإن ده معدش حقى أنا لوحدى, و خصوصاً بعد ما شفت كمية الناس اللى بتشتكى شركة بيجو فى جهاز حماية المستهلك و على صفحات الإنترنت.
و أحب أقول لشركة بيجو, إن بإذن الله أولاً و أخيراً (و على رأى الناس الموالية ليكم) "أنا فااااااااااضى" للدفاع عن حقى, و الحرب عدة معارك و على عدة جبهات و قلت قبل كدا جهاز حماية المستهلك معركة واحدة لابد منها لكن مش هيا الحرب, و إنتم تماديتم فى أخطائكم (إهمال و تقصير متعمد و تعريضى لحادثة موت - تلاعب بيا و عدم تحمل المسؤلية بعد الحادثة - توجيه الإهانات ليا بإنى برمى بلايا عليكم - المحاولات المستميتة للإيقاع بينى و بين الناس اللى عايزه تساندنى - مماطلة و تسويف فى إجراءات حماية المستهلك - محاولة إقناعى بإن جهاز حماية المستهلك فى جيبكم - و غيره كتير من الأساليب الرخيصة).
و أحب أقول لتوكيل بيجو مش معنى إنى أوقات بتعب أثناء معركتى معاكم و ممكن يحصل منى أخطاء تضر بمصلحتى, مش معنى إنكم تمتلكوا مقومات كثيرة لعقد تحالفات تحاربنى و تحارب أى واحد بيقف فى وشكم دفاعاً عن حقه أو على الأقل تجاهل قضيته, ده مش معناه إنى هاقف عن حربكم دفاعاً عن حقى, الجبهات كتير و المعارك الجاية كتير, و كل ما أتعب و أتهزم فى أرض معركة كل ما هارجع تانى بإذن الله أقوى من الأول و مجهزلكم معركة تانية على جبهة جديدة. و على رأى الناس بتوعكم "ده راجل مجنون", فلو الدفاع عن الحق معناه إن الإنسان يبقى مجنون, يبقى الجنون شرف, و أتمنى إن كل شعب مصر يبقى "مجنون", لإن بإذن الله وقتها مصر هاتبقى من الدول العظمى اللى تقود العالم بالفكر و الأخلاق و القيم مش بالقوة.
إن شاء الله هاحضر لجنة الفحص الفنى بكلية الهندسة بالمطرية, و لسه إشكالية التيل و الطنابير التالفين اللى إشتكيت منهم للتوكيل و سايبنى ماشى بيهم, و خناق أحد موظفيهم معايا بسبب رفضه كتابة شكوتى منهم, فى الوقت اللى التوكيل بيغيرهم مجاناً بتيل و طنابير سليمة من ناحية المواصفات للناس المهمة عنده.
أخيراً و ليس بأخراً, الحمد لله كل جنيه من فلوسى حلال و تعبت فيها و تعبت جداً فى شغلى عشان أجيبها, و الحمد لله مش أنا اللى أقبل يدخل جوفى مال حرام بإنى أرمى بلايا عليهم عشان تكاليف الإصلاح كبيرة, و الحمد لله الناس اللى عرفتنى سنين و شافت المواقف الصعبة اللى مريت بيها عارفه ليه ربنا كرمنى فى شغلى و فى حياتى و فى رزقى, و إنى قدمت إستقالتى فى يوم من الأيام و أنا لا أمتلك أكثر من بضعة مئات من الجنيهات فى جيبى لا تكفى حتى إيجار شقتى لشهر, و ده لإن رئيسى فى الشغل قالى "أهم من العمل سير العمل" بعد كل محاولاتى لإصلاح المنظومة المعطوبة اللى كنت بشتغل فيها, يعنى مش عايزين وجع دماغ, و مش مهم الناس يوصلها حقها, و أقعد إنت فى المكتب و الورق يوصلك جاهز و متستف.
تحياتى و خالص تقديرى لكل الناس العظيمة اللى بتقف جنبى دفاعاً عن الحق و من أجل مستقبل أفضل لينا كلنا, و شكراً لكل الناس اللى بتهاجمنا لإنكم بتعلمونا نكون أكثر قوة و تضامن فى الدفاع عن حقوقنا.
برنامج توب جير بتاع قناة بى بى سى الشهير - اعتقد انك اكيد عارفه - عمل جزء من حلقة مدته ربع ساعة مسح فيها بكرامة شركة بيجو الارض - حلقة top gear season 22 episode 5- يا ريت تنزله و تقص الجزء ده منها و تنشره على كل جروبات الفيسبوك - لو عايز لينك لتحميل الحلقة مترجمة قولى وانا اجيبهولك
الحمد لله على سلامتك ,, و متسيبش حقك مهما حصل و ربنا معاك .
ربنا يبارك فيكم جميعاً و ربنا يكتب بمشيئته اللى فيه الخير و معاد الفحص بعد إسبوع
حاجه أحب أضيفها للمستقبل لأى حد لا قدر الله يتعرض لمشكلة زى مشكلتى, ماتخدش وقت كتير فى محاولة حل الموضوع بصورة ودية, ليه؟
لإن ساعتها هاتلاقى ناس تقولك ده بيحاول يرميها على التوكيل و لو كان صاحب حق فعلاً كان زمانه رفع عليهم قضية و جرجرهم فى المحاكم, مع العلم إنك برضه هاتلاقى ناس تقولك يا باشا إحنا فى مصر بنمشى كل حاجه بالحب و كان لازم تروح و تقعد معاهم الأول بدل ما يخدوها عند معاك و الحمد لله إنك خرجت بالسلامة و الخطأ ملحوق و هما يتحملوا خطأهم, و لو عملت كدا الناس الأولانية تقولك لو كان صاحب حق مكنش هايحلها ودى ... يعنى الواحد يعمل إيه عشان يجيب حقه؟ نحاول نحلها ودى الأول و لا نجرى على الإقسام و المحاكم الأول؟
مع العلم إن جهاز حماية المستهلك بيسألك أول حاجه "حاولت تحلها ودى مع البائع و لا لأ" ... و فى حالتى قعدت معاهم حوالى أسبوعين مكالمات و رايح جاى على غمرة و كل شويه واحد فيهم يبعتنى لواحد تانى و يقولى إحكيلى اللى حصل بالتفصيل و كام يوم و هانرد عليك و لا حد عبرنى, و أقول معلش خلى بالك طويل معاهم و اديلهم فرصة يفحصوا العربية و يتحملوا خطأهم, لكن اللى حصل تلاعب بيا و تغيير للحقائق فما كان منى إلا إنى طرحت مشكلتى أمام الجميع و قدمت شكوتى بعد الحادثة بـ 12 يوم.
عموماً الحمد لله على كل شئ, و الواحد يعيش و يتعلم, 48 ساعة مهلة اكتر من كافية للى قدامك عشان يتراجع عن خطأه, محصلش, يبقى محضر فى القسم و شكوى للجهاز و تعيين محامى, لكن يبقى بالك طويل هاتلاقى بعض الناس تقولك ده معناه إن موقفه ضعيف و بيحاول يطلع بأى حاجه من التوكيل, تبقى متماسك و بتحارب دفاعاً عن حقك هاتلاقى البعض ياخدها إنك بتتجنى على التوكيل, هوا دلوقتى صاحب الحق لازم يحط على نفسه بنزين و يولع فى نفسه أو ينزل على ركبه و يستعطف الناس عشان حقه يرجع؟ ... لا حول و لا قوة إلا بالله.
يا استاذ اشرف في متستبعدش ان في ناس هنا في الموضوع شغالين في التوكيل وده قد أكون أجزم عليه وده رقم واحد
رقم اتنين سيبك من الناس اسمع من ودن وطلع من التانية انا لسه حاصل معايا موقف في توكيل كيا واشتكيت الفرع في الخط الساخن بتاعهم وانا واقف وفجأه كلام المهندس اتغير تماماً وجاب ورا وعمل اللي كنت عايزه في العربية بس توكيل كيا انضف من بيجو مليون مره طبعاً ودي معروفة
يعني الكل بيتبع سياسة اننا نجرب نديله الوش التاني لو طلع هادي و خد بعضه ومشي يبقى الحمد لله وطلع عيل
انما هتزعق وتعلي صوتك وتتصل تشتكي وتخرب الدنيا قدام العملاء هتلاقيه بدأ يتكلم معاك وده بيدل على مدى قلة الادب اللي فيه المصريين اساساً .... احنا سبب المشاكل مع بعض والله رغم ان المهندس اللي في مركز الصيانة ده مش بيدفع حاجة من جيبه يعني لو قال دي ضمان يبقى خلاص ضمان هو بيقطع من جلده ؟؟؟؟
نرجع للمشكلة :
اقسم بالله اقسم بالله اقسم بالله لو هتقعد معاهم 3 سنين خليك على موقفك !!!!!!
ولو هترفع قضية يبقى تطالب في القضية بتعويض قيمة السيارة كاملة وليس تصليح !!! قولهم انا مش عايز العربية دي تاني ولا اشتري بيجو تاني اساساً
عربيات كسر ونازلة للدول النامية يموتونا بيها يعني ؟؟؟ ايوه البيجو 301 بتنزل للدول النامية يعني ملناش حق نعيش ؟؟؟ تموتونا بالعربيات دي يعني ؟؟؟ ياخي اعملي فرامل وموتور ومتحطليش تكيف بس متموتنيش في العربية
يعني الواحد بيشتري موته يا جماعة ؟؟؟؟ ده ايه ده
وبسم الله ما شاء الله اللي شغالين في بيجو ده اقسم بالله لو يهود ياراجل مش هيعملوا كده هنا في المنتدى وعلى الفيس وكل حته
يعني لو واحد عمل حادثة بالعربية لاقدر الله ومات يبقى ذنبه في رقبت كل واحد من مركز صيانة شاف العربية ومبيعات باع العربية وفريق جوده راقب العربية وشركة رفضت تغيير العربية
دمه في رقبتهم ليوم الدين الله مش غافل عن حق عباده ومش هينسى ده لو انكر قدام ربك يوم القيامة هيلاقي كل شئ بيشهد عليه للحق امام الله
علشان مطولش عليك - اعمل صفحة على الفيس بالمشاكل واعملها حملة مدفوعة طلع كده 1000 جنية على جنب واعمل بيهم اعلانات لمشكلتك وخليهم يتفرجوا بقى !!!!!!!! وخلي الناس تعمل شير وفرجهم وحط صور للمشكلة
لو احتجت اي مساعدة مش هتردد دقيقة في مساعدة شخص يطاالب بحقه