تقرير صيانة مفصل للشاهين بأسعار قطع الغيار والمصنعيات

**Elawany13** · 21-04-2015 11:27 AM

الناس اللى بتشتكى من التصفير فى سير الدينامو
بسبب ان مقاسه مش مضبوط ... ده احسن مقاس نفع لعربيتى الشاهين موديل 2004 ... بعد دوخه وتغيير السير بتاع 3 أو 4 مرات وكل مرة كان بيصفر بعد فترة قصيرة أو يبقى مشدود على الآخر ومفيهوش امكانيه للشد بعد كده أو العكس يبقى طويل زيادة عن اللزوم ومرخى والشداد بيكون على آخره ومفيش فايده ... وسعره حوالى 15 جنيه

**Elawany13** · 01-08-2015 03:59 PM

العربية رجعت تانى للحركات النص كم
كنت بغسل العربيه لإنها كانت متبهدله حوالى مليون ناموسه لازقين فى الاكصدام بعد رجوعى من اسكندرية بعد العيد
لاقيت واحد فقرى شافنى عمال يلح عليا بالبيع من فترة وبردو بمنتهى السماجه قالى بيع بقى ياعم
ومن ساعتها والعربية بتخرف
مشيت بعدها على طول لاقيتها سخنت لإن المروحة مشتغلتش بسبب الفيشه مش عارف بتعلق ليه مع انها سليمة وزى الفل !!!
الحمد لله شغلتها مانيوال وقضيت مشاويرى

فيه فريم فبر كده حوالين فانوس الشابورة وقع لوحده وانا ماشى ومأخدتش بالى منه
شوية ولمبة الشابورة اتحرقت

امبارح بالليل كنت هلبس فى 131 وقفت قدامى فجأة والحمد لله ربنا سترها
بعدها بدقائق بدوس دبرياج لاقيت السلك اتقطع فجأة روحت للميكانيكى بعد دوخه بدون دبرياج لاقيته قافل
سيبت العربية قدامه ورجعت

**Elawany13** · 01-08-2015 04:01 PM

النهاردة الصبح
اشتريت سلك الدبرياج الايطالى بـ 35 جنيه ... طلبت التركى قالى موجود بنفس السعر بس الجزء المعدنى اللى فيه صامولة فى أول السلك بيكون فبر مش معدن وحلفلى ان النوع الايطالى ده هو الافضل
روحت للميكانيكى قولتله حط زيت فى السلك قالى اوعى كده يبوظ
ركبه فى 5 دقائق ... دفعت 10 جنيه مصنعيه + 5 جنيه بقشيش للصبى اللى ركبه
طلعت بالعربية حسيت ان دواسة الدبرياج عاليه شوية رجعت للميكانيكى نزلى الدواسه لتحت وبقت تمام الحمد لله ونقلات الفتيس بقت ناعمه زى زمان
مع العلم انى بقالى حوالى شهر أو اكثر احيانا بيحصل صوت زعيق أو رنه لما بنقل الفتيس أتارى السلك القدديم كان بيتقطع وهوه السبب فى الحكاية ديه