الموضوع: ايه اكتر موقف مستهتر قابلك وانت سايق ...؟

أول موقف كنت على الطريق السريع وطبعا مقسوم رايح وجاي وكان الوقت حوالي الساعة 6 صباحا والدنيا بدأة تنور كان في عربية نص نقل في الحارة الشمال بما إن الطريق فاضي ويتسع لـ3 حارات أعطيت إشارة يمين علشان أسبقه من الحارة الوسطى ........ فجأة لقيت مكروباص ماشي مخالف في الحارة اليمين وللأسف ده أصبح طبيعي وبنشوفه كل يوم لكن إللي مش طبيعي إن الميكروباص إللي وراه بيسبقه وطبعا ماشى في الحارة الوسطى يعني المطلوب حارة واحد رايح وحارتين نسيبهم للمخالف!!

ولكم أن تتخيلوا الموقف
-العربية النص نقل صندوقها كبير ومقفول يحجب الرؤية بالإضافة لإني بسبقه من اليمين يعني مش شايف إللي جاي
-الباشا بتاع المكروباص إللي جاي يسبق زميله علشان ياخد رزقه -وطبعا لو مشى في دوره هيموت من الجوع - برده بيسبق من اليمين يعني برده مش شايفني

الحمد لله لحقت أدخل تاني ورا النص نقل بس كان هيبقى إيه الوضع لو كنت أخدت قرار تجاوز النص نقل بدري كام ثانية؟

الحمد لله رب العالمين

الموقف التاني ده بصراحة لما افتكرته دلوقتي اتعصبت وكأنه لسه حاصل
كنت راجع على الطريق السريع تقريبا نفس الوقت 6 صباحا بعد 24 ساعة عمل والدنيا فاضية خالص بس على بعد يو ترن واقف عليه مكروباص أعطيته نور علشان يوقف لأني هعدي كنت ماشي على 120 -أنا مش بزود عن كده مهما كان الطريق مغري- بصراحة الراجل وقف ...... جه مكروباص تاني وراه أعطيته نور تاني وكلكسات لكن هو لما لقى زميله وقف الظاهر حب يعمل ناصح وفجأة لقيته بيعدي قدامي فطبعا فرملت جامد

لغاية كده ده غباء ....... لكن إللي بعد كده منتهى الغباء "أنا الوقتي متنرفز جدااااا لأني افتكرت"

الباشا إللي عدا من قدامي إللي مش صابر لغاية ما الطريق يفضى قبل ما يعدل عربيته على الطريق بعد الملف وقف علشان يركب ولا ينزل واحد
والأولاني لما لقا إللي جاي وراه عدا قال اشمعنى أنا قام معدي هو كمان مع الكلكسات الطويلة مني إتسمر مكانه مكملشي الملف وأصلا إللي في وشه واقف لأنه لقا زبون

أصبح الوضع قدامي واحد على اليمين واقف بزاوية قافل جزء من الطريق والتاني على الشمال واقف بالعرض وبينهم مسافة حوالي مترين فقط

كمان موقف بالمرة ...... واحد بربع نقل بسبقه من الناحية الشمال ولما وصلت بداية عربيتي قصاد منتصف عربيته تقريبا فتح الباب بتاعه للآخر وطلع راسه كمان يبص على العجلة وهي ماشية !!!

معظم الحالات الي بتسفزني بتبقى من المارة.
يعني لما تلاقي واحد تنــــــــــــح بيعدي طريق الأسماعيلية الصبح في ساعة الزروة والطريق 5 حارات رايح و5 جاي يعني 10 حارات . وكوبري المشاه فوق . والبيه مكسل يطلعة وطبعا مفهوش حيل يجري فتلاقية بيعدي الطريق على عدة مرات يعني حارتين ويقف في الثالثة (نص الطريق) والعربيات كلها ماشية 120كم بكثافة عليا .

أنا مره شفت منظر غريب جداً من كام سنه عند الششنجي اللي في كوبري القبه

شفت عربيه متغطيه خابطه عربيتين ودخلت في سور مترو مصر الجديده وكسرته.

ما كنتش فاهم، طب العربيه عملت حادثه وكانت لسه الحادثه طازه والناس بتتخانق ... إيه اللي خلى صاحبها يغطيها ؟؟؟؟

عرفت بعد كده إن سبب الحادثه إن صاحبها كان شارب حاجه وساقها وهي متغطيه وخبط عربيتين وكمل على سور المترو :)