الموضوع: للمرة الثانية انا و البنك الاهلى و الدولار

علينا ان ندرك ان البيت الذى ينخر فيه السوس قد لا يتحمل الاصلاح و ينها بمجرد محاولتك قتل السوس
ثورة احمد عرابي كانت تريد الاصلاح لكنها انتهت
انتهت بأن بعض من كان مع احمد عرابي خانه و الخديوي نفسه فتح مصر للاحتلال و الخليفة العثمانى بذاته اعلن عصيان عرابي
كل اصحابك خانوك يا ريتشارد
لم يدرك عرابى ان البيت لن يتحمل الاصلاح فانهار البيت و احتلت مصر من قبل الانجليز فوق السبعين عاما

نفس الفكرة هنا
الفساد متغلغل فى البلد
و فى الشعب
ازالة ذلك الفساد لا يمكن ان يكون بازالة الحاكم لانه بمنتهى البساطة مليون حاكم اسوأ منه هيطلع
الحاكم هو مجرد قمة جبل الجليد الظاهرة على السطح لكن هذه القمة ارتفعت على السطح لان تحتها جبل ضخم من الفساد قابع فى القاع مستعد ان يضحى بقمة ليعوضها بمليون قمة اخرى لا تقل عنها فسادا و بطشا

الحل انك تسيب الخلق للخالق
الزمن هيغير الناس
و هيأدبهم
فيه شعوب عاوزه تتربي
ولقد أخذنا آل فرعون بالسنين ونقص من الثمرات لعلهم يذكرون

فمحاولة التغيير الان بطريقة الخروج و الثورة بها من الحمق و المفاسد و عدم التعلم مما سبق من الاحداث ما بها
و لعل قائل هذه العبارة قد صدق
nations are governed by thieves they desreved

الحمد لله احنا احسن من سوريا و العراق

دي اهم حاجه

مش مهم نكون في قاع العالم التالت

المهم نكون احسن من سوريا و العراق

الحمد لله :)))

المشاركة الأصلية كتبت بواسطة أبو آسر

اولا نغمة سيب البلد وامشي هي السائدة اليومين دول حتى لو حضرتك مش بتقولها لكن كل من يفكر نفس تفكيرك بيقولها
ثانيا موضوع الخدمة العسكرية اولا هي اسمها متخلف مش هارب وده ليه اجراءات قانونية بتتاخد وملايين البشر بيعملوها مش انا لوحدي يعني انا لا متهم في جريمة تخل بالشرف ولا تقدح في الوطنية
اما عن سبب تخلفي فده بيرجع لاسباب عائلية بحتة ومش حابب اناقشها هنا لانها شيء يخصني
لكن لو هنلعب على نغمة الوطنية وحب مصر والكلام ده فانا بحب مصر كوطن وارض اتولدت واتربيت فيها زي اي مواطن طبيعي بيحب وطنه لكن انا بكره مصر حكومة وشعبا لاني مشفتش منهم اي خير
شعب اكثره منافق وكذاب ومدعي الاخلاق والتدين وحقيقته اكل اموال الناس بالباطل واستغلال طيبة الناس وانا ياما اتنصب عليا في فلوس بعشرات الالاف من الشعب المصري العظيم وحاولت اجيب حقي بالقانون لكن مفيش طبعا
حكومة قيدت حريتي في فترة من الفترات قسرا وبدون سبب او حكم قضائي ٣ مرات ولمدة شهرين شفت فيهم شتى انواع الذل والقهر والتعذيب بالكهرباء لمجرد اني فكرت ان اتبع سنة النبي صلى الله عليه وسلم واربي لحيتي
ومحدش يقول يمكن كنت تبع جماعة ارهابية ولا تكفيرية ! احب اقوله ده انا كنت تبع جماعة حكومية ! ترى الطاعة المطلقة لولي الامر وان ضرب ظهرك واخذ مالك وكنت ضد اي حد بيقول بم بس على ولاة الامور وبالرغم من كده اتاخدت من وسط اولادي من زوار الفجر وانتهكت خصوصية وحرمة بيتي وقعدت وسط مجرمين جنائيين في مكان غير ادمي وفي مرة من ال٣ مرات قضيت فيها عيد الاضحى لوحدي بدون طعام واتاخدت قبل ولادة احد ابنائي بساعات ومشفتوش الا بعد ما خرجت باسبوعين ومكنتش جنب زوجتي وهي بتولد وكانت بتتألم مرتين مرة بسبب الوضع ومرة بسبب عدم وجودي وقضيت اسبوعين في مكان اسوأ من جوانتانامو باكل وانام واصلي وادخل الحمام وانا متغمي ومتكلبش الى اخر القهر والذل وبعد كل ده عايزني احب بلدي ؟! طب على ايه ؟ على الحياة المرفهة اللي عايشينها والخدمات اللي بنتمرمغ فيها ؟ ولا على الحكومة العادلة الورعة ومؤسساتها التي ترعى امن وسلامة ورفاهية المواطنين ؟ ولا على الشعب المتدين الكريم الراقي المتحضر ؟
مكنش نفسي اذكر كل التفاصيل دي عن حياتي لاني بحاول انساها واعتبرها كان لم تكن بس كان لازم اتكلم علشان ارد على كل واحد بيزايد على الوطنية لمجرد انه فاكر انه عايش مرتاح وبعيد عن الظلم فحبيت بس انبهه انه مش في معزل عن الظلم والبطش وان في اي لحظة ممكن يبتلى في اعز شخص لديه او في نفسه هو شخصيا وساعتها يبقى يورينا وطنيته الفارغة هتعمل ايه

ايوة انا عايش حياتي فعلا وبصرف كل شهر بالملايين من الخير الوفير اللي البلد ممرغاني فيه ومش عارف اودي الفلوس فين من كترها
اللي زيك صعبان عليا اوي فاكر انه عايش وفي الحقيقة هو ميت او مدفون بالحيا في حين اللي عايش فعلا بيمص في دمه وبياكله ويضحك عليه بشوية شعارات فارغة
بس العيب مش عليه هو العيب على السذج اللي بيصدقوا ولاغيين عقلهم ومخهم وماشيين زي القطيع ومبسوطين وعندهم امل ان البلد تبقى اد الدنيا ومش بيتعلموا من التجارب السابقة وهيعيشوا ويموتوا وهما على نفس الوضع بل اسوأ وفاكرين انهم كده بيعملوا خير للبلد واهل وطنية واصالة
حالتكم صعبة فعلا بشفق عليكم بس بدعي ربنا يحببكم في البلد كمان وكمان ويحرمني انا من الخير الفظيع ده وان شالله اروح اشحت في مكان تاني

كل واحد في البلد عنده مشاكل مش سياتك بس ,وفي ناس اتظلمت كتير
لكن الجو العام الحالي البلد واقعه , نشر طاقتك السلبية والتحريض علي العنف واثارة الفتن والمظاهرات وقطع الطرق كل دا سياتك حيجبلك حقك ولا حيخرب البلد علي كل الناس !!!
لو سياتك شايف انك راجل عايز تثور وتعيش بكرامه ومش عجبك اننا راضيين ومش عايزين نبقي زي العراق وسوريا
خلاص روح جاهد في العراق وسوريا , مش انت مش عجبك رضانا علي الامر الواقع , سبنا يعم في المستنقع اللي احنا عايشين فيه وثور انت بعيد عننا الله يخليك .