دلوقتي أنا برجع من صلاة التراويح بليل في حدود الساعة عشرة وربع تقريبا ..طبعا بروح أقعد مع العيال شوية وأقعد قدام الكمبيوتر كمان شوية ..يعني على الساعة 12.30 كده بليل أدخل أنام ..

لغاية هنا وتمام وكويس ..بقوم عشان أتسحر في حدود الساعة تلاتة إلا ربع الفجر ..طبعا بقوم الأول إتنين ونص أصحي المدام تعمل السحور وأنتخ أنا شوية ربع ساعة كده على الأكل ما يجهز بعدين أصحى آكل ..على ما أخلص أكل بيبقى باقي بتاع خمس أو عشر دقائق على الفجر على ما أدخل أتوضى وأشيل أطباق الأكل مع المدام يكون الفجر أذن ...معلش أنا طولت شوية في الرغي بص أنا بقول البرنامج بتفاصيله عشان اللي يساعدني يبقى عارف كل حاجه ..المهم ..أنزل أصلي الفجر برجع البيت في حدود الساعة أربعة إلا تلت تقريبا ..يدوب أنام عشان الحق أقوم ستة ونص عشان أروح شغلي ..وهنا بقى تبدأ المشكلة ..

أولا الفترة اللي بنامها مع بين صلاة الفجر وما بين الساعة ستة ونص الصبح ببقى حاسس كأن بطني دي فيها طوبة متحجره ..وبعدين المشكلة إني بحاول أتقلب أنام على جنبي اليمين ..طيب الشمال ..مفيش فايده ..هو أنا ولله الحمد والفضل بنام ..بس بقوم الصبح بقى إيه ..لا مؤاخذه في الكلمه عمال أتجشأ ((أتكرع يعني)) وحاسس كده بطعم الأكل في بقي ..مع إني بغسل أسناني قبل النوم سواء قبل النوم بليل أو بعد السحور.. ده غير بقى الإحساس بالإنتفاخ اللي بيبقى عندي ..يقعد الوضع ده من أول ما أصحى الصبح لغاية الساعة 12 الظهر تقريبا ..بعد كده خلالالالالاص..كله بيبقى تمام ..يعني خلاص بحس بمعدتي بقت فاضيه ومفيهاش أي مشاكل ولله الحمد

مفيش نصائح من حضراتكم بخصوص الموضوع ده غير إني منامش بعد الفجر..يعني هو فيه حاجه غلط أنا بعملها مثلا ..ولا هو المشكلة كلها في النوم بعد الأكل مباشرة ..طيب ما أنا لازم أنام بعد الفجر ..ما هو بصراحه الوقت طويل ما بين الفجر وما بين نزولي لشغلي ..

انا سحوري بيكون عبارة عن بيضة مقلية أو مسلوقة ..وكوباية لبن بالتمر ..وطبق الفول ..بس خلاص ..بشرب اللبن في الآخر خاااااااالص بعد ما أخلص سحور وأشرب مياه كمان

وكل سنة وإنتوا طيبين