النترا hd

**Mohamed_abdo** · 09-07-2015 10:56 AM

ماهى لزوجة الزيت الموصى بها لالنترا 2009 hd علشان الكتالوج مش معايا

**HamadaMOMO** · 14-01-2016 03:04 PM

الزيت الذي تم اعتماده فى كتالوج السياره 5w30 شل api sj , sl / ilsac gf-3
فبضم صوتى لصوتك لمعرفه ايه الزيت المناسب فى السوق حاليا 5w30 وفيه نفس المواصفات ويكون من مكان مضمون

**borio1704** · 15-01-2016 11:47 PM

دي صورة توصيات كتالوج الهيونداي إيلانترا من موقع هيونداي كندا..

واخد بالك من كلمة "كندا"؟؟؟ يعني ما نقدرش نعتمد عليه 100% بالذات في درجات اللزوجة.. لإن الجو البارد عندهم بيخليهم يروحوا على درجات لزوجة قليلة زي 5W-20 مثلا.

أنا ليه بقول الكلام ده؟؟ علشان أنا مثلا عندي كتالوج السيراتو اللي جاي مع العربية مختلف عن الموجود على النت... أكيد فيه حاجات مشتركة... بس الاختلافات لا يمكن الاستهانة بيها.

ممكن تاخد فكرة عن الفرق في الصورتين دول:

ده كتالوج الفورته (السيراتو في أمريكا وكندا) موديل 2014.. (هو نفسه بتاع الإيلانترا)

وده الكتالوج اللي جاي مع عربيتي سيراتو 2014

واخد بالك إن فيه توصيات خاصة لمنطقة الشرق الأوسط؟؟ أتوقع إنها تكون هي نفسها للإيلانترا.

لو فيه حد من الزملا عنده الكتالوج اللي جاي مع العربية ويدينا صورة منه... هيكون أفضل كتير.

ده بالنسبة للزوجة...

أما بالنسبة لمستوى الأداء أو الجودة... فتوصيات الكتالوج بتقول API SJ, SL or above

يعني تقدر (ويفضل) إنك تحط زيت SM أو SN..

فعليا.. إنت مش هتلاقي زيت لزوجته 5W-30 في مصر غير تخليقي... ودي عموما بتبقى مستويات الأداء بتاعتها عالية.. يعني SM أو SN.

كده معظم الزيوت اللي بلزوجة 5W-30 اللي في السوق هتنفع معاك وتقدر تشتري أي واحد فيهم...

خد عندك يا سيدي دول كده عالسريع:

Shell Helix Ultra SN 5W-30 | Shell Global

Shell Helix HX7 SN 5W-30 | Shell Global

Mobil 1™ ESP Formula 5W-30 | Mobil 1™

Castrol MAGNATEC | Castrol MAGNATEC Brand | Engine Oils | Car | Products | Home

ده غير ماركات محترمة تانية كتير.. يعني مش اللي فوق بس هما اللي ينفعوا.

عموما.. أنا دايما بانصح بعدم التغيير المتكرر لماركات الزيوت ... يعني لما تختار زيت له مواصفات الكتالوج.. حاول تختار كمان الماركة اللي تتوقع إنك تلاقيها بسهولة.. أو على الأقل .. ضامن الوكيل بتاعها.

...

**borio1704** · 17-01-2016 11:59 AM

المشاركة الأصلية كتبت بواسطة hamadamomo

متشكر جدا لرد حضرتك الوافي
سؤال بقا متوفر في السوق الاتي
موبيل 5w30
شل الترا 5w40
اموسيل 5w30
اموسيل 5w40
انهو واحد يناسب الالنترا hd في حاله ان العربيه مركونه فترات كبيره يعني ممكن اعمل في السنه 2000كم وعلي فترات
انا كنت بحط من الزيرو شل الاصفر ( معدني )
والعربيه موديل 2007 وعامله لغايه دلوقتي 30000كم
ولك جزيل الشكر

حسب الكتالوج بتاع الإيلانترا على النت.. زيوت 5w-30 هي اللي تتحط.. ومش هقدر أوصي بزيت 5w-40 إلا لو اتأكدنا إنه مكتوب في كتالوج إلانترا الشرق الأوسط.

عموما... حضرتك مش محتاج زيوت تعيش مسافات طويلة... إنما عايز زيت يعيش مدة زمنية طويلة.

أي زيت تخليقي بدرجة اللزوجة دي يعيش معاك مدة السنة بدون تغيير إن شاء الله.

...

**borio1704** · 20-01-2016 09:41 PM

حضرتك رديت عليا في موضوع تاني وجبتلنا صورة الكتالوج دي:

وده كان ردي... أنا قلت أنقله هنا بردو علشان الكل يستفيد:

حسب الكتالوج ده... حضرتك تقدر تستخدم كل اللزوجات المكتوبة في الكتالوج قصاد "زيت محرك البنزين" بدون مشاكل..

يعني تقدر تستخدم اللزوجات التالية:

20w-50
15w-40
والزيوت دي هتلاقيها معدنية

10w-30
والزيت ده غالبا هتلاقيه نصف تخليقي

5w-30
5w-20
والزيوت دي هتلاقيها تخليقية

بالنسبة لحالتك .. فالمفضل هو التخليقي علشان الزيت في الموتور بيكون راقد في الكارتيرة ومفيش أي حاجة تزيت الكامات في وش السلندر... وميزة الزيت التخليقي الأساسية هي سرعة الوصول للأجزاء المختلفة من الموتور في بداية التشغيل.

طبعا.. اختيار اللزوجات من التخليقي يعتمد على طريقة استخدامك للعربية بعد التشغيل...

إزاي؟؟

يعني العربية هتبقى محملة أوزان (شاملة وزن الركاب والشنط وخلافه) أكتر من 250 كجم ولا لأ؟؟
العربية هتمشي بسرعات عالية لمسافات طويلة (أكتر من 100 كم) ولا لأ..
مكان سكنك أو مشاويرك فيها صعود أماكن مرتفعة ولا لأ (المقطم مثلا).

لو أي حاجة من اللي اتذكر فوق دول بيحصلوا معاك كتير.. يبقى المفضل تروح على اللزوجة الأتقل... 5w-30

آخر حاجة...

لما تيجي تغير الزيت.. احسب بالوقت .. مش بالمسافة.. وغير الزيت التخليقي مرة كل سنة... ولو الزيت معدني غيره كل 6 شهور.

أرجو إن ردي يكون كافي.

...