المشاركة الأصلية كتبت بواسطة أشرف فتحى
استعديت اروح المكتب ولبست احسن ملابس عندى وروحت فى احسن صوره ورافع راسى للسما بلا فخر ولا كبر عشان محدش يبقى عنده فرصه للشماته...
قابلت صاحب الشركه اللى رفض يعمللى إخلاء طرف غير فى وجود أخوه يعنى لما يشرف ويتأكد انى معنديش اى التزامات وهو يعلم جيدا انى لا ادين لهم بقرش واحد وحتى دوراتى التدريبيه كنت بأخدها على حسابى الشخصى وبعد اوقات العمل وإدعى انه كان بيدفع رسوم الدورات والتراخيص اللى كنت بشتغل بيها...
حسبى الله ونعم الوكيل..
المهم ...محاوله منه لإذلالى طلب منى القيام بمهمه معينه تتطلب دخولى الدايره الجمركيه وانا حاليا لا احمل تصريح بدخول الدائره الجمركيه او ترخيص بمزاوله المهنه من أساسه...(طبعا سلمتهم عشان يعتمد الاستقاله فى البدايه....وبرضو ادعى انهم ضاعوا...)
طلبه كان يحمل من التحدى والاستهزاء بقدر ما كان يحمل من الشماته...
فى الواقع قبلت التحدى وطلعت على المطار....متوكلا على الله الذى لا يضيع اجر عامل ابدا....
ربنا وفقنى وخلصت مهمتى بتوفيق من ربنا ...وفى نهايه اليوم ...
حسيت انى تعبان جدا...رجليا مش شايلانى...
حاسس بعجز وخوف ...
انا دلوقتى فى الهوا ولا معايا شغل ولا محوش مبلغ أصرف منه لغايه ما الاقى شغل....
أعمل أيه؟؟؟...أروح فين؟؟
يارب مليش غيرك..!!!!
يارب انا سعيت واجتهدت وطالب منك العون....
يارب مليش غيرك..!!
لاقيت قدامى صندوق خشب فى جنب قعدت عليه وسرحت....
حد يصدق اللى حصل بعد كده؟!!!
الصندوق اللى قعدت عليه ده كان فى عامل جى يحركه من مكانه.....
العامل سلم عليا..
- إذيك يا شيخ أشرف...
- الحمد لله...فى فضل ونعمه من ربنا ..إذيك انت يا فلان..أخبارك أيه؟....وأخبار ولادك أيه؟..
- أنا تمام ....الحمد لله.....
ومن غير سبب الا إراده ربنا....
- إنت مش ناوى تسيب الحاج فلان ده بقى..؟
إستغربت قوى من سؤاله....هو حد قاله ولا ايه؟!
- منا خلاص سيبته يا فلان..!
- ياراجل...عملت طيب والله....وشغال مع مين دلوقت؟
- لسه..ربنا يسهل...
- طب تشتغل مع فلان؟
- معرفوش..بس أشتغل مع اى حد كويس.....
- إستنى ....
وساب شغله وقعد يدور على فلان ده لغايه ما لاقاه....
- بقوللك يا احمد ..انت مش كنت عايز حد يشتغل معاك ويكون كويس؟
- أه ليه؟
- خد أشرف معاك ...مهو ساب الحاج فلان...
- انا أسف يا أشرف بس انا لسه امبارح متفق مع فلانه وهتبدأ معايا من اول الشهر..
- وماله يا أستاذ احمد مفيش مشاكل ...ربنا ييسر الحال...
طبعا كنت خلاص هعيط....
- بس استنى كده...فلان كان بيكلمنى امبارح على واحد كويس يشتغل معاه...يا خبر ابيض ده جى أهه..!!!!!!
- يافلان
- ابو حميد
- بص بقى انا عندى ليك هديه..!!
-خير
- انت مش كنت عايز حد يشتغل معاك..
- مين؟
- أشرف أهه ..ساب الحاج فلان وممكن يبدأ معاك من بكره....
- يأهلا وسهلا ...
طب مين خلانى قعدت على الصندوق ده بالذات؟
طب مين خلى العامل يسالنى السؤال ده وأساسا مفيش بينا كلام؟
طب مين خلى العامل يسيب شغله ويدورلى على الشخص الاولانى؟
طب مين بعتلنا الشخص التانى؟
طب مين وفقنى لشغل مع واحد اول مره اقابله فى حياتى ويبقى من اقرب الاصحاب ليا؟
طب مين خللى الاولانى يضمننى عند التانى ومعرفتى بيه على قدها؟
طب مين ..ومين....ومين؟
انا عارف مين....
هو الله....الرزاق