الموضوع: الاستعدادت النهائيه للسفر الي السودان

المشاركة الأصلية كتبت بواسطة باسم يوسف

1- اسافر بري و لا طيران؟ انا عملت بحث عن التكلفه و لقيت ان البري هيكلف في حدود 1000 جنيه مصري و الطيران 1500 جنيه مصري اللي هي تمن تذكره الطياره (ذهاب فقط)


2- عايز اطلع اذن السفر + اخد التطعيمات من هيئه المصل و اللقاح + اروح السفاره السودانيه + اروح اتغدي في مطعم شرق السودان ... حد يعرف ازاي انجز المشاوير دي كلها في يوم واحد؟ اروح فين الاول ؟

3- ايه الورق المطلوب لاذن السفر؟ و مدته قد ايه ؟ و كام التكلفه؟ وهل محتاج كشف عائله ؟ مع العلم اني 28 سنه و والدي 57 سنه ... وحيد و معايا شهاده الاعفاء المؤقته

4- تكلفه التطعيمات كام ؟ اخد دواء ايه للملاريا ؟ و تكلفته كام ؟

5- حد عايش في السودان دلوقتي ؟ اعيش في الخرطوم و لا بورسودان ؟

6- اشتري مسلتزمات ايه قبل ما اسافر ؟

7- حد يعرف تاجر فلاشات جمله ؟ و ايه اقل كميه اخدها منه ؟ و بكام ؟

في انتظار اجاباتكم و نصايحكم ... بالتوفيق للجميع ان شاء الله

عن تجربه سفر شغل للسودان لمده 4 شهور خذ الخلاصه دى

1- اكيد هاتسافر طيران .. القاهرة - الخرطوم التذكرة فى مصر للطيران كانت فى حدود 1700 جنيه دلوقتى معديه 2000 اكيد .. اوعى تسافر على طيران السودان مع انه ارخص بس زفت .. السفر البرى معناه انك هاتركب القطر لغايه اسوان (12 ساعه) ثم من اسوان الى وادى حلفا (4 ساعات) ثم تعدى الحدود(ساعه) ثم تركب من حلفا الى الخرطوم (7 ساعات) يعنى معاك يومين و نصف لو قدرت تستحمل ..

2- لو الباسبور بتاعك مختوم عليه او مكتوب عليه (لا يسمح له بالسفر الا بتصريح) فلازم تطلع تصريح سفر من اداره التجنيد فى المحافظه التابع ليها .. لو الباسبور بتاعك مختوم او مكتوب عليه (غير مطلوب للتجنيد) تسافر عادى بدون ما تحتاج تصريح سفر

فى حاله لو احتجت تصريح سفر لو عنوانك تبع القاهره عندك منطقة تجنيد الحلمية ش جسر السويس و عندك منطقه تجنيد الهايكستب .. لو تبع الجيزة عندك منطقه التجنيد اللى بعد ميدان الرماية .. تصريح السفر الورق المطلوب ليه اصل شهاده الجيش و البطاقة بس و بيطع احياناً و انت واقف و احياناً يقولك تعالى بكره او بعده حسب الزحمة ..

3- التطعيمات المطلوبة هى تطعيم الحمى الصفراء + تطعيم الكوليرا بتاخدهم من مكتب تطعيمات وزاره الصحه فى وسط البلد فى المنيرة من ناحيه ش القصر العينى فى الشارع اللى فيه مبنى الضرائب .. لازم تاخد شهاده مختومة بالتطعيم .. التكلفة فى حدود 250 الى 300 جنيه

4- فيه اقراص للملاريا موجوده فى مكتب تطعيمات وزارة الصحه برضو بيتاخدها

5- مفيش تأشيره بين مصر و السودان و مش محتاج تروح السفارة أصلاً .. بتاخد التأشيره و انت داخل المطار .. فى السودان المصرى بيتعامل حكومياً و قانونياً زى السودانى بالظبط

6- اهم 3 حاجات تاخدهم معاك و انت مسافر السودان
- ملابس داخليه قطن و تى شيرتات قطن
- ادوية برد و ارتفاع حراره لان دلوقتى فى شهرى يوليو و اغسطس ده موسم المطر فاهتلاقى الدنيا حر جداً و مطره فى نفس الوقت و احنا كمصريين مش متعودين على الجو ده
- ادوية علاج المعدة لان الاكل السودانى دسم و مشطشط و طعمه غريب فى نفس الوقت

7- تجار الفلاشات و مستلزمات الكمبيوتر و الموبايلات بالجملة موجودين فى ش عبدالعزيز فى العتبة و فى باب اللوق .. للأسف معرفش حد فيهم ..

بالتوفيق ان شاء الله

ملقتش غير السودان :)

بالمناسبة المطعم السوداني ليس من المطاعم المميزة
ومن اكلاتهم المفضلة ، الويكا ، وهي عبارة عن بامية ناشفة يتم طحنها وطبخها
والخضروات بجميع انواعها بالاضافة للموز والمانجو هي اجمل خضروات يمكنك تذوقها
لانهم لا يستخدمون الاسمدة والمبيدات والكيماويات في الزراعة

ومن الطرائف التي سمعتها في السودان
ان الخطوط الجوية السودانية هي الوحيدة في العالم التي لم تتعرض لاي حادث ارهابي لسبب بسيط
وهو انه لم يحدث في التاريخ ان قامت اي طائرة سودانية بالاقلاع في الموعد المحدد لها
واقل مدة تاخير تصل الى اربع ساعات

مقابل ذلك تجد المناظر الخلابة للنيل ، وخاصة منطقة تسمى "المقرن"
وهي منطقة يتلاقى عندها النيل الابيض مع النيل الازرق