الموضوع: مشكلة غريبة فى عربيتى الفيرنا

السلام عليكم ورحمة الله وبركاته

ياجماعة انا عندى مشكلة احتمال تبقى سبب فى بيعى للعربية لانى ديه تالت مرة اكتب المشكلة على المنتدى واحاول احلها بكل الاشكال وبرضه مافيش فايدة

عربيتى الفيرنا بتخسن على الطرق السريعة بعد اما اجيب 100 كم او 120 كم وانا مشغل التكيف بلاقى مؤشر الحرارة بيعلى انما جوا البلد على الاول والتانى او كوبرى اكتوبر ولا الهوا ولا تسخن ولا حاجة وبرضه بكون مشغل التكيف

عملت الخطوات الاتية :
تم غسل الردياتير وتسليكه وتنظيفه وحطيت ميه خضرا اسبانى من توتال ب 45 جنيه وكمان حسيت ان صوت المروحة مش كويس رحت مغير مروحة الراداتير بواحدة كورى وطلعت على الطريق السريع وبرده نفس المشكلة


الله يكرمكم اللى يعرف حل للمشكلة ديه يقولنا عليه

العربية فيرنا 1600 سى سى موديل 2005 وعاملة 150,000 كم

ملحوظة : كان فيه واحد على المنتدى عنده نفس المشكلة فى عربيته الفيرنا و لاقها فى الاخر خاجة اسمها ارضى التابلوه كان مش راكب كويس !!!

افيدونا وجزاكم الله كل خير

المشاركة الأصلية كتبت بواسطة mmw100100

نفس المشكلة دى كانت عندى بالضبط بس مش عربية فيرنا و فى الاخر بعد المصاريف طلع ارضى التابلوة فكيت المسمار و صنفرت مكانة (صنفرة ناعمة) و ارت علية و الحمد لله المشكلة دى راحت .

جزاكم الله كل خير على الاهتمام والرد

بس حضرتك ممكن تقولنا ايه الاقى فين ارضى التابلوه دا ومين اللى بيعمله صنفرة (كهربائى ولا ميكانيكى و)

وحضرتك كانت بتقابلك نفس المشكلة بالظبط يعنى كانت بتسخن مع التكيف فى الطرق السريعة لكن جوا البلد ماكانتش بتسخن مع حضرتك

وجزاك الله كل خير

المشاركة الأصلية كتبت بواسطة mmw100100

شوف يا استاذ احمد اعراض السخونية كانت مع التكيف او ادوس فرامل او على السرعات العالية وكان ملاحظ جدا ارتفاع او نهييس موئشر الحرارة
انا غيرت كل حاجة من صباع حرارة ,ثرموستات, مياة خضرة من نوع غالى كمان stp و اخيرا ردياتير و فضلت نفس المشكلة لغاية لما توصلت الى ارضى التابلوة هو عموما خلف "كاسيت " العربية يعتى لازم تحل الكاسيت و هتلاقى سلكتين كدة بمسمار "قلاوظ" شيلهم و اشترى صنفرة ناعمة من عند اى " موان " و صنفرهم او روح للكهربائى خلية يبوصلك عليها
لو سيادتك قريب من المعادى (صقر قريش)فى كهربائى مشهور جدا اسمة رجب الكهربائى ودة رقمة 01141768723 و إن شاء الله خير

ربنا يجازيك خير على الشرح والتفاصيل ديه .. انا فعلا روحت لكهريائى وقولتله يبصلى على ارضى التابلوه شغل العربية وقعد يبص على العدادات وشغل التكيف وقعد يسألنى كام سؤال زى ان عداد السرعة او الار بى ام بيخرفوا او بيهيسوا معايا يعنى الاقى عداد السرعة جاب 200 لوحده وكانت الاجابة ﻷ بص على العربية من غير مايعاين ارضى التابلوه وقالى انه كدا الارضى مافيهوش مشكلة ومشيت من عنده ومش عارف اعمل ايه

على العموم شكرا لحضرتك مرة تانية على اﻻهتمام والمساعدة

اخي الكريم

بعد خبره 25 سنه مع العربيات

تسخن مع الجري يبقي تغير الريداتير ،،، الريداتير ده عامل ملح من جوه سادد شويه مواسير وبالتالي شخال بكفائه 70% و بتبان المشكله مع الاجهاد الشديد و السرعات العاليه

الغسيل العادي ما بيبينش العيب ده الا لو روحت لحد فك العلبه الفبر و سلك المواسير ماسورة ماسوره دي الطريقه الوحيده اللي ممكن تقولك ريداتير ولا حاجه تانيه